"Tokio-2020" Yay Paralimpiya Oyunlarında qızıl medal qazanan paracüdoçu Vüqar Şirinli Moderator.az - ın suallarını cavablandırıb.
Qalib paracüdoçu bizimlə söhbətində Ali Baş Komandanımız İlham Əliyevin, Azərbaycan Respublikasının Birinci vitse-prezidenti Mehriban Əliyevanın “Tokio-2020” Yay Paralimpiya Oyunlarında ölkəmizə qızıl və bürünc medallar qazandıran idmançılarımızı təbrik etməsindən, özünün birinci dərəcəli ordenə layiq görülməsindən danışıb:
- Olimpiya zirvəsini fəth etmək üçün hansı çətinliklərdən keçdiniz?
- Bu qalibiyyət mənə heç də asan başa gəlmədi. 20 ildir ki, idmanla məşğulam. 2001-ci ildən idmana başlamışam. 2007-ci ildən bu sahədə böyük nəticələr əldə etmişəm. Həmin ili yeniyetmələr arasında Avropa çempionu oldum. Daha sonra digər nailiyyətlər əldə etdim. Müəyyən zaman kəsiyində məşqdə zədələndim. Müxtəlif illərdə yarışlarda nailiyyətlərim oldu. Nəticədə 2021-ci ildə Tokio-2020 Yay Paralimpiya Oyunlarında qızıl medal qazandım. Ora gedəndə müəyyən çətinliklər yaşadım.
- Məsələn, hansı çətinliklər?
- Komanda yoldaşımızda koronavirus aşkarlandı. Bu səbəbdən bizi karantin rejiminə aldılar. Bunun üçün 2 gün qapalı rejimdə qaldıq, daha sonra müəyyən şərtlərlə məşqlərimizə davam etdik. Şükürlər olsun ki, istədiyimiz nəticəni əldə etdik.
- Bu qalibiyyəti əldə edəcəyinizi gözləyirdinizmi?
- Biz bu oyunlara qatıldıqda əsas məqsədimiz çempion olmaq idi. Bu hər bir imdançının arzusudur. Cudo isə elə bir idman növüdür ki, kiçik bir səhvlə məğlub ola bilərsən. Şükürlər olsun ki, biz qalib olduq.
- Sizi ən çox nə həvəsləndirir?
- Qalib olduqda birinci vitse-prezindetimiz Mehriban Əliyevanın bizi sosial şəbəkədə təbrik etməsi məni və komanda yoldaşılarımı daha da ruhlandırdı. Cənab prezident, Ali Baş Komandanımızın bizi mükafatlandırması - mənə "Vətənə xidmətə görə" birinci dərəcəli orden təqdim etməsi böyük qürur verici idi. İnsan belə vəziyyətdə daha çox qürur hissi duyur.
- Qalib ölkənin qalib idmançısı olmaq necə bir hissdir?
- Biz oyunlara qalib ökənin sərkərdələri kimi getmişdik. O arenada bunu hiss edirdik. Hətta qalib olanda himiniz səsləndikdə, bayrağımız qaldırıldıqda deyirdilər ki, bunlar azərbaycanlıdır. Qalib olduqda çox sevindim, bayrağımız qaldırılanda, himnimiz səslənəndə bir anlıq düşündüm ki, bu bayraq üçün bizim canından keçən şəhidlərimiz olub. Onlar gözümün qabağına gəlib keçdi, qəhər məni boğdu, ağlamaq həddinə gəldim. Qələbəmi şəhidlərimizə həsr etdim.
- Bu oyunlar zamanı ligionerlərin komandalarımızda iştirakı sərt şəkildə tənqid edildi. Belə ki, oyunlarda o qədər də təəssüfkeş olmadıqları, eyni zamanda bizim yerli idmançılarımız kimi can yandırmdıqları qeyd edildi. Mövzu ilə bağlı sizin düşüncələriniz necədir?
- Bizim çox güclü yerli idmançılarımız var. Di gəl ki, ligionerlərə daha çox qonorar verilir və hörmət edilir. O arenada bayrağımız dalğalananda, himnimiz səslənəndə inanmıram ki, onlar bizim qədər duyğulansınlar, can yandırsınlar. Yəni əsas missiyaları qalib olmaq, mükafat alıb çıxıb getməkdir. Bunu da öz nüfuzları üçün edirlər. Amma bizimkilər yarışlara getdikdə ilk növbədə vətən üçün, dövlət üçün istəyirlər qalibiyyət əldə etsinlər, bayrağımız qaldırılsın, himnimiz səsləndirilsin. Ligionerləri isə pul və mükafat daha çox maraqlanıdırır. Federasiyalar da onlara verdiyi qonorarları heç bizim Avropa və dünya çempionlarımıza vermirlər. Hətta elə idmançılıarımız var ki, onlar idmandan küsüb gediblər. Onlardan biri fəhlə, biri dülgər işləyir. Söz yox ki, Ali Baş Komandanımız hər zaman idmançılara diqqət və qayğı göstərib və göstərir də. Bir neçə federasiya da var ki, onlar idmançılara hörmət qoymur.
- Məsələn, hörmətsizlik hansı şəkildə edilir?
- Məşqin birinə getməyəndə deyirlər ki, “sən heç bir yarışda iştirak etməyəcəksən”. Amma halbuki maraqlanmayıblar ki, sən nəyə görə məşqə getməmisən? Bəlkə məşqə gəlməyə yol pulun olmayıb? Məşqə gəlməyəndə də idmançının maaşından kəsilir.
- Ligionerləin də maaşından kəsilir?
- O məsələ bir başqadır. Ligionerlərə 1000-2000 manat maaş verilirsə öz idmançılarımıza 500 - 700 manat verirlər. O ayrı bir mövzudur.
- Yeni Gənclər və İdman nazirindən gözləntiləriniz nələdir?
- Gənclər və İdman naziri Fərid Qayıbov yeni fəaliyyətə başlayıb. Qısa müddət ərzində federasiyalarla görüş keçirib. Bizim iştirak etdiyimiz bu oyunda medalların sayı nisbətən az oldu. Bu da federasiyaların idmançılarla münasibətindən qaynaqlanır. Ümid edirəm ki, cənab nazir bununla ciddi məşğul olacaq.
Xəyalə Rəis
