Əvvəllər onun təqdimatında "Xəzər" televiziyasında gündəmin ən önəmli mövzularını əhatə edən reportajları izləyirdik. Hazırladığı sujetlərə özündən bir parça əlavə edərək işinə sevgi, ürəklə yanaşdığı sezilirdi. İndi isə onu "Xəzər xəbər"in təqdimatında daha çox sevirik. O, xəbər aparıcısı olaraq gündəlik baş verən hadisələri tamaşaçılara çatdırır. Deyir ki, bu gün çıxış etdiyi studiya onun uşaqlıq arzuları olub.
Beləliklə "Xəzər xəbər"-in aparıcısı, jurnalist Ülkər Qasımqızı Moderator.az-ın qonağıdır.
- Aparıcı olmaq bir çox gənclərin demək olar ki, arzusudur. O arzuya gənc yaşda toxunmaq və tamaşaçıları ekran qarşısına klidləmək necə bir hisdir?
- Bakı Dövlət Universitetinin "Filologiya" fakültəsinin məzunuyam. Buna baxmayaraq, illərdir ki, jurnalistika sahəsində çalışıram. Bu sahəyə uşaqlıqdan böyük marağım var idi. Amma arzuma belə yaxın olacağım ağlımın ucundan belə keçməzdi.
- Bəs nə üçün xəbər jurnalistikası?
- Xəbəri mənə sevdirən atam olub. O, evə gələndə biz heç bir verilişə, kinoya, seriala baxa bilməzdik. Ailəlikcə hamımız oturub xəbərlərə baxırdıq. Hətta, deyim ki, eyni xəbəri bütün telekanallardan izləyirdik. Artıq vərdiş halını almışdıq və atam evdə olmayanda da xəbər izləyirdik. Ona görə də heç bir sahədə deyil, sırf xəbər sahəsində işləməyə qərar verdim. Xəbər hazırlamağı, araşdırmağı çox sevirəm. Elə hesab edirəm ki, hazırladığım xəbərlərin hamısı öz övladımdır.
- Səhər verilişindən xəbərə keçid etmək çətin olmadı ki?
- 2017-ci ildən "Xəzər" televiziyasında çalışıram. İlk olaraq səhər proqramında çalışmağa başladım. Daha sonra "Xəzər Səhər"-dən "Xəzər xəbər"-ə keçid etdim. Uzun müddətdir ki, burada fəaliyyət göstərirəm. Bütün sahələrdə sujetlərim, materiallarım var. Mənim üçün janrın fərqi yoxdur, amma sosial sahəni daha çox sevirəm. Hansısa vətəndaşın probleminin həll olunduğunu görəndə məmnun oluram. Çəkdiyim xəbərdəki problemin aidiyyatı qurumlar tərəfindən həll olunması qürurvericidir. Rəhbərliyimiz dəyişəndən, Murad Dadaşov bizə rəhbər təyin ediləndən sonra mənim karyeramda da dəyişikliklər oldu. Ən çox təşəkkürüm "Xəzər" Media Mərkəzi"-nin Baş Direktoru Murad Dadaşova və "Xəzər Xəbər"-in müdiri İnqilab Məmmədovadır. Onların birgə qərarı ilə müxbir kimi addımladığım yolu hazırda aparıcı müxbir olaraq davam edirəm. Düşünürəm ki, bu, rəhbərliyin mənə olan inamı, etibarı, güvənidir. İnqilab müəllim "Biz sənə nə qədər inanırıqsa, sən də özünə o qədər inan və efirə çıx" sözlərini əsla unutmaram. Hər iki rəhbərimə təşəkkür edirəm. İşlədiyim kanal, deportment, kollektivimiz dəyərlidir. "Xəzər xəbər" mənim üçün çox doğma, əzizdir. "Xəzər Xəbər" mənim üçün bir brenddir. Əvəzsiz, reytinqlərdə hər zaman nömrə bir olan brend. Tamaşaçı bizi sevir. Əgər 10 evin 8-də "Xəzər Xəbər"-ə baxılırsa, demək ki, uğurlarımız böyükdür. Demək ki, biz sözümüzü deməyi bacarmışıq. Bu günə qədər böyük marağa səbəb olan sujetlərim olub. Hər bir sujetim mənim fəxrimdir.
- Sizin Qarabağdan hazırladığınız reportajlar böyük marağa səbəb olub. Sizcə, reportajı bu qədər maraqlı edən müxbirdir, yoxsa mövzunun aktuallığı?
- Mən Qarabağlı, torpağı işğaldan azad olunan jurnalistəm. Əslən Laçınlıyam. Qarabağın işğaldan azad olunması xəbərini çatdırmaq mənim üçün fəxr və qürur idi. 30 il idi ki, mən Qarabağı atamın gözü ilə təsəvvür edir, onun danışdığı qədər sevirdim... Nə xoş mənə ki, bir xəbər jurnalisti oldum. 30 il sonra Qarabağa atamdan öncə getdim. Qubadlı, Cəbrayıl, Ağdam, Şuşadan reportajlar hazırladım. O hisləri mənim jurnalistika fəaliyyətimdə heç nə əvəz edə bilməz. Bütün sahələrdən yazmışam, ən maraqlı araşdırmalar etmişəm. Amma Qarabağ xəbərlərini hazırlayanda ora bir parça da özümü əlavə edirdim. Bütün reportajlarımı tamaşaçılar üçün hazırlayıram, amma ən böyük izləyicim qarabağlı, Laçınlı atamdır. Hər reportajımı o qədər böyük həvəslə gözləyir ki...
İllər sonra Füzuli hava limanına bir təyyarə endi, o çəkilişi mən reallaşdırdım. Etiraf edirəm ki, həyəcanım böyük idi. Çəkdiklərimi, o ab-havanı tamaşaçılara olduğu kimi çatdırmalı idim.
Xəyalə Rəis