"Rusiya İran və Şimali Koreyadan ballistik raketlər əldə edəcək" - "The Wall Street Journal"

Bizi sosial şəbəkələrdən izləyin:

"Qəddar müharibə girdabına düçar olan və beynəlxalq sanksiyalarla üz-üzə qalan işğalçı Rusiya hərbi dəstək üçün İran və Şimali Koreyaya bel bağlayır..."

"ABŞ Konqresində Ukraynaya hərbi yardımın davam etdirilməsi ideyasının zəifləməsi fonunda Moskvanın silahlanma planları Bayden administrasiyasında dərin narahatlıq doğurur..."

Rusiya İrandan yaxın mənzilli ballistik raketlər almağı planlaşdırır, bu da onun Ukraynaya zərbələr endirmək imkanlarını genişləndirəcək.

Moderator.az xəbər verir ki, bu barədə "The Wall Street Journal" nəşri ABŞ rəsmi şəxslərinə istinadən məlumat verib.

Həm də silah tədarükü bu yazda baş tuta bilər. Bu zaman nəşr qeyd edir ki, Rusiya artıq Şimali Koreyadan raketlər əldə edir.

Məlumatda deyilir ki, Moskvanın bundan sonra silahlanma ilə bağlı planları Konqresdə ABŞ-ın Ukraynaya hərbi yardımın davam etdirilməsi ideyasının zəifləməsi fonunda Bayden administrasiyasında dərin narahatlıq doğurur.

Amerika qanunvericilərinə Ukrayna üçün əlavə maliyyələşməni təmin edəcək qanun layihəsini hələ qəbul etmək lazım gələcək.

"Birləşmiş Ştatlar Rusiyanın yaxın mənzilli ballistik raketlər əldə edilməsi ilə bağlı danışıqların irəliyə getməsindən narahatdır, - bunu amerikalı məmurlardan biri deyib. - Bizim dəyərləndirmələrimizə görə, Rusiya İrandan raket sistemləri almaq niyyətindədir".

Əgər bu alış baş verərsə, o zaman İran raketlərinin tədarükü artıq bu yazda baş tuta bilər, lakin ABŞ rəsmi şəxslərinin güman etdiyinə görə, sövdələşmə hələ başa çatmayıb.

Bu zaman Rusiya Şimali Koreyadan artıq onlarla ballistik raket və onlar üçün buraxılış qurğuları əldə edib.

ABŞ rəsmi şəxslərinin məlumatlarına görə, Moskvanın İran raketlərini əldə etmək istəyi dekabrın ortalarında, Rusiya nümayəndə heyətinin İran poliqonunu ziyarət edərək, İranın ballistik raketlərinin fəaliyyətini,

"Ababil" yaxın mənzilli raketlərini və İran İnqilabı Keşikçiləri Korpusu (İİKK) Aerokosmik Qüvvələri tərəfindən təqdim edilən digər avadanlığı müşahidə etdiyi zaman aydın olub.

Bu səfər Rusiya müdafiə naziri Sergey Şoyqunun Tehranda İİKK Aerokosmik Qüvvələrinin qərargahına ziyarətindən sonra baş tutub.

Qəddar müharibə girdabına düçar olan və beynəlxalq sanksiyalarla üzləşən işğalçı Rusiya həmçinin hərbi dəstək üçün Şimali Koreyaya müraciət edib.

Rusiya prezidenti Putin və Şimali Koreya lideri Kim Çen In sentyabrda Rusiyanın Uzaq Şərqdə kosmodromunda sammit keçirib və bir-birinə iqtisadiyyat və təhlükəsizlik sahəsində əməkdaşlığı genişləndirməyi vəd edib.

Son bir neçə həftə ərzində Şimali Koreya Rusiyanın şərqinə bir sıra silahlar, o cümlədən yaxın mənzilli ballistik raketlər tədarük etməyə başlayıb. Tədarük edilən silahların tərkibində həmçinin artilleriya mərmiləri də var.

Hərbi analitiklər hesab edir ki, Moskva tərəfindən İran və Şimali Koreya raketlərinin əldə edilməsi Rusiyanın bundan sonra da Ukraynanın raketdənmüdafiə sistemini sarsıtmaq cəhdlərinin gücləndirilməsi üçün etibarlı bazanı təmin edə bilər.