İdmanımızda olimpiada ərəfəsi nələr baş verir?

Bizi sosial şəbəkələrdən izləyin:

Sərbəst güləş üzrə 3 qat dünya və 4 qat Avropa çempionu Hacı Əliyev Gənclər və İdman Nazirliyindən narazılıq etdiyi barədə KİV-də xəbərlər dərc olunmuşdu. Moderator.az xəbər verir ki, o, feysbuk hesabında paylaşım edərək ilin 10 ən yaxşı idmançısı siyahısında olmamasına və Xankəndidəki tədbirə dəvət almaması barədə yazmışdı.

Bu məsələ ilə bağlı Gənclər və İdman Nazirliyi rəsmi mövqeyini bildirdi.

Lakin ara-sıra idmanda bu cür söz-söhbətlərə rast gəlirik. Qarşıdan gələn 2024-cü ildə Parisdə Yay Olimpiya Oyunları baş tutacaq. Belə mötəbər yarış öncəsi Azərbaycan idmanında bu cür söz-söhbətlər necə təsir göstərəcək?

Bununla bağlı Moderator.az idman jurnalisti Ağa Dadaşzadə fikrini öyrənib.

Təcrübəli jurnalist Hacı Əliyevin bu cür etirazla deyil, yenidən ciddi uğurlarla gündəmə gəlməsinin uyğun olduğunu qeyd edib:

“Bu xəbəri ilk olaraq sosial şəbəkələrdə gördüm. Bu cür yanaşma adını güləş tarixinə yazan, eyni zamanda karyerası davam edən idmançıya yaraşmır. Bildiyim qədərilə Hacı "İlin Yekunları" tədbirinə dəvət almışdı, amma gəlməmişdi. Digər məsələlərlə bağlı nazirliyin rəsmi mövqeyi var. Ümumiyyətlə bu il ərzində on yox, onlarla idmançılarımız beynəlxalq arenada adından söz etdirməyi bacarıb. Hazırkı durumda heç bir idmançı belə etirazlarla gündəmə gəlməməlidir. Məncə, Hacı daha çox məşq edib gələn il olimpiyadada qızıl medalı hədəfləməlidir. Bu il Hacı Əliyev dünya çempionatında uğurlu çıxış etsəydi hətta siyahıda ilk "üçlükdə"də ola bilərdi. İdmandır, karyera davam edirsə, fəaliyyət varsa, uğurlar da olacaq, mükafatlar da. Hacı Əliyevə inamımız böyükdür, inanıram ki, növbəti yarışlarda daha uğurlu nəticə qazanacaq. Qarşıdan Paris-2024 Yay Olimpiya Oyunları gəlir, həmin yarışa çox ciddi hazırlaşmaq lazımdır.

Ümumiyyətlə söhbət tək Hacıdan getmir, qalib ölkənin vətəndaşlarıyıq, bizi tək yerli əhali deyil, digər ölkələr də izləyir. Ona görə hər sahədə, hər mövzuda uğurlularımızla gündəm olmalıyıq. Ümumiyyətlə mənfi yöndə mövzuların müzakirəsi idmançılara psixoloji cəhətdən müsbət heç nə vermir. Ona görə də belə mövzulara həssas yanaşmalıyıq. "İlin Yekunları"na gəlincə isə sorğunun kifayət qədər şəffaf keçirildiyini düşünürəm, lakin kiminsə adı siyahıda yoxdursa o demək deyil ki, onların fəaliyyəti uğurlu alınmayıb. Əksinə, inkişaf olan yerdə seçimlər çox olur. Paris-2024 Yay Olimpiya Oyunlarında hər bir idmançımızdan yüksək nəticələr gözləyirəm. Gənclər və İdman Nazirliyi bu istiqamətdə maksimum çalışır və hər bir idmançımızın uğuruna sevinir, onların yaxşı nəticə qazanmaq üçün maksimum dəstək olduğunu hiss edirik”.