Azərbaycanda qadından bacılarına qarşı iddia: "Qızıma deyiblər anan pozğundur"

Bizi sosial şəbəkələrdən izləyin:

Lənkəranda üç qadın xüsusi ittiham qaydasında rayon məhkəməsinə müraciət edib.

Moderator.az Publika.az-a istinadla xəbər verir ki, şikayətçi qadınlar 1983-cü il təvəllüdlü Gülbəniz Quliyevanın (ad şərtidir) "TikTok" sosial şəbəkəsində onları təhqir etdiyini, barələrində həqiqətə uyğun olmayan məlumatlar yaydığını bildiriblər.

Məlum olub ki, şikayətçi qadınlardan ikisi Gülbənizin bacısı, biri isə Gülbənizin bacısının qayınanasıdır. Onlar Gülbənizin nevroloji problemlərinin olduğunu, sosial şəbəkələrdə şər-böhtan xarakterli sözlər danışdığını və həbs edilməsinin vacibliyini bildiriblər.

Araşdırmalar zamanı məlum olub ki, bacılar arasında münasibətlər bir neçə ildir pisləşib. Gülbəniz atası evində, digər bacılar isə öz ailələri ilə birgə yaşayırlar.

G.Quliyeva ifadəsində bacısının onun həyatını məhv etdiyini, cinsi təcavüzə məruz qoyduğunu iddia edib:

"Əksinə, ittihamçılar mənə qarşı qanunsuz hərəkətlər ediblər, kənddə mənim üzümə tüpürdülər, qızıma deyiblər ki, anan pozğundur. Səkkiz dəfə buna görə "102" xidmətinə zəng də etmişəm, lakin nəticəsi olmayıb. Haqsızlıqlar barədə "TikTok" sosial şəbəkəsində paylaşım etdim.

İş o dərəcəyə çatdı ki, işlədiyim "Düşbərə" restoranın müdiriyyəti məni işdən çıxardı. Bacım Sevər (şərti ad) mənim uşağımı vurduğuna görə onun qayınanasına şikayət etmişəm. Sərvət adlı həyat yoldaşım vardı. Digər bacım Səhanə (şərti ad) onunla münasibət qurub sevgili oldu, onları yataqda tutmuşam. Buna görə də Sərvətdən boşandım. Bacım Sevər məni Zaur adlı şəxsə ərə vermək istəyirdi. Buna görə də Sevər məni Bakı şəhərində, metronun "Neftçilər" stansiyasının yanındakı əxlaqsızlıq yuvasına apardı. Zaur məni orada zorladı. Bundan əvvəl isə həb verib məni yatırdıblar".

G.Quliyevaya Zaurla bağlı iddiasına görə sual verildikdə, o, həmin şəxsdən polisə şikayət etmədiyini bildirib.

Lənkəran Rayon Məhkəməsi araşdırmalardan sonra 26 noyabr tarixində Gülbəniz Quliyevaya hökm elan edib.

O, Cinayət Məcəlləsinin 147.1-ci maddəsi (böhtan) ilə təqsirli bilinərək 1300 manat cərimə cəzasına məhkum edilib.