Milli ordunun sabiq zabiti, hazırda 2 saylı cəzaçəkmə müəssisəsində həbsdə olan Renat Yusifov prezidentə məktubla müraciət edib. Surəti redaksiyamıza daxil olan məktubda R.Yusifov həbsinin səbəblərindən yazır:
“Mən “N” saylı hərbi hissənin maliyyə şöbəsinin rəisi olmuşam. Jurnalist, tənqidçi və müxalifətçi deyiləm. Bütün seçkilərdə sizə və sizin rəhmətlik atanıza səs vermişəm. Həbsdə olduğum illər ərzində işimə ədalətlə baxılacağı ümidi ilə ən müxtəlif dövlət orqanlarına çoxsaylı müraciətlər etmişəm, amma qudurmuş məmurlardan ədalət görməmişəm. Bu səbəbdən də sizə mətbuat vasitəsi ilə müraciət edib Müdafiə Nazirliyində (MN) baş verən qanunsuzluqlar və ədalətsizliklər haqda məlumat vermək məcburiyyətindəyəm. Sizdən kömək istəyirəm”.
R.Yusifov yazır ki, 2009-cu ilin avqustunda yuxarılardan verilən göstərişlə Müdafiə Nazirliyi Maliyyə və Büdcə İdarəsinin (MBİ) rəis əvəzi polkovnik-leytenant Elçin Mehdiyev Şəmkir korpusuna daxil olan 5 hərbi hissədə maliyyə durumunun təftiş edilməsi əmrini verib: “Elçin Mehdiyev 3 hərbi hissəyə MBİ-in təftiş və nəzarət şöbəsinin inspektorları polkovnik-leytenantlar Rafiq Əzimov, Murad Allahverdiyev və mayor Sadıx Sadıxovu, digər 2-nə isə Şəmkir korpusunun maliyyə xidmətinin rəisi Elşən Əsgərova və Emil Mustafayevə tapşırdı. Adətən MN-i hərbi hissələrdə köhnə klassik sxemlə maliyyə təftişi aparır ”“ ildə 1 dəfə təftişçi ötən təftişdən sonrakı maliyyə vəziyyətini təftiş edir. Müəyyən olunan büdcə oğurluqlarının 25-30 faizini götürəndən sonra təftiş müddətində “hər şey qaydasında olması” haqda “təmiz akt” tərtib edir. 2009-cu ilin avqustunda keçirilən təftişdən sonra isə bizlərə elan olundu ki, Elçin Mehdiyev büdcədən oğurlanmış vəsaitlərin MN İşlər İdarəsinin hesabına köçürülməsini tələb edir. Burada Elçin Mehdiyevin şəxsiyyəti ilə bağlı bir neçə məqamı nəzərinizə çatdırmağı vacib sayıram ”“ o, 1995-ci ildə Yaroslavl Hərbi Maliyyə məktəbini bitirdikdən sonra MN-in Baş Qərargahında maliyyə hissə rəisi, sonra isə MBİ-də inspektor, baş inspektor vəzifələrində çalışıb. 2008-ci ilin sentyabrında həmin idarənin rəisinin müavini, 2009-cu ilin iyununda isə həmin idarənin rəis əvəzi təyin olunub”.
R.Yusifov yazır ki, E.Mehdiyevin xidməti yüksəlişini izləmək üçün onun xidmət siyahısına ötəri baxmaq kifayət edir:
“Elçin Mehdiyev MBİ-də xüsusi təsir imkanlarına malik baş mühasib Səkinə İsmayılovanın nəzəri-diqqəti sayəsində belə tezliklə vəzifə ala bilib. Mehdiyev də, İsmayılova da qubadandırlar. Bu qadını o, “mamoçka” adlandırır. İsmayılova müdafiə naziri Səfər Əbiyevə yaxınlığı ilə seçilən kadrlardandır. MBİ-yə rəis müavini təyin olunandan sonra Elçin Mehdiyev özünəməxsus şəkildə illərlə dəyişməyən iş sxemlərinə korrektələr etdi. Məsələn, hər hansı bir hərbi hissədə özünə sərf etməyən maliyyə rəisi olurdusa, ora təftişçi göndərirdi. Mehdiyevin xasiyyətini nəzərə alanda isə belə maliyyə rəisləri çox idi. Təftişçi yoxlama aparır, maliyyə oğurluqlarını üzə çıxarırdı. Bundan sonra həmin maliyyə rəisinə oğurlanmış vəsaitləri büdcəyə qaytarmaq əmr olunurdu. Elçin Mehdiyev büdcə deyəndə MN İşlər İdarəsini nəzərdə tuturdu. Orada isə qeyd etdiyim kimi Səkinə xanım “ev sahibliyi” edir. Maliyyə rəisinə “pulu qaytar” əmri verəndən sonra təbii ki o, panik şəkildə vəziyyətdən çıxmaq yollarını axtramağa başlayırdı. Adamlarını Elçin Mehdiyevin hüzuruna göndərirdi. Əvvəlcə həmin şəxsləri yaxına buraxmayan Mehdiyev sonradan oğurlanmış pulun 40-50 faizini büdcəyə qaytarmağa icazə veriridi. Üstəlik, oğurlanmış məbləğun 20-25 faizini təftişçi vasitəsi ilə alırdı. Bundan sonra maliyyə-qeydiyyat sənədləri “təmiz” sənədlərlə əvəzlənirdi. Qanunsuz silnən məbləğ isə qalıq kimi göstərilməklə güya dövlətə qaytarıldığı qeyd edilirdi. Məsələn, Elçin Mehdiyevin göstərişi ilə 379 saylı hərbi hissədə də yoxlama məhz bu sxemlə aprılıb. Orada
