“Korrupsionerlərlə, xainlərlə həmrəy olmasaq... - Günümüz də yaxşı gələr, ilimiz də...”xa0

 

"Allah bu günlərə yetməmizə vəsilə olmuş cümlə şəhidlərimizə rəhmət eləsin!.."

 

 

Allaha min şükürlər olsun ki, dövlətimizin uyğun xarici siyasəti, şəhid və qazilərimizin canı-qanı hesabına 2023-cü ili 8 anklav kəndimiz istisna olmaqla müstəqil(!) Quzey Azərbaycan Respublikasının ərazi bütövlüyü şəraitində, yəni Şuşa, Laçın,  Kəlbəcər, Qubadlı, Zəngilan, Cəbrayıl, Füzuli ilə yanaşı, Xocalıda, Xankəndində, Əsgəranda, Ağdərədə, Xocavənddə, Qırmızı Bazarda da və s. üçrəngli dövlət bayrağımızın dalğalandığı, bütün həmin ərazilərə ən azı Azərbaycan əsgərinin, Azərbaycan polisinin ayağını basdığı bir durumda yola salır və Yeni – 2024-cü ilə qarşılayırıq(İnşallah,  doğrudan da, həmrəy, həmniyyət və bir olsaq, 2026-cı ili Yuxarı Qarabağda başqa bir imperiyapərəst dövlətin bayrağının da, əsgərinin də olmadığı şəraitdə qarşılayarıq)... Və Yeni təqvim ilindən öncə daha böyük bir bayramımızı qeyd edirik:  Dünya Azərbaycanlılarının Həmrəyliyi Gününü...

 

Əlbəttə, bayram yaxşı şeydi... Həmrəylik Günü də yaxşı bayramdır... Bu şərtlə ki, onu yaxşı gündə, yəni mənəvi baxımdan ürəkaçan şəraitdə və yaxşı adamlarla, səmimi qəlblə qeyd edəsən...

 

Dünya Azərbaycanlılarının Həmrəyliyi Günü... Rəy məfhumu izahlı lüğətlərdə “bir şey haqqında fikir, mülahizə, söz” kimi izah edilir.  Biz - Azərbaycan sakinləri, azərbaycanlılar – türklər, talışlar, kürdlər, ləzgilər, tatlar, avarlar, ruslar, ukrayınlar, yəhudilər, udinlər və s. bir soydaş, vətəndaş olaraq nələr  haqqında həmrəy olmalıyıq? Öncə bizi Yaradan Allah, doğulduğumuz Vətən, mənsubu olduğumuz xalq, onun milli əxlaqı, ənənələri, vətəndaşı olduğumuz dövlət, üzvü olduğumuz ailə, ata-ana, dövlətimizin qəbul etdiyi konstitusiya, qanunlar, daşıdığımız vəzifələr, hüquqlarımız və s. barədə... Bizi Yaradan Allahı sevməli, onun Peyğəmbərləri, Kitabları vasitəsilə qoyduğu qayda-qanunlara əməl etməli, Vətənimizi, xalqımızı, dövlətimizi, ailəmizi, ata-anamızı, doğmalarımızı da sevməli, onlar uğrunda da hər cür fədakarlığa və yeri gəlsə, ölümə hazır olmalıyıq.... Dövlətimizin(eləcə də müvəqqəti və ya daimi yaşadığımız hər hansı xarici dövlətin) konstitusiya və qanunlarına da əməl etməli, dövlət, Vətən qarşısındakı vəzifə və borclarımızı canla-başla yerinə yetirməli, qanunsuzluğa, cinayətə, haqsızlığa qarşı barışmaz olmalı,  eyni zamanda bir insan, vətəndaş olaraq haqq və hüquqlarımızı da bilməli, onları tələb etməyi və qorumağı bacarmalıyıq... Bir sözlə, hər birimiz bir Azərbaycan vətəndaşı olaraq yalnız dediklərimizə əməl edən soydaşlarımızla həmrəy olmalıyıq...Vətənə, xalqa, dövlətə, Ana Yasaya, qanunlarımıza, milli, dini əxlaqımıza zidd davrananlarla, xəyanət edənlərlə, yəni cinayətkar, korrupsioner, rüşvətxorlarla, yad, işğalçı, imperiyapərəst dövlətlərin ölkəmizdə qurduğu agentura şəbəkələrinə, “5-ci kalon”larına xidmət edənlərlə və s. həmrəy ola bilmərik. Əksinə, bu cür adamlarla mübarizə aparmalı, riyakarcasına onların əməllərinə, cinayətlərinə göz yumaraq belələrini “ziyalı”, “dövlət xadimi”, “xalqımızın böyük oğlu-qızı” və s. kimi bər- bəzəkli metaforalarla mədh edərək onlarla çiyin-çiyinə dayanmamalıyıq... 

 

Peyğəmbərimiz(s) bir hədisində əbəs yerə buyurmur ki,  Axirət günü Allah insanları söz və əməllərinə görə deyil, qəlb və niyyətlərinə görə qəbul edəcək... Bəli, sözdən, əməldən öncə niyyətdir... Biz hər birimiz bu gün uca kürsülərdən Vətəndən, xalqdan, dövlətdən, Qarabağdan, Zəngəzurdan hay-küylə danışıb, hamını milli-mənəvi, dini adət-ənələrimizə, qanun-qaydalara riayət etməyə və s. çağırırıqsa, bir ağacəkmə kampaniyası təşkil edib özümüz də digərləri kimi ağac əkiriksə, amma həmin tədbirdən ayrıldıqdan sonra gündəlik həm şəxsi, həm ictimai-siyasi fəaliyyətimizdə dediklərimizin əksini ediriksə, vəzifəmizdən sui-istifadə edərək qanunları tapdayırıqsa, rüşvət alıb-veririksə, korrupsiya və saxtalaşma ilə məşğul oluruqsa, bir yerdə kampaniya xatirinə ağac əkib başqa bir yerdə rüşvət alıb meşələrin, yaşıllıqların kütləvi şəkildə məhvinə şərait yaradırıqsa və ya belə cinayətlərə göz yumuruqsa, belə cinayətlər törədənlərin üzünə gülüb onları “ziyalı” adlandırırıqsa, bizim rəyimiz, niyyətimiz necədir, nədir? Bu halda biz kimlərlə həmrəy həmniyyət oluruq? Əlbəttə ki, korrupsioner, rüşvətxor, dələduz, saxtakarlarla, əxlaqsızlarla... Və dolayısıyla xalqımızın, dövlətimizin, Azərbaycanımızın, Türk-İslam dünyamızın düşmənləri ilə...

 

Bir sözlə, bir bəndə, bir vətəndaş, bir xalq olaraq Haqq uğrunda mübarizədə həmrəy olmalıyıq ki, öz yaşam haqlarımızı xarici və daxili təcavüzlərdən qoruya bilək və haqq etdiyimiz haqqımıza sahib olaq...

 

Korrupsionerlərlə, rüşvətxor, dələduz, saxtakarlarla, əxlaqsızlarla, xainlərlə həmrəy olmasaq, günümüz də yaxşı gələr, ilimiz də...

Xülasə, gəlin, gözəl, xoş rəylərə, niyyətlərə, səmimiyyyətə söykənək və bir-birimizə Həmrəylik Günümüz və Yeni ilimiz mübarək deyək... Və unutmayaq ki, “mübarək” sözünün mənası  həm də müqəddəs, layiqli, hörmətli deməkdir... Həmrəylik Günümüz və Yeni ilimiz xalqımıza, Vətənimizə, millətimizə, dinimizə layiqli olsun...

 

 

Sultan Laçın