“Bəxt üzüyü 2” filminin çəkilməsini istəmirdim, Afaq xanım zəng etdi, Valeh Kərimov gəldi...”- FOTO+ÖZƏL

“Bəxt üzüyü 2” filmini çəkəndə gəlib məndən icazə aldılar. Əslində onlara qədər bir çoxları müraciət etmişdi, mən razılıq vermirdim. Filmin rejissorları gələndə yanlarında Valeh Kərimovu gətirmişdilər. Afaq xanım da onlardan əvvəl mənə zəng etmişdi. Məni düzgün başa düşün! Onlar Valeh Kərimovla muzeyə gəldilər. Valeh müəllimin gözlərinə baxanda dedim ki, mən mütləq razılıq verməliyəm. Çünki o da istəyirdi ki, “Bəxt üzüyü 2” çəkilsin. Mən “yox” deyə bilmədim. Bilməzdim də. Beləliklə film ərsəyə gəldi”.

Bunu Moderator.az-a açıqlamasında “Bəxt üzüyü” povestinin və eyniadlı filmin senari müəllifi Vaqif Səmədoğlunun həyat yoldaşı Nüşabə Babayeva-Vəkilova deyib.

O daha sonra “Film uğurlu alındı?” sualına belə cavab verib:

“Deməzdim ki, film çox uğurlu alındı. Pis film deyildi. Əziyyət çəkmişdilər. Bu əziyyəti açıq-aydın görmək olurdu. Əlbəttə ki, orijinal daha yaxşı idi. Belə də olmalı idi. Hər bir şeyin ilki daha yaxşı olur. Bu haqda çox danışmaq istəmirəm. Mən öncədən yeni yazılan senari ilə də tanış idim. Təqdimatı da oldu, bir çox insan gedib kinoteatrda izlədi də” deyə qısa münasibət bildirib.