Özəl pensiya fondları nələri dəyişəcək?

Bizi sosial şəbəkələrdən izləyin:

Azərbaycanda özəl pensiya fondlarının yaradılmasına başlanılacaq.

Bu barədə Dövlət Sosial Müdafiə Fondundan bildirilib.

Qeyd edilib ki, “Qeyri-dövlət pensiya fondları haqqında” Qanun layihəsi hazırlanıb və razılaşdırılması üçün aidiyəti qurumlara təqdim olunub.

Müvafiq qurumlarla müzakirələrin nəticəsində özəl pensiya fondlarının fəaliyyətinin hüquqi, iqtisadi və maliyyə əsaslarının formalaşdırılması, həmin fondların fəaliyyətinə nəzarət mexanizmlərinin müəyyənləşdirilməsi məqsədilə layihənin təkmilləşdirilməsi üçün aidiyyəti qurumların nümayəndələri ilə birlikdə iş aparılır.

Bəs özəl pensiya fondları nələri dəyişəcək?

Bu barədə Moderator.az- a danışan iqtisadçı Fuad İbrahimov bildirib ki, Sovetlər Birliyindən sonra MDB ərazisindəki istər pensiya, istərsə də maaş sistemində bu günə qədər istehlak səbətinin real gündəminə cavab verən bir tam mühit formalaşdırıla bilmir:

“Əksər əhalinin çox hissəsi minimum əmək haqqı səviyyəsinə uyğun pensiya alır. Bu nöqteyi nəzərdən özəl fondların yaradılması çətin olacaq. Özəl pensiya modeli çərçivəsində vətəndaşların pensiya ödənişlərinin bir hissəsi xüsusi olaraq yaradılmış özəl pensiya fondlarına yönləndirilir. Bu fondlar yığım kapitalı prinsipi ilə fəaliyyət göstərir, yəni fondlara yatırılan vəsaitlər müxtəlif investisiya alətləri vasitəsilə dövriyyəyə buraxılır. Bunun nəticəsində yığılan pullar əlavə gəlir əldə edir və pensiya yığımının ümumi məbləği artır. Gəlirlərin bir hissəsi yığımın məsəsələn, 50 faizi gələcəkdə pensiya yaşına çatdıqda vətəndaş özü kapitalı götürərək hansısa bir biznes mühitinin, sahibkarlıq fəaliyyətinin istifadəsində yararlana biləcəkdir. Əhalinin böyük hissəsi, vətəndaş pensiya yaşına çatmırsa, dünyasını dəyişirsə, pensiyanın öz ailəsinə çatdırılmasının tərəfdarıdıdır. Bu göstərici ən optimal variantlardandır və eyni zamanda da əhalinin ən çox istədiyi bir göstəricidir”.

İqtisadçı bildirib ki, özəl pensiya fondlarının yaradılmasına və vətəndaşlara xidmət etməsinə ümid edirik:

“Özəl pensiya fondunun yaradılması günün tələbini əhatə edən bir modeldir və çoxdan tətbiq olunmalı idi. Özəl fondların yaradılması risklərini nəzərə alsaq, kapital itkisinə yol verilməməsi üçün hökumət tərəfindən yığım hissəsinin sığortalanması da baş verərsə, insanların pensiya fondu sisteminə inamını artıracaq. Bu yığımların səmərəliliyinə şərait yaradacaq. Beləliklə də, iqtisadiyyatın ən vacib olan hissəsi olan pensiya fondu təkmilləşdiriləcək”.

Mehin Mehmanqızı