Ana it huşsuz balasını baytarlıq klinikasına gətirdi

Bizi sosial şəbəkələrdən izləyin:

"Bu, bir ananın öz balalarına olan sevgisinin göstəricisidir..."

Türkiyədə bir baytarlıq klinikası ağzında huşsuz balasını gətirərək qapıda qoyan və sanki kömək istəyən evsiz bir it haqqında ürəkağrıdıcı hekayə paylaşıb.

Moderator.az xəbər verir ki, bu barədə "Oddity Central" nəşri məlumat yayıb.

Nəşr yazır ki, əgər müşahidə kameralarının çəkdiyi viral video olmasaydı, çox güman ki, bu hekayəni əksər insanlar uydurma hesab edərdilər.

Türkiyənin İstanbul vilayətində yerləşən Adnan Kahveçi rayonundakı baytarlıq klinikası yanvarın 13-də inanılmaz bir hadisə yaşayıb. Həmin gün heyvansevər bir şəxs küçədə tək sağ qalan bir bala taparaq onu klinikaya gətirib.

Həkimlər balaya kömək etməyə tələsdikləri anda ana it daha bir huşsuz balası ilə klinikanın qapısında peyda olub. Klinikadakı texnik ümidini itirmiş heyvanı və onun balasını görüb dərhal onlara yardım edib. Hər iki bala bədən temperaturunun həddən artıq düşməsi və çox zəif nəbzə görə ağır vəziyyətdə olub.

Klinikanın müşahidə kameraları isə diqqətli ana itin baytarları diqqətlə izlədiyini və balasına edilən yardımı narahatlıqla izlədiyini qeydə alıb. Xoşbəxtlikdən, doktor Baturalp Oğan və komandası balanı xilas edə bilib, hazırda isə bütün ailə klinikada sağalmaqdadır.

"Hazırda vəziyyət yaxşıdır. Bala və onun qardaşının müalicəsi bir müddət davam edəcək. Hazırda sağlamlıq vəziyyətlərinə görə ziyarətçiləri qəbul etmirik,"- doktor Oğan bildirib.

"Ana it də sağalmaqdadır. Onun hekayəsi çoxlarını maraqlandır. Çox ağıllı və qayğıkeş bir itdir. Bu, bir ananın balalarına olan sevgisinin göstəricisidir."

Görünür ki, ana itin südü bütün balaları bəsləməyə kifayət etməyib, buna görə bəzi balalar təəssüf ki, ölüb. Klinika sağ qalan iki bala üçün süd qarışıqları ilə əlavə qidalanma təmin edir.

Ana itin fədakar davranışı ilə bağlı video internetdə yayıldıqdan sonra klinikaya heyvansevərlərdən çoxlu sayda zəng daxil olub. İndi klinika ümid edir ki, bütün ailə üçün daimi və qayğıkeş bir ev tapılacaq.