Hibrid müharibə Avropanı sarsıdır: Yanğınlar və kiberhücumların sirri – İrlandiyalı ekspertdən ilginc açıqlamalar

Bizi sosial şəbəkələrdən izləyin:

ABŞ administrasiyası Ukraynaya Rusiyanın enerji infrastrukturuna zərbələr endirmək üçün kəşfiyyat məlumatları verəcək.

Məlumata görə, bu qərar ABŞ Prezidenti Donald Trampın administrasiyası tərəfindən qəbul edilib. Bu addım ABŞ-ın Ukraynaya uzaqmənzilli silahlar vermək imkanlarını nəzərdən keçirdiyi vaxtda atılır. ABŞ administrasiyası Rusiyanın enerji infrastrukturuna zərbələr endirmək üçün kəşfiyyat məlumatları verməklə hansı strateji məqsədlərə nail olmağı hədəfləyir? Bu addım Tramp administrasiyasının Rusiya ilə münasibətləri barədə hansı mesajı verir?

Rusiya bu xəbərə diplomatik və ya hərbi müstəvidə necə reaksiya verə bilər?

Moderator.az-a danışan irlandiyalı siyasi ekspert, analitik, tarixçi Patrik Uolş deyib ki, Tramp administrasiyasının strateji məqsədi Rusiyanı danışıqlar masasına oturtmaqdır ki, ABŞ prezidenti sülh əldə etsin — mümkünsə sülh sazişi və bununla bağlı özünün Nobel Sülh Mükafatını qazanması da nəzərdə tutulur:

“Bu, Bayden administrasiyasının məqsədindən fərqlidir. Baydenin məqsədi Rusiya qüvvələrini Ukrayna ərazisindən çıxarmaq və Putini sarsıtmaq idi. Trampın məqsədləri daha məhduddur, çünki o müharibəni dayandırmaq istəyir — hətta Kiyevin ərazi itkiləri bahasına olsa belə. Tramp Putinə mesaj göndərir ki, müharibəni davam etdirdiyi və qərbə doğru irəlilədiyi üçün (ABŞ-ın istəmədiyi bu hərəkətə görə) o, müəyyən nəticələrlə üzləşəcək. Enerji obyektlərinə zərbələr Rusiyanın iqtisadiyyatına zərər vurur. Ukraynalılar artıq bu növ əməliyyatları həyata keçirə bilir, lakin ABŞ kəşfiyyatının paylaşılması və silah tədarükü onların fəaliyyətinin daha məqsədyönlü və effektiv olmasına gətirib çıxara bilər. Lakin bu, eyni zamanda Rusiyanın eskalasiya riskini artırır və hətta Bayden belə ondan çəkinməyə çalışıb”.

Siyasi ekspert qeyd edib ki, ABŞ həmişə istəyib ki, Ukraynadakı müharibə müəyyən hədlər daxilində aparılsın – hətta bu, Ukraynanın uduzmasına gətirib çıxarsa belə. Məqsəd heç vaxt Ukraynanın qələbəsi olmayıb, əsas məqsəd Rusiyanı zəiflətmək olub:

“Cəmi azlıq inanırdı ki, Ukraynanın tam qələbəsi mümkündür və ya arzuolunandır. Rusiyanın reaksiyası maraqlı olacaq. Putin hesab oyununu oynayır və Qərbə yalnız hərbi yolla deyil, başqa vasitələrlə də zərbə vurmaq imkanına malikdir. Avropada kibertəhlükələr və müəmmalı yanğınların sayı getdikcə artır. Böyük Britaniyanın iqtisadiyyatının bütöv sahələri bu səbəbdən iflic vəziyyətinə düşüb. Bunun arxasında kimin dayandığını düşünməyə dəyər. Bu, hibrid müharibədir”.

Mehin Mehmanızı