Səhvən başqasının kartına pul göndərəndə nə etmək lazımdır?– İqtisadçı şərh etdi

Bəzən bilmədən başqasının kartına pul göndəririk. Kiçik bir səhv nəticəsində belə hallar baş verə bilər və bu, həm maliyyə, həm də hüquqi problemlərə yol aça bilər. Belə vəziyyətlərdə itkinizi minimuma endirmək və hüquqlarınızı qorumaq üçün hansı addımları atmağın lazım olduğunu bilmək vacibdir. 

“Vətəndaş istifadə etdiyi xidmətin növündən asılı olaraq, yəni onlayn və yaxud da oflayn xidmətlərdən istifadə edib xidməti təmin edən şirkətə müvafiq ödənişin həyata keçirilməsi ilə əlaqədar səhvliyi təqdim edir və həmin ödənişin yenidən balansa qaytarılması tələbini irəli sürür. Əgər ödəniş terminallarından həyata keçirilibsə, ödəniş terminalları xidmətləri göstərilən şirkətlərə onların üzərində qeyd olunan nömrələrə müraciət etməklə  və yaxud da  terminalın təqdim etdiyi digər xidmətlərdən istifadə etməklə müraciəti yönləndirə bilərlər. Əgər əməliyyat bankların təqdim etdiyi rəqəmsal bankçılıq xidmətləri və ya müvafiq mobil tətbiqlər vasitəsilə həyata keçirilibsə, tətbiqlərdə təklif olunan avtomatlaşdırılmış botlar vasitəsilə problemlərini çatdıraraq ödənişin geri qaytarılmasını tələb edə bilərlər. Hər hansı bir anlaşılmazlıq olduğu təqdirdə müvafiq banklara, bankların  qaynar xətlərinə müraciət edərək ödənişin geri qaytarılması tələbini əsaslandırılmış formada  təqdim edə bilərlər. Əgər bu mərhələdə problem həllini tapmırsa, artıq müraciət mülki məsələ olaraq məhkəmələrə yönləndirilir. Məhkəmələrə müraciət etməklə vətəndaşlar onlar tərəfindən texniki səbəbdən səhvlik olaraq başqasına ödənilmiş vəsaitin geri qaytarılması iddiası ilə tələb irəli sürə bilərlər və bunlar sübut olunduğu halda, əksər hallarda vəsait vətəndaşa geri qaytarılır”.