Bakı şəhəri, Nizami rayonu, Ə.Əzimzadə küçəsində yerləşən ikimərtəbəli yaşayış binasında yanğın olub.
Fövqəladə Hallar Nazirliyinin Mətbuat Xidmətindən verilən xəbərə görə, daxil olan məlumatla əlaqədar dərhal əraziyə FHN-in Dövlət Yanğından Mühafizə Xidmətinin qüvvələri cəlb olunub.
Hadisə yerində əməliyyat şəraiti qiymətləndirilərkən ikimərtəbəli çoxmənzilli yaşayış binasının birinci mərtəbəsində yerləşən mənzildə baş verən yanğının genişlənmə riskinin yüksək olduğu, həmçinin ikinci mərtəbədə yerləşən mənzilə qatı tüstü dolması səbəbindən üç nəfərin mənzili tərk edə bilməməsi və həyati təhlükə ilə üz-üzə qalması müəyyən edilib.
Əməliyyat şəraitinə uyğun olaraq yanğınsöndürənlər operativ qaydada mənzilin pəncərəsinin dəmir barmaqlıqlarını kəsərək mənzilə daxil olub və biri azyaşlı olmaqla üç vətəndaşı xilas ediblər. Eyni zamanda, yanğın genişlənməsinə, eləcə də qonşu mənzillərə keçməsinə imkan verilmədən qısa müddətdə söndürülüb. Bundan əlavə, təhlükəsizlik tədbirləri çərçivəsində iki nəfər bina sakini təxliyə edilib.
Yanğın nəticəsində ikimərtəbəli taxta konstruksiyadan ibarət yaşayış binasının 1-ci mərtəbəsində ümumi sahəsi 120 kvadratmetr olan dördotaqlı mənzilin mətbəxinin və bir otağının yanar konstruksiyaları 15 kvadratmetr sahədə, sanitar qovşağının lambir materialdan ibarət tavanı 4 kvadratmetr sahədə yanıb. Yüksək temperaturdan dəhlizin və otaqların divarları deformasiyaya uğrayıb.
Mənzilin qalan hissəsi və qonşu mənzillər yanğından mühafizə edilib.
