"Putin 18-ci əsrdə Yekaterina Velikaya dönəmindən bəri Rusiya dövlətinin ən uzunmüddətli hakimi ola bilər..."

 

"Rusiya indiki aralıq vəziyyətinə görə döyüş meydanından qalib çıxır..."

 

"Putin Rusiyanın qlobal suveren dövlət statusuna dönməsindən məmnundur..."

 

Əgər Putin Kremldə daha bir altı illik müddətini başa vurarsa, o zaman Stalini geridə qoyacaq.

 

Moderator.az xəbər verir ki, bu barədə Almaniyanın "Der Spiegel" nəşri yazıb.

 

Rusiya prezidenti Vladimir Putin 2024-cü ilin növbəti prezident seçkilərində öz namizədliyi irəli sürəcəyini elan edib. Nəşr yazır ki, Kreml liderinin bu qərarına çətin ki, kimsə şübhə edib.

 

Rusiya parlamentinin yuxarı palatası yalnız çərşənbə axşamı növbəti ildə prezident seçkilərinin tarixini təyin edib. Federasiya Şurası öz iclasında seçkilərin martın 17-də keçirilməsi barədə qərar verib.

 

"Bu qərar prezident seçki kampaniyasına start verildiyindən xəbər verir", - Federasiya Şurasının sədri Valentina Matviyenko bəyan edib.

 

Putin ilk prezidentlik dönəminə 2000-ci ildə başlayıb. Yeri gəlmişkən, dörd il o, baş nazir postunda olub, sonra yenidən 2012-2018-ci illərdə dövlət başçısı seçilib.

 

Putinin təşəbbüsü ilə 2020-ci ildə keçirilən Konstitusiya islahatı nəticəsində nəzəri cəhətdən o, 2036-cı ilədək prezident postunda qala bilər.

 

Əgər Putin Kremldə özünün daha bir altı illik müddətini başa vurarsa, o zaman 1922-ci ildən 1953-cü ilədək Sovet İttifaqına rəhbərlik etmiş tiran İosif Stalini geridə qoyacaq.

 

O zaman Putin 18-ci əsrdə Yekaterina Velikaya dönəmindən Rusiya dövlətinin ən uzunmüddətli hakimi olacaq.

 

Məqalə müəllifi, alman icmalçısı Enn Dorit Boy məqaləsində daha sonra təəssüflə qeyd edib ki, prezident Putin Rusiyanın "xüsusi hərbi əməliyyatı"nın plan üzrə getdiyini bəyan etməkdə haqlı olub.

 

"Prezident Putin deyir ki, onun ölkəsi Ukraynaya qoşun yeritdikdən sonra daha da güclənib. Təəssüf ki, o, haqlıdır", - o, qeyd edib.

 

Jurnalist qadın xatırladıb ki, hələ ötən il Putin iddia edib ki, "xüsusi əməliyyat" plan üzrə gedir. O zaman bir çoxları bunun təbliğat olduğunu güman edib. 

 

Lakin etiraf etmək lazımdır ki, Rusiyanın işləri yaxşı gedir, ukraynalılar Rusiyanın yeni hücumunun başlanmasından ehtiyat edir, Putin isə nəticələrdən razıdır və əminlik nümayiş etdirir.

 

Onun fikrincə, "Putin indiki aralıq vəziyyətinə görə  döyüş meydanından qalib çıxır". Jurnalist qeyd edib ki, sanksiyalar səbəbindən Rusiya iqtisadiyyatı nəinki çökməyib, hətta artıma doğru can atır. Bu, rusiyalılara fayda gətirəcək, Boy buna əmindir.

 

"İqtisadi siyasət qısa və, ehtimal ki, orta perspektivdə artıma gətirib çıxaracaq, nəticə etibarilə bu, rusuyalılara fayda gətirəcək. İşsizlik aşağı səviyyədədir. Rusiyanın tikinti sahəsi hətta rekordlar vurur", - o, deyib.

 

Jurnalistin fikrincə, Putin Rusiyanın "qlobal suveren dövlət" statusuna dönməsindən məmnundur.

 

Dekabrın 4-də "The Washington Post" qəzeti yazıb ki, Ukraynanın əkshücumunun iflasa uğraması Kiyevlə Vaşinqton arasında ixtilaflar, Qərbin yanlışlıqları, həmçinin Rusiya qüvvələrinin lazımınca qiymətləndirilməməsi olub.

 

Noyabrın əvvəlinfə USQ Baş Komandanı Valeri Zalujnı bəyan edib ki, Ukrayna münaqişəsi dalana dirənib və irəlilıyiş olmayacaq. O, etiraf edib ki, Qərbin gözləntilərinə rəğmən, əhəmiyyətli irəliləyişi nümayiş etdirə bilməyib.

 

Oktyabr ayında "Valday" diskusiya klubunda çıxış edərkən Putin bəyan edib ki, əgər Qərbin silah tədarükü dayanarsa, Ukrayna bir həftə tab gətirəcək. O, məlumat verib ki, əkshücum başlanandan USQ 90 min  nəfər itki verib.