Gəncədə yataqxanada baş verən yanğının təfərrüatı məlum olub - YENİLƏNİB + VİDEO

Bizi sosial şəbəkələrdən izləyin:

Gəncədə yataqxanada baş verən yanğının təfərrüatları məlum olub.

Belə ki, Gəncə şəhər Atatürk prospektində yerləşən beş mərtəbəli binanın üçüncü və dördüncü mərtəbəsinin eyvanları və bir otağı içərisində əşyaları ilə birgə yanıb.

Zərərçəkən bildirib ki, evdə xəbərsiz idim, bir də gördüm tüstüdə boğuluram:

“Qışqırıq səsini eşitdim, oğlum düşdü ikinci mərtəbəyə. Alov yuxarı çıxdı, hamımız tökülüşdük. Çox qorxdum, hələ də bu dəqiqə əsirəm”.

Qeyd edək ki, hadisə yerinə Fövqəladə Hallar Nazirliyinin (FHN) Gəncə şəhər Yanğından Mühafizə İdarəsinin yeddi yanğınsöndürən maşınları və canlı qüvvəsi cəlb olunub və yanğın söndürülərək digər mərtəbələr yanğından mühafizə olunub.

Hadisə zamanı üçüncü mərtəbənin 15 kvadratmetr sahəsi, dördüncü mərtəbənin isə 10 kvadratmetr sahəsi yanıb.

Həmçinin 16 nəfər təxliyə edilib. Onlardan bir neçə nəfərin halı pisləşib, tüstüdən zəhərlənmə olub. Onlara tibbi yardım göstərilib. Yanğının başvermə səbəbləri araşdırılır.

Ətraflı Baku TV-nin süjetində:

30.12.23 23:23

Gəncədə yataqxana binasında baş verən yanğın söndürülüb.

Bu barədə Fövqəladə Hallar Nazirliyindən (FHN) məlumat verilib.

Qurumun “112” qaynar telefon xəttinə Gəncə şəhərinin Atatürk prospektində yataqxana binasında yanğın baş verməsi barədə məlumat daxil olub.

Məlumatla əlaqədar dərhal FHN-in Dövlət Yanğından Mühafizə Xidmətinin və Gəncə Regional Mərkəzinin qüvvələri əraziyə cəlb olunub.

Yanğınsöndürənlərin operativ müdaxiləsi sayəsində ilkin məlumata əsasən eyvanda baş vermiş yanğın genişlənməsinə imkan verilmədən qısa müddətdə söndürülüb.

Təhlükəsizlik tədbirləri çərçivəsində FHN-in qüvvələri tərəfindən mənzillərdən 16 nəfər sakin təxliyə olunub.

22:49

Gəncədə yataqxana binasında yanğın baş verib.

APA-nın məlumatına görə, hadisə şəhərin Atatürk prospektində yerləşən yataqxana binasında qeydə alınıb.

Sözügedən ünvanda yerləşən yataqxana binasında anidən yanğın olub. Hadisə yerinə FHN-in yanğınsöndürmə avtomobilləri və canlı qüvvəsi cəlb olunub. Binadan 16 nəfər təxliyə edilib.

Yanğın zamanı xəsarət alanların olduğu bildirilir.