Böyük Britaniyanın müdafiə naziri Lord Koaker Bakıya səfər edib - FOTO

Böyük Britaniyanın Müdafiə naziri Lord Koaker Böyük Britaniya və Azərbaycan arasında müdafiə tərəfdaşlığını gücləndirmək məqsədilə Bakıya səfər edib.

Moderator.az xəbər verir ki, bu barədə Böyük Britaniyanın Azərbaycandakı səfirliyi məlumat yayıb.

Bildirilib ki, səfərdən məqsəd müdafiə və təhlükəsizlik məsələlərini müzakirə etmək olub.

Məlumatda həmçinin təhlükəsizlik sahəsində əməkdaşlığın Böyük Britaniya–Azərbaycan strateji tərəfdaşlığının əsas sütunlarından biri olacağı və regional sabitlik və uzunmüddətli sülhün əhəmiyyətinə dair ortaq anlayışı əks etdirəcəyi bildirilib.

Bundan başqa artan təhdidlər fonunda ölkələrin ortaq strateji maraqlar üzrə birgə işləməyə davam edəcəyi vurğulanıb.

“Böyük Britaniya və Azərbaycan Cənubi Qafqazda sülh, sabitlik və rifah üçün ortaq məqsəd üzərində birlikdə çalışırlar. Bu məqsədə dəstək olaraq, Böyük Britaniyanın Müdafiə Naziri Lord Vernon Koaker 4 dekabr 2025-ci il tarixində Bakıya səfər edib – bu, 2022-ci ildən bəri Böyük Britaniya Müdafiə Nazirliyinin ilk səfəridir.

Səfər, ikitərəfli münasibətlərdə mühüm inkişaflardan sonra müdafiə sahəsində əməkdaşlığı daha da dərinləşdirir. Bu inkişaflara 2025-ci ilin avqustunda münasibətlərin strateji tərəfdaşlıq səviyyəsinə yüksəldilməsi niyyəti daxildir. Müdafiə əməkdaşlığı bu tərəfdaşlığın əsas sütunu olacaq və regional təhlükəsizlik və strateji sabitliyə ortaq sadiqliyi əks etdirəcək”, - məlumatda deyilir.

Qeyd olunub ki, Böyük Britaniya mart ayında Azərbaycanda ilk Rezident hərbi attaşesini təyin edib. Oktyabrda Böyük Britaniya, ATƏT-in Minsk Qrupu mexanizmlərinin ləğvinə uyğun olaraq, Azərbaycan və Ermənistana tətbiq olunan silah embarqosunu aradan qaldırıb. Hər iki ölkə 2025-ci ilin oktyabrında Londonda indiyədək ən iddialı ikitərəfli müdafiə əməkdaşlığı proqramını imzalayıb.

“Ölkələrimizin üzləşdiyi təhdidlər artdıqca, bizim kimi etimad və hörmət üzərində qurulmuş tərəfdaşlıqlar daha da vacib olur. Cənubi Qafqazda sülh və rifahı dəstəkləmək üçün Azərbaycanla işləməkdən məmnunam və qarşıdakı aylar və illərdə əməkdaşlığımızı daha da gücləndirməyi səbirsizliklə gözləyirəm”, - müdafiə naziri Lord Koaker səfərlə bağlı deyib.

Səfər zamanı Lord Koaker Azərbaycan Respublikasının Prezidenti cənab İlham Əliyev, müdafiə naziri general-polkovnik Zakir Həsənov və müdafiə sənayesi naziri Vüqar Mustafayev ilə ikitərəfli görüşlər keçirib və Böyük Britaniya–Azərbaycan müdafiə və təhlükəsizlik tərəfdaşlığının inkişafı üçün əlavə imkanları araşdırıb.

Lord Koaker həmçinin Azərbaycan Ordusunun Təlim və Təhsil Mərkəzində keçirilən Britaniya Hərbi Məsləhət və Təlim Qrupunun “Təlimçi hazırlığı” kursunun məzuniyyət mərasimində iştirak edib. Dörd həftəlik intensiv kursun iştirakçıları Britaniya və Çexiya təlimçiləri tərəfindən Böyük Britaniyanın “Müdafiə Təlimçi Təlimi” yanaşmasına uyğun şəkildə təlim keçilib və mentorluq edilib.

Lord Koaker həmçinin Şəhidlər Xiyabanını və Birlik Dövlətləri Hərbi Memorialını ziyarət edərək ehtiramını bildirib.