“Tik-Tok”-da aktyor İmran Lalayevin fotosunu paylaşaraq onu qazi kimi təqdim ediblər. Gənc aktyor Moderator.az-a müsahibəsində bu hərəkətin yolverilməz olduğunu deyərək etiraz edib.
- İmran bəy, son günlərim gündəm olan videosu ilə necə tanış oldunuz?
- Mən “Tik-Tok” işlətmirəm və bu platformanı sevmirəm. Ötən gün bir dostum yazdı ki, “sən də qazisən? “Tik-Tok”-da bir videon yayılıb”. Onun göndərdiyi və Tik –Tokda gündəm olan videoya baxanda çox təəccübləndim və bu mənə pis təsir etdi.
Mən 10 il bundan öncə Qatar qəzasında ayaqlarımı itirmişəm. 10 ilə yaxındır ki, bu formada gəzirəm. Məgər hər ayağını, qolunu, itirən qazidir?
- Videonuzun gündəm olduğunu gördükdə hansı hissi yaşadınız?
- Yolda kimisə çəkib sosial şəbəkədə yeləşdirmək kimi hallarla çox rastlaşmışam. İlk növbədə bu düzgün bir hərəkət deyil. Qazi oldum, olmadım kimdənsə icazə alamadan onu çəkib, sosial platformada yerləşdirmək düzgün deyil. Mənim də çağırışım ondan ibarətdir ki, bu cür özbaşınalqıları aradan qaldırmaq lazımdır. Bu cür hərəkətlər psixoloji olaraq da insana təsir edir ki, niyə məni paylaşırsan? Bu cür hallar yol verilməzdir.
-Bu gün qazi adından istifadə edənlər də az deyil.
- Mən buna çox pis baxıram. Əgər qazisənsə vətən uğrunda canınından keçməyə hazır olmusansa çox gözəl, sizə bir ömür boyu minnətdarıq.
Qazilərimizi mənim qədər anlaya biləcək insan yoxdur. Mən o acını yaşamışam. 10 ildir ki, protezlərdən istifadə edirəm, bilirəm ki, onlar nə çəkirlər. Amma bəzi qazilər bundan istifadə edir. “Mən qaziyəm burada dayana bilrəm”, “restoranda hesab ödəməyə bilərəm”, “maşınımın nömrəsini çıxarıb, sürə bilərəm, çünki mən qziyəm” –kimi fikirlər səsləndirən insanlarla rastlaşırıq, bu düzgün deyil. Biz hər zaman onlara borlcuyuq, amma bu hərəkətlər qəbuledilməzdir. Sən kiminsə yaxasından tutub nəsə istəyə bilməzsən.
- İndi etirazınız nəyə və kimədir?
- İndi etirazım qazilərimizin bu hərəkətlərinə deyil, sosial şəbəkədə özbaşına hərəkət edənlərədir. Səsim tək özümə görə deyil. Hər adamın fotosunu çəkib, sosial şəbəkədə yerləşdirmək olmaz. Belə insalardan bir ikisi cəzalansa bu hərəkətlər yığışdırlar. Bu gün onların hədəfinə mən rast gəldim, sabah siz gələrsiniz. Buna yol verməməliyik. Mənim bu halımı çəkib qazi kimi təqdim etmək tərbiyəsizlikdir.
Mənim ayaqlarım olmaya bilər, amma vicdanım hələ də yerindədir.
- Nə üçün şalvar deyil də protezlərinizi göstərən şortiklər geyinirsiniz?
- Dəfələrlə olub şalvar geyinmişəm, ancaq fiziki təzyiqlərə məruz qalmışam. Çünki protezdə ayağım qatdalanmır. Onun üçün oturdurqda ayağımı uzadıram. Şalvar geyinəndə isə protezin olduğu hiss olunmur. İctimai nəqliyyatdan istifadə etdikdə oturub ayaqlarımı uzatmaq məcburiyyətində qalırdım, gəlib məni hörmətsizlikdə günahlandırırdılar. Hətta gəlib ayağıma təpik vuranlar da var idi. Elə bilirdilər ki, ayağımı qəsdən uzatmışam. Protezlə ayaq üstündə durmaq da çətindir. İctimai nəqliyyatda yer istədikdə mənə deyirdilər ki, inşallah ayağınızdakı həqiqi protez olar. Belə hallarla çox rastlaşdıqdan sonra qərar verdim ki, şortik geyinim. Şortik geyinməyə əsas səbəbi də insanların buna öyrəşməsidir.
- Necə öyrəşməsi?
- XXI əsrdə yaşayırıq. Həqiqətən gülməli vəziyyətdir. Hər şeyə öyrəşmişik bircə insanların protezdən istifadə edə bilməsinə öyrəşə bilməmişik. Mən protez geyinməyə məcburam və bundan utanmıram. Protezi kimlərinsə görüb, mənə yazığı gəlsin deyə də istifadə etmirəm. Protez geyinən insanları dilənçi, yardıma ehtiyacı olan insan kimi görmüşük. Onları bu vəziyyətə özümüz düşürmüşük.
Xəyalə Rəis