“ATƏT-in Minsk qrupu həmsədrlərinin Dağlıq Qarabağ münaqişəsinin nizama salınması ilə bağlı narahatlıq ifadə etməsini, bəyanatlar səsləndirməsini ümumilikdə müsbət qiymətləndirmək olar. Bu o mənada qiymətləndirilə bilər ki, böyük dövlətlər ”“ Minsk qrupunun həmsədrləri münaqişəni unutmayıblar”. İyunun 19-da hakim Yeni Azərbaycan Partiyası sədrinin müavini, deputat Əli Əhmədov jurnalistlərə belə deyib.

Moderator.az “Media forum” saytına istinadən xəbər verir ki, Əli Əhmədov daha sonra vurğulayıb ki, münaqişə 20 ildir nizama salınmayıb, 1 milyondan çox azərbaycanlı qaçqın və məcburi köçkünün vəziyyətində dəyişiklik baş verməyib: “20 ildən çox müddətdə tarixi həqiqətin bərpa olunmamasının günahının böyük bir hissəsi də münaqişənin nizama salınması kimi əhəmiyyətli missiyanı üzərinə götürmüş Minsk qrupunun üzərinə düşür. Bu qrup öz vəzifəsinin öhdəsindən gələ bilmir. Mən təsəvvür edə bilmirəm ki, Minsk qrupu münaqişəni həll etmək missiyasını öz üzərinə götürəndən və 20 il ərzində bu vəzifəsinin öhdəsindən gələ bilməyəndən sonra kimləri günahlandırmaq istəyir. Bu məntiqi sadəcə olaraq başa düşmək mümkün deyil”.

Əli Əhmədovun sözlərinə görə, Minsk qrupuna həmsədrlik edən bütün dövlətlər işğalçının işğal etdiyi ərazilərdən çıxmaq tələbini konkret qoymayınca münaqişənin nizamlanması sahəsində irəliyə doğru addım atmaq mümkün olmayacaq: “Minsk qrupuna həmsədr dövlətlər münaqişə ilə bağlı konkret münasibət bildirsələr, daha yaxşı olardı. Onda münaqişənin həlli istiqamətində daha ciddi addım atılmasına nail olmaq mümkün olardı”.

Rusiya, ABŞ və Fransa prezidentləri Vladimir Putin, Barak Obama və Fransua Oland iyunun 18-də Dağlıq Qarabağ münaqişəsinə dair birgə bəyanat qəbul ediblər. ATƏT-in Minsk qrupunun həmsədr ölkələrinin dövlət başçıları Azərbaycanı və Ermənistanı Dağlıq Qarabağ münaqişəsinin hələ də açıq qalan məsələləri üzərində diqqəti cəmləşdirməyə çağırıblar: “Biz dərindən təəssüfləndiyimizi bildiririk ki, tərəflər danışıqlar prosesində qarşılıqlı maraqların nəzərə alınmasına əsaslanan həll yolu tapmağa çalışmaq əvəzinə birtərəfli mənfəət əldə etmək səylərini davam etdiriblər. Biz qəti əminik ki, münaqişənin dinc yolla hərtərəfli tənzimlənməsinə doğru aparan tarazlaşdırılmış çərçivə razılığına nail olmaqda bundan sonra da ləngimə qəbuledilməzdir, buna görə də Azərbaycan və Ermənistan liderlərini səylərini hələ açıq qalan məsələlərin həlli üzərində yeni əzmlə cəmləşdirməyə çağırırıq.

Cari qarşıdurma və qeyri-sabitlik vəziyyətinə gətirib çıxarmış hərbi qüvvə tətbiq edilməsi münaqişəni həll etməyəcək. Hərbi əməliyyatların yenidən başlanması region əhalisi üçün fəlakətli nəticələr doğurar, insan tələfatına, yeni dağıntılara, qaçqınların sayının artmasına, çox böyük maliyyə məsrəflərinə gətirib çıxarar.

Biz tərəflərin rəhbərlərini Helsinki prinsiplərinə, xüsusən, zor tətbiq edilməməsi və ya zor tətbiq ediləcəyi barədə hədələməmək, ərazi bütövlüyü, hüquq bərabərliyi və xalqların təyini-müqəddərat hüququ prinsiplərinə sadiq olduqlarını bir daha təsdiqləməyə qətiyyətlə çağırır, onlardan təkidlə xahiş edirik ki, regionda gərginliyin artmasına və münaqişənin genişlənməsinə gətirib çıxara biləcək hərəkətlərdən və bəyanatlardan çəkinsinlər. Rəhbərlər xalqları müharibəyə deyil, sülhə hazırlamalıdırlar”.