yoxlama aparan təftişçi Sadıx Sadıxov olub”
Həbsdə olan zabit E.Mehdiyevin özünə yaxın maliyyə rəislərinin milyonluq oğurluqlarını ört-basdır etdiyini də yazır: “2009-cu ildə həmin Sadıx Sadıxovu maliyyə vəziyyətini yoxlamaq üçün Heydər Əliyev adına Ali Hərbi Məktəbə yolladı. Orada maliyyə rəisi Mehdiyevin tanışı Anar Nəzərovdur. Təftiş zamanı məktəbdə milyonluq oğurluq müəyyən olunub. Amma heç bir tədbir görülməyib. Sual ortaya çıxa bilər ki, niyə Elçin Mehdiyev büdcə oğurluqlarının bu cür canfəşanlıqla üzə çıxarılmasına çalışır? Cavab çox sadədir ”“ bu və ya digər təşkilatın büdcəsindən vəsaitlərin yayındırılması müəyyən olunursa qanuna görə həmin vəsait elə həmin təşkilatın hesabına geri qaytarılmalıdır. Elçin Mehdiyev isə pulları hərbi hissələrin hesabına deyil, “mamoçka”nın işlədiyi MBİ-nin hesabına köçürülməsini tələb edirdi. Oradan isə heç bir yerdə qeydiyyata alınmayan, heç bir smeta sənədlərində əks olmayan pullar Mehdiyevlə İsmayılovanın sərəncamına keçir”.
Məktub müəllifi qeyd edir ki, 2009-cu ildə 5 hərbi hissədə yoxlama aparılandan sonra E.Mehdiyev 2 hərbi hissənin maliyyə rəisindən büdcədən oğurlanmış pulların 25 faizinin ona verilməsini tələb edib. Tələb yerinə yetirilib. Digər 3 hərbi hissənin maliyyə rəislərindən oğurlanmış pulları bütünlüklə MBİ-yə verilməsini tələb edib: “Mehdiyevin xüsusi tapşırığına əsasən Şəmkir korpusunun maliyyə rəisi Elşən Əsgərov 777 saylı hərbi hissədə büdcədən yayındırılan 800 min manatı geri ödəmək məcburiyyətində qaldı. Əsgərov həmin vaxt korpus komandiri olan Çingiz Şəfiyevə təftiş haqda “təmiz” akt təqdim etdi”.
Məktub müəllifi qeyd edir ki, E.Mehdiyev də, Ç.Şəfiyev də şərti olaraq MN-dəki Quba qruplaşması adlanan qruplaşmaya daxildirlər: “Elçin Mehdiyevin belə desək ədalətsizliyi Çingiz Şəfiyevlə onun arasında mübahisələrin yaranmasına səbəb oldu. 2 ay müddətində kompromat davaları aparıldı, arada nəticəsiz danışıqları da oldu. Və nəhayətdə oğurluq faktları ilə bağlı cinayət işi başlandı. Cinayət işlərində 707 saylı hərbi hissədə 979 min manat, 812 saylı hərbi hissədə isə 1 milyon 150 min manatın oğurlanması qeyd olunurdu. Rəhbərliyi altında olan hərbi hissələrdə böyük büdcə oğurluqlarının müəyyən edilməsi və cinayət işinin başlanması Çingiz Şəfiyevi həddən artıq qəzəbləndirdi. O, Mehdiyevdən bunun əvəzini çıxmaq üçün 777 saylı hərbi hissədə maliyyə vəziyyətinin yenidən yoxlanmasını əmr etdi. Qeyd edim ki, 2009-ci ilin əvvəllərində Elçin Mehdiyev MBİ rəisinin müavini olarkən həmin hərbi hissədə 400 min manatlıq oğurluq müəyyən olunmuşdu. Mehdiyevin “xeyir-dua”sı ilə həmin oğurluq ört-basdır edilmişdi. Çingiz Şəfiyev 171 saylı hərbi hissənin büdcəsindən oğurlanmış 459 min manatla bağlı da cinayət işinin başlanmasına nail oldu. Büdcədən yayındırılması təftiş zamanı üzə çıxandan sonra həmin pullar Mehdiyevin “mamoçka” adlandırdığı Səkinə İsmayılovaya ödənmişdi. Beləliklə, 2009-cu ilin sonlarında Şəmkir korpusuna daxil olan 5 hərbi hissənin maliyyə rəisi barəsində cinayət işi başlandı. Onlardan mən də daxil olmaqla 4 nəfəri həbs olundu. Azərbaycan Hərbi Prokurorluğu faktlarla bağlı araşdırmalara başladı”.
Məktub müəllifi məktublarının davamının olacağını da qeyd edib.
