Arvadını təhqir edən qonşusunu qaynı ilə birgə döyən şəxsə hökm oxundu

Bizi sosial şəbəkələrdən izləyin:

Sumqayıt Şəhər Məhkəməsində xuliqanlıqda təqsirləndirilən İsrafil Əsədov və onun qaynı Tağı Rəsulovun (hər ikisinin adı, soyadı şərtidir) cinayət işi üzrə məhkəmə istintaqı yekunlaşıb.

Moderator.az Pravda.az-a istinadən xəbər verir ki, hakim Günel İsmayılovanın sədrliyi ilə keçirilən prosesdə hökm oxunub.

Məhkəmənin hökmü ilə İsrafil Əsədov Cinayət Məcəlləsinin 128-ci maddəsi ilə təqsirli bilinib. Lakin Cinayət Məcəlləsinin 75.1.1-ci maddəsinin tələblərinə əsasən cinayət məsuliyyətinə cəlbetmə müddəti keçdiyindən ona cəza təyin edilməyib. Eyni zamanda İsrafil Əsədov barəsində seçilmiş başqa yerə getməmək barədə iltizam qətimkan tədbiri ləğv edilib.

Zərərçəkmiş şəxsə qarşı vurulmuş mənəvi ziyana görə 7 000 manat məbləğində pul vəsaitinin, həmçinin ödənilmiş 90 manat məbləğində xərclərin tutulması barədə qaldırılmış mülki iddia baxılmamış saxlanılıb. Mülki iddia üzrə ödənilmiş 90 manat dövlət rüsumunun zərərçəkmiş şəxsə geri qaytarılması qərara alınıb.

İttiham aktına görə, hadisə 26 noyabr 2022-ci il tarixdə saat 11 radələrində Sumqayıt şəhərində yerləşən idman klublarından birinin qarşısında qeydə alınıb.

Belə ki, zərərçəkmiş Namiq Hətəmov (adı, soyadı şərtidir) qonşusu İsrafil Əsədovun arvadı ilə mübahisə edib. İsrafil zərərçəkmiş tərəfindən qadının ünvanına səsləndirilmiş təhqiri bəhanə gətirərək ona irad bildirib, heç bir əsaslı səbəb olmadan ictimai qaydanı kobud surətdə pozan, cəmiyyətə açıq-aşkar hörmətsizlik nümayiş etdirən və zor tətbiqi ilə müşayiət olunan qərəzli hərəkətlər törədib.

Belə ki, İsrafil qaynı Tağı ilə birlikdə bir qrup şəxs halında zərərçəkmiş şəxsin bədəninin müxtəlif nahiyələrinə əlləri və ayaqları ilə çoxsaylı zərbələr endirib. Nəticədə Namiqin sağlamlığın qısa müddətə pozulmasına səbəb olan qəsdən sağlamlığa yüngül zərər yetirilib.