Siyasətin çirkin bir şey olduğunu iddia edənləri iki qrupa bölmək olar, birincilər sadəcə bu məfhumun nə olduğunu olduğu kimi qavramayanlardısa, ikincilər gerçəkdən çirkin əməllər müəllifi olduqlarından siyasətin adına damğa vurmaqla ictimai qınaqdan sivişib çıxmaq niyyəti güdənlərdi. Nə yazıq ki, Azərbaycanda siyasətin nə olduğunu doğru-dürüst biməyənlər kimi gündə bir dona girərək siyasəti murdarlayan çoxüzlü mindillilər, Muğan otu kimi səmt küləyinin istiqamətinə asanlıqla boyun əyən zavallı məxluqlar da az deyil.
Əslində bütün dönəmlərdə bu cür çoxdəfəlik vasitələr ölkəni və rəhbəri olduğu sferanı idarə edənlər üçün hər zaman gərəkli olublar. Ancaq milli özəlliyimiz adətən qadınlarımızın bu və ya digər formada siyasi oyunların predmetinə çevrilməsinə sədd çəkə bilib. Acınacaqlısı odur ki, son zamanlar bu baryer də aradan qaldırılıb və əsrlərdən üzü bəri tabu elan edilmiş mənəvi dünyamıza alçaqcasına təcavüz edilməkdədir. Ancaq tarix dönə-dönə sübut edib ki, qadına qarşı kişi inadkarlığı hər zaman sonuncunun iflası və ifşasıyla nəticələnib. İllah da bu qadın həm də analıq zirvəsini fəth etmiş bir şəxs ola, o zaman obrazlı desək, kişinin qanı batdı. Görünür, elə “cənnət anaların ayaqları altınddır” söyləyən Məhəmməd peyğəmbər də qadına qarşı reqressiv hərəkətləri bu cür ilahi xəbərdarlıqla qınayıb.
Keçmiş millət vəkili Gültəkin Hacıbəyliyə qarşı aparılan kompaniya və bu çirkin oyunun müti iştirakçısına çevrilmiş keçmiş həyat yoldaşı da cəmiyyətimiz tərəfindən qətiyyətlə qınanılır. Təbii ki, hakimiyyətin qəzəbindən qorxan insanlar öz etirazlarını nümayişkaranə şəkildə izhar etməkdən çəkinsələr də onlar da yaşananları qınayır, eyni zamanda azyaşlı uşağın yaramaz siyasi qisasçılığın alətinə çevrilməsini lənətləyirlər.
Modeator.az saytı da münaqişənin ilk günündən, daha doğrusu, Gültəkin xanımın keçmiş həyat yoldaşı zühur edərək ultimatumla çıxış etməsindən üzü bəri proseslərin içərisində olub və kimin haqlı, kimin sifariş qulu olduğunu təfərrüatıyla öyrənə bilib. Ancaq biz mümkün qədər tərəf saxlamamağa çalışmışıq və baş verən xoşagəlməz olayları olduğu kimi oxucularla paylaşmağa tələsmişik. Bu günsə sadəcə Gültəkin Hacıbəylinin keçmiş həyat yoldaşı Mahmud Mehdiyevin dövlət hakimiyyət və məhkəmə orqanlarına qarşı səsləndirdiyi ittihamların izinə düşmək qərarına gəlmişik. Xatırladaq ki, M. Mehdiyev mətbuata açıqlamasında bildirmişdi ki, vaxtilə keçmiş həyat yoldaşı Gültəkin Hacıbəyli deputat səlahiyyətlərindən sui-istifadə edərək qardaşı Seymur Mehdiyevi Vergilər Nazirliyinin mərkəzi aparatındakı vəzifəsindən, bacısı Aynur Mehdiyevanı isə Azərbaycan Dövlət Dillər Universitetindəki müəllimlikdən zorla kənarlaşdırmağa müvəffəq olub. Moderator.az ailə münaqişəsindən yaranmış situasiyanın aktuallığını və ittihamda adıçəkilən dövlət qurumlarının susqunluğunu nəzər alaraq həm universitetə, həm də nazirliyə məsələyə münasibət bildirilməsi xahişiylə müraciət edib.
ADDU-dan mətbuat katibi Zeynab Kazımova şifahi sorğumuza cavabında ittihamlarla tanış olmadığını və səhhətindəki problemə görə işə çıxmadığını bildirdi. Qurum rəsmisi eyni zxamanda bu ittihamların heç bir əsasının olmadığını, universitetdən nə zamansa kiminsə ədalətsiz olaraq işdən kənarlaşdırılması faktıyla rastlaşmadığını söyləməyi də unutmadı.
Vergilər Nazirliyindən də təxminən oxşar cavab aldıq. Nazirliyin ictimaiyyətlə əlaqələr şöbəsindən bildirdilər ki, ortada ciddi ittiham olduğundan sorğunuzu şifahi cavablandırmaq olmaz, odur ki, yazılı şəkildə cavablarını saytımıza göndərəcəklər. Nazirlikdən də ümumiyyətlə heç vaxt heç kimin qanunsuz olaraq işdən kənarlaşdırlması faktının olmadığını, bu iddiaların sadəcə dezinformasiya xarakterli olduğunu qeyd etdilər.
Təbii ki, hər iki qurumdan oxşar cavab alacağımız gözlənilən idi. Axı əslində bu cür ittihamlar bir tərəfdən G. Hacıbəylininin nüfuzuna xələl gətirməyə xidmət edirdisə, başqa tərəfdən adıçəkilən dövlət qurumlarının da işgüzar nüfuzuna, bu qurumlara rəhbərlik edən vəzifəli şəxslərin şəxsiyyətinə kölgə salmaq mahiyyəti daşıyırdı. İttihamların heç bir əsasının olmadığını sübut etməyə də ehtiyac yoxdur. Azərbaycanda hakimiyyətin oyun qaydalarını az-çox bilən hər kəs anlamamaış deyil ki, nə vergilər naziri, nə də Dillər universitetinin rektoru kimlərinsə sifarişiylə oturub-durmur, bu şəxs hətta deputat olmuş olsa belə. Odur ki, elə bəri başdan da keçmiş həyat yoldaşının Gültəkin xanıma iftira atdığı gün kimi aydın idi. Ancaq yalançını mənzilinə qədfər qovmaq elimizin adəti olduğundan biz də əsrlərin sınağından çıxmış adət-ənənələrimizə bir daha hörmət etməyi lazım bildik...
