Siyasi məhbus Müsavat Partiyasının başqanının  müavini, “Yeni Müsavat” qəzetinin köşə yazarı Tofiq Yaqublunun vəkili Nemət Kərimli onunla saxlanıldığı təcridxanada növbəti dəfə görüşüb. Tofiq bəy ona yazdığı şikayətlərlə bağlı Respublika Prokurorluğundan gəlmiş rəsmi cavablar haqqında məlumat verib, bundan sonra atılacaq addımları qərarlaşdırıblar. Vəkilin sözlərinə görə, müvəkkili özü və digər siyasi məhbuslara yönəlik beynəlxalq dəstəyin və hökumətə təzyiqlərin artmasından məmnundur. Bu mövzuda o daha sonra bunları deyib: “AzTV vasitəsilə iyunun 21-də Milli Məclisin Avropa Parlamentinin Azərbaycanla bağlı qəbul etdiyi qətnaməyə keçirdiyi növbədənkənar iclası haqda reportaja baxdım. Deputat təyin edilmiş bu adamların hansı mənəvi keyfiyyətlərə sahib olmaları cəmiyyət üçün açıq məsələdir. Bu tipli insanları həmin iclasda var qüvvələri ilə həm də son dərəcədə savadsız olduqlarını sübut edirdilər. Onlar anlamırlar ki, müharibə nəticəsində qaçqın düşmüş insanların durumu ilə insan haqlarının vəziyyəti tamamilə fərqli məsələlərdir və onlara bir müstəvidə baxıla bilməz. Dünyanın hansı bölgəsindən asılı olmayaraq, müharibə və terror qurbanlarına humanizm, yardım mövqeyindən yanaşılır. Azərbaycanda da belə olub. Bizim qaçqın və köçkünlərə başda BMT və Beynəlxalq Qırmızı Xaç Komitəsi olmaqla çoxlu təşkilatlar, həm də müxtəlif dövlətlər kifayət qədər ciddi humanitar yardımlar ediblər. Deputatlar bizim qaçqın və köçkünlərə qarşı ögey münasibət olduğunu düşünürlərsə və bundan narahatdırlarsa, başqa dövlətlərin qaçqınlarına diqqət və yardımlarla paralellər aparsınlar, əgər ortaya bizim əleyhimizə faktlar aşkarlasalar, onları qabartsınlar. Yoxsa AB Azərbaycanda insan haqlarının pozulmasından narazılığını bildirir, bunlar da başlayırlar ki, bir milyon qaçqının dərdini niyə çəkmirlər. Yeri gəlmişkən, AB Qarabağ münaqişəsi ilə bağlı Azərbaycanın maraqlarına uyğun çox ciddi qətnamə qəbul edib. Milli Məclisdəki saxta deputatlar birinci növbədə buna görə AB-ə təşəkkür etməlidirlər və özlərini biabır etməyə son qoyaraq başa düşməlidirlər ki, insan haqları deyildikdə dövlətlə onun vətəndaşları arasındakı münasibətlər sistemi nəzərdə tutulur. Qaçqın və köçkünlərin məsələsini bura soxmağın yeri yoxdur. Bu,  təyin edilmiş deputatlar onu da başa düşməlidirlər ki, onların etiraz etdikləri qətnamə əslində elə onların yaxa cırdıqları və urapatriotluq etdikləri işğal olunmuş ərazilər və qaçqınlar probleminin həllinə köməyi nəzərdə tutur. AB başa salmaq istəyir, nə qədər ki, azad, ədalətli seçkilər yolu ilə legitim hakimiyyət formalaşdırmayacaqsınız, nə qədər ki, siyasi fəaliyyətinə görə insanları şərləyib həbsxanalara dolduracaqsınız, nə qədər ki, sərbəst toplaşmaq, söz, mətbuat azadlığını təmin etməyəcəksiniz, nə qədər ki, ölkə oğru qanunları ilə işğal olunacaq işğal olunmuş əraziləriniz qaytara bilməyəcəksiniz, qaçqınlar öz doğma yurd-yuvalarına qayıda bilməyəcəklər. Ötən 20 il bunu açıq şəkildə sübut etdi. Bu müddət ərzində problemin həllində sıfır nöqtəsindən tərpənmək mümkün olmayıb. Mən əvvəllər Səməd Seyidovu dəvət etmişdim ki, mənim və İlqar Məmmədovun həbsi ilə bağlı həqiqəti bilmək istəyirsə, zəhmət çəkib gəlib bizimlə görüşsün, ikicə cümlə ilə ona sübut edə bilərik ki, bizim həbsimiz siyasi sifarişdən başqa bir şey deyil. İndi də MM-in həmin toplantısında “odlu-alovlu” danışan deputatlara deyirəm, əgər sizi həqiqət maraqlandırırsa, gəlin bizimlə görüşün və həqiqəti öyrənin. Yox, əgər buna cəsarətiniz çatmırsa, onda danışmayın. Avropa Parlamentinin məlum qətnaməsi çox doğru və ədalətlidir, gələcəkdə onu daha da sərtləşdirmək lazımdır. Məgər bu deputatlar Elşad Abdullayevin videolarına baxmırlar? Bizi hansı hüquq-mühafizə orqanlarının ittiham etdiyin fərqində deyillər? Əsl deputat parlamentdə o videolarla bağlı məsələ qaldırmalıdır, AB-ni söyməklə məşğul olmamalıdırlar.”