“Avropa Şurası Parlament Assambleyasında alman deputatın Azərbaycan nümayəndə heyətinin səlahiyyətlərinə xitam verilməsi barədə çıxışı gözlənilən idi”.
Bunu Moderator.az-a açıqlamasında millət vəkili Nəsib Məhəməliyev bildirib. Millət vəkili qeyd edib ki, Vətən müharibəsindən sonra beynəlxalq aləmdəki ermənipərəst qüvvələrin aktivliyi his olunur ki, bu da Azərbaycanın qələbəsinin bu güclər tərəfindən həzm edilmədiyini göstərir:
“Ötən ilin aprel ayında, yəni Laçın rayonu ərazisində nəzarət-buraxılış-postu qoyulduqdan sonra Fransa başda olmaqla, bəzi Avropa ölkələrinin, beynəlxalq təşkilatların reaksiyalarında hər şey açıq şəkildə hiss olunurdu. Xüsusilə, 19-20 sentyabr, anti-terror tədbirləri, Qarabağda yaşayan ermənilərin könüllü şəkildə ərazini tərk etmələri isə, həmin qüvvələrin planlarını alt-üst etmiş oldu.
Azərbaycan 2001-ci ildən Avropa Şurasının üzvüdür. Bu təşkilatın əsas vəzifəsi Avropa məkanında insanların hüquq və azadlıqlarının təmin olunmasıdır. Lakin, 1 milyon qaçqın və köçkünlərin problemini, acınacaqlı vəziyyətini görməzdən gələn AŞ PA bir dəfə olsun Ermənistanın işğalçı siyasətinə qarşı çıxmadı. Separatçılığı, dini, mədəni abidələrin, şəhərlərin, kəndlərin vandalcasına dağıdılmasını qınamadı. Meşələrin qırılmasını, təbii sərvətlərin qanunsuz daşınmasını, ekologiyaya vurulmuş ziyanı pisləmədi. Nə verdi AŞ PA Azərbaycana. Hər dəfə münaqişə ilə bağlı məsələlər qaldırılanda, məsləhət verirdilər ki, ancaq danışıqlara üstünlük verilməlidir. Müharibə etmək olmaz. Baxmayaraq ki, Qarabağ əsilli kriminal prezidentlər Koçaryan və Sarkisyan həmin AŞ PA-nın tribunasından fəxrlə, Azərbaycan torpaqlarlnın işğalından danışırdılar. Keçmiş vilayətin inzibati ərazisinə daxil olmayan 7 rayonun işğalını təhlükəsizlik zonası elan etmişdilər. AŞ PA bir dəfə də olsa, onlara etiraz etmədi. Onları məsuliyyətsiz, həyasız bəyanatlardan çəkindirmədi.
Əvəzində, konkret cinayətlərə görə həbs olunmuş tək tək şəxsləri, siyasi dustaq adlandırmaqla, Azərbaycan hökumətini daim təzyiq altında saxlamağa cəhd etdilər.
Bunun adı ikili standartlardır. Qərəzli yanaşmadır. Məhz, belə yanaşma, AŞPA və öz meyarlarına uyğun selektiv siyasət aparan bəzi beynəlxalq təşkilatlar, Azərbaycan xalqında onlara olan inamı sarsıtdı.
Tutaq ki, sabah Azərbaycan nümayəndə heyətinin fəaliyyətinə xitam verildi və yaxud səs vermə hüququndan məhrum edildi. Yəqin ki, səsvermə hüququ alınandan sonra, biz özümüz təşkilatı tərk edəcəyik. Sonra nə olacaq. AŞPA-ya ödəniləsi üzvlük haqqlarını, digər xərcləri sosial layihələrin icrasına yönəldərik”.
Millət vəkili ermənilərin Qarabağdan zorla çıxarılması ilə bağlı iddiaların da tamamilə əsasız olduğunu vurğulayıb:
“Almaniyalı deputatın istinad etdiyi iki məsələnin biri, guya ki, Qarabağdan ermənilərin zorla deportasiya olunmasıdır. BMT başda olmaqla, bütün dünya gördü ki, bir nəfər də olsa, erməni xəsarət almadan, könüllü şəkildə ölkəni tərk edib. Əksinə, ən yüksək səviyyədə, dəfələrlə çağırışlar edilib ki, qalsınlar. Deməli, ağ yalandır.
İkinci məsələ, 7 fevralda keçiriləcək seçkilərə Azərbaycan tərəfinin müşahidəçilər üçün dəvət göndərməməsi göstərilir. Çox düz edib, göndərməyib. Əvvəlcədən qərəzli, düşmən münasibət göstərən ermənipərəst qüvvələrin Azərbaycanda nə işi var. Onlar olmadan belə, bir çox təşkilatlar müşahidəçi olaraq Mərkəzi Seçki Komissiyasında qeydiyatdan keçiblər və vəzifələrini icra edəcəklər.
Azərbaycan o ölkələrdəndir ki, dostluq üçün uzanan əlləri heç zaman kəsməz. Bir addım atarsan, iki addım atarıq. Əfsuslar olsun ki, 23 il ərzində AŞPA-dan gözlədiklərimiz özünü doğrultmadı”.
Seymur ƏLİYEV
