SIPRI: “Nüvə dövlətləri öz arsenallarına getdikcə daha çox sərmayə qoyurlar”

Ölkələr silahlı qüvvələrini modernləşdirmək və genişləndirmək üçün uzunmüddətli planları həyata keçirdikcə mövcud nüvə silahlarının sayı artmağa başlayıb.

Bu barədə Stokholm Beynəlxalq Sülh Araşdırmaları İnstitutunun (SIPRI) illik təhlilində deyilir.

Araşdırmaya əsasən, 9 nüvə dövləti - ABŞ, Rusiya, Böyük Britaniya, Fransa, Çin, Hindistan, Pakistan, Şimali Koreya və İsrail öz nüvə arsenallarını modernləşdirməyə davam edir və 2022-ci ildə bir neçə yeni nüvə başlıqları əldə ediblər.

2023-cü ilin yanvar ayında təxminən 12,5 min ədəd olan döyüş başlıqlarının ümumi qlobal ehtiyatının təxminən 9,5 mini potensial istifadə üçün hərbi ehtiyatlarda idi ki, bu da 2022-ci ilin yanvar ayı ilə müqayisədə 86 ədəd çoxdur.

Bunlardan təqribən 3,8 min döyüş başlığı raketlər və təyyarələrlə birlikdə yerləşdirilib, demək olar hamısı Rusiya və ya ABŞ-a məxsus olan təxminən 2 min ədədi yüksək hazırlıq vəziyyətində, yəni raketlərə quraşdırılmış və ya nüvə bombardmançılarının aviabazalarında saxlanılmış halda olub.