“Vətənpərvər gəncliyin yetişdirilməsində incəsənətin üzərinə böyük öhdəliklər düşür”

Prezident İlham Əliyev fevralın 14-də andiçmə məraisimindəki çıxışında gənclərin və yeniyetmələrin milli-mənəvi dəyərərə bağlı şəkildə, qəhrəmanlıq ruhunda tərbiyəsinin vacibliyindən bəhs edib, bu məsələdə ailə, məktəb və cəmiyyətin üzərinə düşən vəzifələrdən danışıb.

Maraqlıdır, bəs bu məsələdə mədəniyyət və incəsənətin üzərinə hansı vəzifələr düşür?

Moderator.az-a açıqlama verən Xalq artisti Valeh Kərimov bütün incəsənət sahələrinin bu məsələyə diqqət yetirməsinin önəmindən danışıb:

“Təbii ki, vətənpərvər, milli dəyərlərə bağlı gəncliyin yetişdirilməsi prosesində mədəniyyət və incəsənətimiz yaxından iştirak etməlidir. Bu məsələdə teatrlarımızın da üzərinə böyük öhdəlik düşür və hesab edirəm ki, bütün teatrlarımız bu məsələdə üzərlərinə düşən missiyanı yerinə yetirmək üçün fədakarcasına çalışırlar. Həm yeni, həm də köhnə tamaşalarımızda bunu görmək mümkündür.

Bu məsələdə kinonun da əhəmiyyəti olduqca böyükdür. Kütləviliyinə, ictimai şüura təsir imkanına görə kino bu gün də bütün dünyada aparıcı təbliğat vasitələrindən biri hesab edilir. Bu gün dünyanın əksər qabaqcıl dövlətləri kinodan milli tarixin təbliği məqsədilə uğurla istifadə edir ki, bu da filmlərin önəmini göstərir.

Ümid edirəm ki, yaxın gələcəkdə incəsənətimiz bu yöndə daha ciddi uğurlara nail olacaq, ortaya qoyduğu dəyərli kinolar, tamaşalarla bu prosesə daha böyük töhfələr verəcək”.

Seymur ƏLİYEV