Lütvəli Babayevin oğlu ilə bağlı prosesdə gərginlik: "Ailə qura bilmirəm"

Bizi sosial şəbəkələrdən izləyin:

Zərdab və Mingəçevirin icra başçısı işləmiş Lütvəli Babayevin biznesmen oğlu Babəli Babazadə məhkəmədə ifadə verib.

Moderator.az "Qafqazinfo"ya istinadla xəbər verir ki, eks-icra başçısının oğlu hakim qarşısına zərərçəkmiş qismində çıxıb.

Söhbət Babəli Babazadənin 2 milyonluq əmlakını dələduzluqla ələ keçirməkdə ittiham olunan "Uniklinika"nın baş həkimi Aruz Əliyev və onun dostu Ehtiram Kərimovun cinayət işindən gedir.

İttihama görə, Babəlinin bir milyon manat vergi borcu olub. Aruzla Ehtiram da ona ölkədən qaçmağı məsləhət görüblər. Daha sonra təqsirləndirilənlər Babəlinin Türkiyəyə qaçmasını təşkil ediblər. Bundan sonra Babəlinin onlara etibarnamə əsasında idarə etmə hüququ verdiyi ev və başqa əmlakını satıb pulunu ələ keçiriblər.

Amma təqsirləndirilən şəxslər ittihamı qəbul etmirlər. Deyirlər ki, əmlaklar keçmiş icra başçısının oğlunun istəyi ilə satılıb, pullar öz işlərinə xərclənib.

Fotoda: Lütvəli Babayev

Bakı Ağır Cinayətlər Məhkəməsində keçirilən budəfəki iclasda Babəli Babazadə ifadə verib. O, şüşə qəfəsdə əyləşən hər iki müttəhimin onun başına oyun açdığını deyib:

"Məlum olduğu kimi mənim vergi borcum var idi. Bu məsələ ilə bağlı Aruzla tez-tez görüşürdüm. Sonra elə oldu ki, məni Türkiyəyə göndərməsinə razılaşdıq. Dedi ki, Ehtiram gələcək əmlakları idarə etmək üçün ona etibarnamə ver. Sonra bildim ki, hər iki əmlak satılıb.

Azərbaycanda qeyd edilənləri araşdırdım. Dedim ki, heç olmasa evimi geri qaytarın. 600 minlik evim Aruzun adında idi. Ev yoxdur. Gah dedi ki, 900 min manat vergiyə vermişəm, gah dedi ki, nişana vermişəm. Ortada heç bir sübut yoxdur. Soruşuram ki, obyekti hansı notariusda alqı-satqı etdirmisən? Demir. Yaxşı, 570 min manat hanı? Xahiş edirəm, pulu kimə verib desin. Bilmək istəyirəm, iki milyon manat kimə və ya hara verilib?"

Zərərçəkmişin dedikləri təqsirləndirilən Ehtiram Kərimovu özündən çıxarıb:

"Düz danış, kəfənini əyninə geyinib gəlmişdin. Səni pis vəziyyətdən çıxardıq. Sənə etdiklərim gözündən gəlsin. Tüfeyli kimi hotellərdə qalmışdın. Bir ildir, mən burada girovam".

Fotoda: Aruz Əliyev