Azərbaycan Premyer Liqasında XIV tura yekun vuruldu

Bizi sosial şəbəkələrdən izləyin:

Futbol üzrə Azərbaycan Premyer Liqasında XIV tura yekun vurulub.

Turun bağlanış oyununda "Sumqayıt" doğma meydanda "Şamaxı"nı qəbul edib.

Meydan sahiblərinin 2:1 hesabı ilə qələbə qazandığı matçda hesabı qonaqlar açıb. 26-cı dəqiqədə Leroy Mikels fərqlənib. Bununla belə, fasilə ərəfəsində "gənclik şəhəri" təmsilçisi "status-kvo"nu bərpa edə bilib. Cordan Rezabala 45+1-ci dəqiqədə adını tabloya yazdırıb. Qarşılaşmada yekun nəticəni isə Rövlan Muradov müəyyənləşdirib. 78-ci dəqiqədə penalti zərbəsini dəqiq yerinə yetirən futbolçu komandasına 3 xal qazandırıb.

Bu nəticənin ardından Vaqif Cavadovun rəhbərlik etdiyi "Sumqayıt" 16 xalla altıncı sırada qərarlaşıb. "Şamaxı" isə 13 xalla yeddincidir.

Qeyd edək ki, turun əvvəlki oyunlarında "Araz-Naxçıvan" "Kəpəz"i 2:0, "Qarabağ" "Səbail"i 3:0, "Neftçi" isə "Zirə"ni 2:1 hesabı ilə məğlub edib. "Turan Tovuz" - "Sabah" görüşü heç-heçə başa çatıb - 1:1.

19:24

"Turan Tovuz" Azərbaycan Premyer Liqasında "Sabah"la heç-heç edib.

Tovuz şəhər stadionunda baş tutan XIV turun oyununda 1:1 hesablı bərabərlik qeydə alınıb.

Görüşdə hesabı meydan sahibləri açıb. 12-ci dəqiqədə Otto Con adını tabloya yazdırıb. "Bayquşlar"a 1 xal qazandıran qolu isə 67-ci dəqiqədə Coy Lens Mikels vurub.

Bu nəticənin ardından Kurban Berdıyevin rəhbərlik etdiyi "Turan Tovuz" 27 xalla üçüncü sırada qərarlaşıb. "Sabah" isə 19 xalla beşincidir.

Qeyd edək ki, ötən gün "Araz-Naxçıvan" "Kəpəz"i iki cavabsız qolla üstələyib.

10:24

Bu gün Misli Premyer Liqasında XIV tura yekun vurulacaq.

Günün ilk matçında "Turan Tovuz" "Sabah"ı qəbul edəcək.

Tovuz şəhər stadionunda baş tutacaq görüşün start fiti saat 17:00-da səslənəcək.

Digər qarşılaşmada isə "Sumqayıt" "Şamaxı" ilə münasibətlərinə aydınlıq gətirəcək. Mehdi Hüseynzadə adına Sumqayıt şəhər stadionunda keçiriləcək matç saat 19:00-da başlayacaq.

Misli Premyer Liqası

II dövrə, XIV tur

24 noyabr

17:00. "Turan Tovuz" -" Sabah"

Hakimlər: Rəşad Əhmədov, Kamran Bayramov, Rahil Ramazanov, Tural Qurbanov.

VAR: Cavid Cəlilov.

AVAR: Müslüm Əliyev.

Hakim-inspektor: Rəhim Həsənov.

AFFA nümayəndəsi: Rüfət Əmirov.

Tovuz şəhər stadionu

19:00. "Sumqayıt"- "Şamaxı"

Hakimlər: Rauf Cabarov, Eyyub İbrahimov, Şirmamed Mamedov, Rəvan Həmzəzadə.

VAR: Rauf Allahverdiyev.

AVAR: Akif Əmirəli.

Hakim-inspektor: Munis Abdullayev.

AFFA nümayəndəsi: Nəriman Axundov.

Mehdi Hüseynzadə adına Sumqayıt şəhər stadionu

Qeyd edək ki, turun əvvəlki oyunlarında "Araz-Naxçıvan" "Kəpəz"i 2:0, "Qarabağ" "Səbail"i 3:0, "Neftçi" isə "Zirə"ni 2:1 hesabı ilə məğlub edib.(report)