Müdafiə nazirinin keçmiş müavini, sabiq hərbi hissə komandiri, ehtiyatda olan polkovnik, hazırda Norveçdə siyasi mühacirətdə yaşayan İsa Sadıqov barəsində Respublika Hərbi Prokurorluğu Cinayət Məcəlləsinin 341.3-cü (hakimiyyətdən sui-istifadə etmə) maddəsi ilə cinayət işi açıb. Sabiq nazir müavininin beynəlxalq axtarışa verildiyi bildirilir. Srağagün isə saytların birində İsa Sadıqovun Gürcüstanda saxlandığı barədə məlumat yayılıb. Musavat.com iyunun 21-də İsa Sadıqovla əlaqə saxlayıb bu və digər aktual mövzularla bağlı suallar ünvanlayıb. Moderator.az həmin müsahibəni təqdim edir:
- Sizə qarşı başlanan cinayət işinin Milli Şuraya dəstək verməyinizlə bağlı olduğu deyilir. Deyilənlər doğrudurmu?
- Bəli. Mənə qarşı başlanan cinayət işi tamamilə qondarmadır, bu hakimiyyətdəkilərin fantaziyalardır. Eyni zamanda sırf siyasi motiv daşıyır. Bu cinayət işi bir məqsəd güdür-mənin vətənə qayıdışımı əngəlləmək. Hakimiyyəti mənim Milli Şura ilə bağlı fikirlərim, mövqeyim narahat edir. Bunlar başa düşür ki, sonlarıdır. Sizi əmin edirəm, gedən proseslərin qarşısını almaq mümkün deyil. Bu proseslərə yüz minlərlə insan, minlərlə keçmiş döyüşçülər, əlillər, şəhid ailələri qatılacaq. Azərbaycanda orduda, polisdə və o biri güc strukturlarında da hakimiyyətdən, siyasi sistemdən böyük narazılıq var və bu narazılıqlar tezliklə özünü büruzə verəcək. Hakimiyyət bunu dəqiq bilir. Bunların qələmi sındırılıb. Azərbaycan xalqı bunların qələmini artıq sındırıb, ipini kəsib. Azərbaycanda xalq hakimiyyəti qurulacaq və xalq bu quldurları ölkədən qaçmağa və canlarını qurtarmağa imkan verməyəcək. Xalqımız onları “Azadlıq” meydanında mühakimə edəcək. Səddam, Qəddafi, Mübarək, Çauşesku iqtidarları da bir vaxtlar at oynadırdı, rəqiblərini həbsə atırdı, ölkədən didərgin salırdılar. Axırları bəllidir. Mən dostlarıma, həmfikirlərimə deyirəm ki, bu rejimin məqsədi bizi müxtəlif yollarla qorxudub mübarizədən çəkindirməkdir. Qorxmayın, çəkinməyin, mübarizəni davam edək və bunların hakimiyyətinə son qoyaq. Mən mübarizəni sonadək aparacağam, bunların qarşısından geri çəkilməyəcəyəm. Vətənimizi nəyin bahasına olur-olsun bu rejimin işğalından azad etməliyik.
- Bir neçə gün əvvəl Gürcüstanda olduğunuz və orada Azərbaycan hökuməti tərəfindən saxlandığınız xəbəri yayılıb. Bu doğrudurmu?
- Məni Gürcüstanda həbs edə bilməzlər, bu mümkün deyil. Gürcüstan demokratik bir dövlətdir və burada Azərbaycanda quldurların hökm sürdüklərini bilirlər. Nəinki Gürcüstan, heç bir dövlət artıq bu hakimiyyətlə hesablaşmır, onu qəbul etmir əmin olun.
- Hansısa mərhələdə vətənə dönmək fikriniz varmı?
- Bəli. Mən vətənə dönəcəyəm. Fərqi yoxdur hansı mərhələdə, mütləq dönəcəyəm. Bir balaca imkan yaranan kimi-mənim vətənə qayıdışımın qarşısını heç kəs ala bilməz. O vətən bizimdir, Azərbaycan xalqınındır, hər biz azərbaycanlınındır. Qayıdışın o qədər yolları var ki... Bunlar bizim qayıdışımızın qarşısını ala bilməyəcəklər. Çünki artıq bunların cəhdləri gecdir. Minlərlə həmvətənimiz qayıdacaq tezliklə vətənə və aktiv şəkildə vətənin azadlığı uğrunda mübarizəyə qoşulacaqlar əmin olun. Biz bu şərəfsizliyə, özbaşınalığa, dözə bilmərik. Vətəni, xalqı xilas etmək borcumuzdur.
