Dubayda nəşr olunan ingilisdilli “Khaleej Times” qəzetində Heydər Əliyev Mərkəzində BMT-nin Cenevrə bölməsinin baş direktoru Tatyana Valovayanın təşəbbüsü, Heydər Əliyev Fondunun, İsveçrə Qadın və Gücləndirmə Assosiasiyasının dəstəyi ilə keçirilən “Çağırışın 17 siması” (“17 Faces of Action”) adlı fotosərgiyə həsr olunmuş məqalə dərc olunub.
Nəşrdə sərgi barədə ətraflı məlumat verilib, portretləri nümayiş olunan, Vətənin inkişafına misilsiz töhfələr vermiş, bu və ya digər sahədə uğurlar qazanmış 17 Azərbaycan qadını barədə danışılıb.
“Burada şahmat kraliçası Aynur Sofiyeva kimi məşhur simaların portretləri ilə yanaşı, hekayələri bizə o qədər də tanış olmayan, lakin adları nəsillər üçün yazılmağa eyni dərəcədə layiq olan qadınların tanıdılması tədbirin əsas məqamlarındandır. Məsələn, Xanım Babayevanı götürək. Təcrübəli pambıqçı olan Babayeva 1983-cü ildə kənd təsərrüfatı texnologiyalarını inkişaf etdirdiyinə görə SSRİ Dövlət Mükafatına layiq görülüb. Yaxud həyatı sonsuz insan potensialının və əzmkarlığının sübutu olan, paralimpiyaçı disk atıcısı Solmaz Səfərova...
Azərbaycan qədim zamanlardan xalçaçılığın mərkəzi kimi tanınıb. Xalq yaradıcılığının bu məşhur növü nəsildən-nəslə ötürülüb. Onun ən gənc dəstəkçilərindən biri Sevinc Əliyevadır. Qalereyada 20 yaşlı istedadlı toxucunun fotoşəkli Fatma Səttarovanın portreti ilə maraqlı kontrast yaradır, onlar arasında oxşarlıq da nəzəri cəlb edir. Bu günlərdə Azərbaycan Prezidenti İlham Əliyev Fatma Səttarovanı İkinci Dünya müharibəsində göstərdiyi qəhrəmanlığa görə nüfuzlu “İstiqlal” ordeni ilə təltif edib. Onun hekayəsi, bəlkə də, bu seriyanın ən ümidverici hekayələrindən biridir. Hərbi tibb bacısı, blokadadan sağ çıxan, cəsarətli qəhrəman, iqtisadçı və xilaskar - bu, xalqına sevgisi, dövlətə fədakar xidməti olan qadındır”, - deyə nəşrdə bildirilib.
Resursda layihənin ilk dəfə Azərbaycanda həyata keçirildiyi vurğulanıb və dünyanın daha 16 ölkəsində reallaşdırılacağı qeyd edilib.
