Pivə kişiləri qadına çevirir? - Alimlər CAVABLANDIRDI

Bizi sosial şəbəkələrdən izləyin:

Alimlər kişilərdə hormon balansının pivə tərəfindən doğrudan da pozulub-pozulmadığına cavab veriblər.

Moderator.az xəbər verir ki, mütəxəssislər pivədə guya qadın hormonlarının olduğu və bunun testosteronun azalmasına və jinekomastiyanın inkişafına gətirib çıxara biləcəyi barədə geniş yayılmış fikirləri şərh ediblər.

Ekspertlər təsdiqləyirlər ki, pivənin tərkibində həqiqətən də fitoestrojenlər — quruluşca estradiola bənzər bitki mənşəli birləşmələr mövcuddur. Ən çox rast gəlinənlər ksantohumol, izoksantohumol və 8-prenilnaringenindir. Lakin onların miqdarı ciddi hormonal dəyişikliklər yaratmaq üçün çox azdır. Hətta fitoestrojenlərlə ən “zəngin” hesab edilən güclü pivələrdə belə bu maddələrin miqdarı bir litr içkidə cəmi onlarla–yüzlərlə mikroqram təşkil edir.

Alimlər ehtimal edirlər ki, az sayda insanda fitoestrojenlər orqanizmdə daha aktiv birləşmələrə çevrilə və hüceyrələrə təsir göstərə bilər. Lakin onların libidonun azalmasına, ereksiya problemlərinə yaxud döş vəzilərinin böyüməsinə səbəb olduğuna dair dəqiq və etibarlı məlumat yoxdur.

Bunun əvəzində alkoqolun hormonlara təsiri çox güclü şəkildə sübut olunub. Minlərlə kişi üzərində aparılan müşahidələr göstərir ki, spirtli içkilərin müntəzəm qəbulu, içkinin növündən asılı olmayaraq, testosteron səviyyəsini azaldır və estradiol səviyyəsini artırır. Tədqiqatlara görə, həftədə yeddi standart porsiyadan artıq spirtli içki içmək hormon balansını nəzərəçarpacaq dərəcədə “qadın tipi” istiqamətinə dəyişir.

Bundan başqa, həddindən artıq spirt qəbulu erektil disfunksiya riskinin artması, həmçinin qaraciyər və böyrək xəstəliklərinin inkişafı ilə əlaqələndirilir. Bu xəstəliklər özləri də jinekomastiyaya səbəb ola bilər.

Mütəxəssislər belə nəticəyə gəlirlər: pivədəki fitoestrojenlər kişi hormonlarına zərər verəcək qədər güclü deyil, əsas təhlükə isə etanoldur. Sağlamlığından narahat olanlara alkoqolsuz pivəyə üstünlük vermək yaxud ən azı güclü və spirtli içkilərin qəbulunu məhdudlaşdırmaq tövsiyə olunur. /Lent.az/