Bakı Ağır Cinayətlər Məhkəməsində ötən gün “Azər-Ross” MTK-nın ofisində törədilən dəhşətli qətldə və dələduzluqda ittiham olunan Hümbət Məmmədov, Tofiq Bəkirov, Fərman Hacıyev, Sahil Şamilov və Şamil Şamilovun cinayət işi üzrə məhkəmə prosesi keçirildi. İttihama görə, 2011-ci il iyulun 11-də, saat 13 radələrində paytaxtın Nərimanov rayonu ərazisində yerləşən “Azər-Ross” mənzil-tikinti kooperativində qurumun təsisçisi Əflatun Piriyev odlu silahdan açılan atəşlə qətlə yetirilib, baş mühasib Əmiraslan Əhmədov ağır yaralanıb. İstintaq araşdırmaları zamanı cinayət işi üzrə dələduzluq faktları da üzə çıxıb. Məlum olub ki, şirkətin rəhbər şəxsləri - H. Məmmədov və F. Hacıyev vətəndaşları aldadıb bir mənzili bir neçə nəfərə satmaqla dələduzluq ediblər. Cinayət işi üzrə dələduzluqla üzləşən 26 vətəndaş zərərçəkən qismində tanınıb. Zərərçəkən 24 nəfərdən 1 milyon 777 min manat pul alınıb və onların heç birinə mənzil verilməyib.
Hakim Eldar Mikayılovun sədrliyi ilə keçirilən prosesdə təqsirləndirilən Vüsal Qurbanov son söz dedi. O, törətdiyi cinayət əməlinə görə peşman olduğunu bildirdi. Vüsal Qurbanov cinayəti törədəndən sonra hüquq-mühafizə orqanlarına təslim olması və gənc olduğunun nəzərə alınmasını xahiş etdi: “Bu hadisə istəmədən baş verib. Buna görə də özümüzü günahkar bilirik. Bu işdə Şamilov qardaşlarının heç bir günahı yoxdur”.
Daha sonra digər təqsirləndirilən şəxs - Sahil Şamilova söz verildi. O, çıxışa hazır olmadığını və hazırlaşmaq üçün hakimlərdən bir həftə müddətinə vaxt istədi. Əvvəlcə məhkəmə bunun mümkünsüz olduğunu söylədi. Bildirdi ki, çıxış üçün kifayət qədər vaxtları olub. Ancaq Sahil Şamilov çıxış edə bilməyəcəyini dedi. Hümbət Məmmədovun vəkili Ramiz Zeynalov da onlara dəstək oldu və qeyd etdi ki, bir həftə vaxt verilsin: “Son sözləridir, imkan verin hazırlaşsınlar”.
Ramiz Zeynalov sonra məhkəmədən reportaj hazırlayan jurnalistləri də təhqir etdi: “Jurnalistlər ağızlarına gələnləri yazırlar. Guya Hümbət Məmmədovun mülki var və bunu gizlədir. Niyə oxumursunuz?”.
Məhkəmə prosesi 28 iyun saat 15-ə təyin olundu.
Zərərçəkən tərəf buna etiraz etdi. Piriyevlərin vəkili Aslan İsmayılov bizimlə söhbətində bildirdi ki, məhkəmənin yubadılması dediklərini təsdiqləyir: “Bu bir daha göstərdi ki, məhkəmə Hümbət Məmmədovun lehinə işləyir. Halbuki, məhkəmə iki-üç ay öncə bitə bilərdi. Prosesin həftədə bir dəfə olması, təyin edilən vaxtdan gec başlaması dediklərimizi sübut edir. Bir az məhkəmə proseslərindən xəbəri olanlar bilirlər ki, 7 müttəhim 1 aydan artıq çıxış edə bilməzlər. Bilərəkdən proses yubadılır. Paralel olaraq Hümbət Məmmədov və onun vəkili faktiki prosesi istədiyi kimi aparırlar. Məhz onlar hər gün zərərçəkən tərəfi, jurnalistləri təhqir edirlər və məhkəmə buna qarşı heç bir tədbir görmür. Onların məqsədi prosesi qarışdırmaq və Hümbət Məmmədova təyin ediləcək cəzanı qanunsuz yollarla yüngülləşdirməkdir. Buna görə onlar müttəhimlər və onların qohumları vasitəsilə zərərçəkən tərəfi münaqişəyə cəlb etmək üçün təhqirlər yağdırırlar. Bunun qan tökülməsi ilə nəticələnəcəyini istisna etmirəm. Hələ ki, ancaq zərərçəkənlərin təmkini nəticəsində bu baş verməyib. Mən özüm gördüyünüz kimi münaqişədən qaçmaq üçün hamı məhkəmə zalına girdikdən sonra zala daxil oluram. Bu günki prosesdən sonra bayırda müttəhimlərin qohumları açıq təhdidə keçdilər. Gələn məhkəmə prosesində qarışıqlıq olacağını istisna etmirəm. Buna qarşı ciddi tədbir görülməlidir. Sanki məhkəmə özü qarışıqlıq olmasında maraqlıdır. Məhkəmə öz məsuliyyətini dərk etməlidir. Bu cür biabırçılıq olmaz”.
Haşiyəyə çıxaraq qeyd edək ki, biz “Azadlıq”qəzeti olaraq ilk gündən prosesdə bitərəf olmuşuq. Kiminsə tərəfini saxlamamışıq. Buna Hümbət Məmmədovun o vaxt vəkili olan Alov Səfərliyevin təcridxanadan gətirdiyi məktubu misal göstərə bilərik. Qeyd edək ki, “Azadlıq”da iki nömrə (hər dəfə də bir səhifə-red.) Hümbət Məmmədovun olayla bağlı mövqeyini dərc etmişik. Qərəzimiz olsaydı, qarşı tərəfə cavab haqqı tanımazdıq. Bundan başqa bizim yazdıqlarımız məhkəmədə gördüklərimizdir. Hər hansı bir şərh və əlavələr olmur.
O ki qaldı Hümbət Məmmədovun mülklərinin gizlədilməsiylə bağlı yazdıqlarımıza, bu barədə onu deyə bilərik ki, yazılanlar zərəçəkən tərəfin nümayəndəsi və vəkilinin dedikləridir. Onlar bildirirlər ki, iki ildir həbs olunan Hümbət Məmmədova məhkəmənin hökm oxumaması, həftədə bir dəfə prosesin keçirilməsi, bir sözlə yubadılması birbaşa Hümbət Məmmədova xidmət edir və bu onun sifarişidir.
Biz bir daha qeyd edirik ki, məhkəmədə təqsirləndirlən şəxslərə qarşı heç bir qərəzimiz yoxdur və vəkilin digər müttəhimlərə üzünü tutaraq “barənizdə uydurma yazırlar” deməsi həqiqəti əks etdirmir. İndiyə qədər Hümbət Məmmədovdan başqa heş bir təqsirləndirlən şəxs haqda yazmamışıq. Sadəcə son sözlərinə qəzetdə yer ayırmışıq və bu da məhkəmədən reportaj hazırlayan jurnalistin işidir. Ancaq biz digər təqsirləndirilən şəxslər barəsində heç bir yalan məlumat yazmamışıq.
