“Ərindən boşanan ailə dəyərlərindən danışır, kişi müəllimlərin sayı azdır”-Aktyordan Elm və Təhsil Nazirliyinə təklif-ÖZƏL

"Arada-sırada bəzi məktəblərə gedib baxıram. Əvvəllər ancaq dəhlizdə ancaq kişi müəllimlərlə rastlaşırdıq, indi maşallah hamısı qadın müəllimlərdir. Bu məndə belə bir fikir yaratdı ki, niyə görə kişi müəllimlər məktəblərdən uzaq düşüb?! Bəlkə maaş azdır, yaxud başqa bir səbəb var? Bir aktyor kimi yox, vətəndaş kimi Elm və Təhsil Nazirliyinə çağırış etmək istəyirəm ki, həqiqətən də acınacaqlı vəziyyətdir. Kişi müəllimlərin məktəblərdə qıtlığıdır. Bu mövzu mənim ən ağrılı yerimdir”

 

Bunu Moderator.az-a açıqlamasında aktyor Elçin İmanov deyib. O daha sonra əlavə edib.

 

“Digər tərəfdən də təlim-tərbiyə işlərində kişi müəllimlərin də böyük rolu var. Ən azından öz dövrümüzdən misal gətirə bilərəm. Çoxu deyə bilər ki, “Nikolayın dövründən danışırsan, o dövr keçib”. Hər kəsin öz fikri var. Kişi sözü deyilən anlam var bizdə. Kişinin sözü daha keçərlidir. Kişi müəllimlərin olması təqdirəlayiq bir hal ola bilər. İndiki uşaqların çoxunda kişilik simvolu atalarıdır. Ataların da bəziləri yaxşı, bəziləri isə pis ola bilər. Amma müəllimə biz ideal baxmışıq. Ailədən də çox cəmiyyətin, müəllimlərin uşaqlara daha böyük təsiri var. O da məktəbdə olur. Mən qadın müəllimlərin əleyhinə deyiləm, onlara qarşı heç bir qərəzim də yoxdur. Kişi müəllimlərin sayının az olması cəmiyyətimizdə sözükeçərli, sözübütöv, əsl kişi xasiyyətli olmayan uşaqların yetişməsi ilə nəticələnir. Bir çox insanlar bu fikrimə görə məni dəstəkləyir. Yəqin ki, bunu rəsmi müraciət formasında da edəcəyəm” deyə aktyor bildirib.

 

Aktyor efirlərdə baş verən özbaşnalıqlardan da danışıb.

 

“Bu bizim yaralı yerimizdir. Çox təəssüflənirəm ki, efirlərin çoxu şou xarakterlidir. Şouya qaçırlar, reytinq xatirinə ancaq müğənniləri dəvət edirlər. Ciddi söhbət etməyəndə heç kəs baxmayacaq, reytinq düşəcək fikrindədirlər. Məncə savadlı insanların, kadrların sosial verilişlərdə çıxıb danışması daha gözəl olar. Üzr istəyirəm, ərindən boşanan gəlib ailə dəyərlərindən danışır. Kimlərsə gəlib kişilikdən danışır. Düzgün olmayan yanaşmadır. Mən hansısa sosial verilişdə danışanda öz üzərimdən, ailə üzərimdən nümunə gətirib, tamaşaçıya deyirəm. Burada qəbahət bir şey yoxdur. Əgər sən sosial veriliş vasitəsilə kiminsə ailəsinə müdaxilə edirsənsə, aydın məsələdir ki, tamaşaçı da tanıyıb bilməlidir ki, bu kimdir?! Sosial verilişlərdə ciddi insanlara üstünlük verilməsi daha gözəl olar” deyə aktyor bildirib.