- Milli Şuraya üzv olmaq üçün müraciət edəcəksinizmi?
- Mən Milli Şuranı tam dəstəkləyirəm və əlimdən gələni edəcəyəm ki, Milli Şura öz məqsədinə çatsın. Milli Şuranın üzvü olub-olmamağımdan asılı olmayaraq mən bütün gücümlə onlara dəstək verəcəyəm. Məndən daha layiqli şəxsiyyətlər var vətəndə, qoy onlar Milli Şuraya üzv olsunlar. Mən Milli Şuranın, xalqın əsgəriyəm. Bu daha vacibdir.
- Sizin keçmiş hərbçi kimi hərbçilər arasında və Müdafiə Nazirliyi sistemində dostlarınızın olduğu bildirilir. Hakimiyyətin bu səbəbdən ölkəyə gəlişinizin qarşısını almaq istədiyi barədə söhbətlər gəzir. Buna münasibətiniz? Dostlarınız həqiqətən varmı?
- Doğrudur. Milli Orduda, güc strukturlarında çoxlu sayda dost və həmkarlarım var. Onlarla gözəl münasibətlərim var və onlarla həmişə fəxr etmişəm. Bu münasibətlər qarşılıqlıdır. Mənim silahlı qüvvələrdə, keçmiş döyüşçülər arasında çoxlu sayda dostlarımın olduğundan kim narahat olur-olsun. Biz səngərlərdə ölümlə üz-üzə qalıb döyüşəndə indi bu narahat olanlar gizlənirdilər. Qoy narahat olsunlar, çünki narahatlıqları boşuna deyil. Ancaq həmin narahat olanlar bizi-səngər dostlarını heç cür ayıra bilməzlər. Hərbçi dostlarım mənim fəxrimdir. Mən onlarla yaşayıram, nəfəs alıram. Həmişə onların hüquqları uğrunda mübarizə aparmışam və aparacağam. Onlar bu gün vətəndə ağır sosial problemlər içərisindədirlər. Fərarilər isə vəzifələrdə, milyonlar içində üzürlər. Mənim hərbçi dostlarım da öz sözlərini deyəcəklər. Buna əmin olun. Onlar bu xalqın qeyrətli övladlarıdır, onlar öz xalqları ilə olacaqlar, onlar quldur dəstəsinin əmrlərini yerinə yetirməzlər.
- Milli Şuranın ölkədə siyasi dəyişiklik edə biləcəyinə inanırsınızmı və Azərbaycanda vəziyyətin hansı yolla dəyişəcəyini düşünürsünüz-seçki, yoxsa inqilab?
- Mən əminəm ki, Milli Şura öz məqsədlərinə nail olacaq. Hansı yolla olacağını isə zaman göstərəcək. Mən istərdim ki, Azərbaycanda dəyişiklik seçki yolu ilə, demokratik yolla, dinc şəkildə həyata keçsin. Amma görürük ki, bu quldur dəstə normal, demokratik seçkilərdən imtina edib. Ancaq onu da bilsinlər ki, gücə əl atsalar-ölümlərinə haqq qazandıracaqlar, onda inqilab qaçılmazdı. Biz ərəblərdən geri qalan millət deyilik. İnqilablardan da çəkinən deyilik. Mən məsuliyyəti öz üzərimə də götürməyə hazıram. Bu məqamda xalqa əl qaldıran məhv olacaq, bunu əvvəldən bildirirəm. Bunu nəzərdə tutsunlar!
- Sizcə, Milli Şuranın prezidentliyə vahid namizədi kim olmalıdır?
- Vahid namizəd Rüstəm İbrahimbəyov olmalıdır. Bu keçid dövrü üçün vacibdir. Onun namizədliyini hamımız dəstəkləməliyik və onun arxasınca axıra qədər, məqsədlərimizə nail olana qədər getməliyik. Bu, bizim borcumuzdur. Çünki bunları kimsə gəlib bizim əvəzimizə edəsi deyil.
- İbrahimbəyovun yaxın günlərdə Avropaya səfər edəcəyi deyilir. Onunla görüşmək istəyiniz varmı?
- Rüstəm bəylə mütləq görüşəcəyəm. Ona mənim hədsiz hörmətim var. Avropada yaşayan soydaşlarımızın da ona hörməti var. Eyni zamanda Milli Şuranın yaranması onlarda böyük ümidlər yaradıb. Avropadakı azərbaycanlılar Milli Şuraya dəstək verəcəklər. Bizim arzuladığımız birliyə Rüstəm İbrahimbəyovun ideyası ilə nail olduq. O, artıq tariximizə böyük hərflərlə düşüb.