Düşmən helikopterini vuran şəxsin kimliyi məxfi saxlanılmalı idi?

Cari ilin 12 noyabr tarixində cəbhə xəttinin Ağdam istiqamətində ermənilərə məxsus Mi-24 tipli döyüş helekopterinin vurulması anını özündə əks etdirən video görüntü cəmiyyətdə böyük marağa səbəb oldu. Düşmən helikopterinin məhvini anbaan özündə əsk etdirən bu görüntülərin meydan çıxmasından təxminən 24 saat sonra bu görüntülərdən heç də az maraq kəsb etməyən daha maraqlı bir məqam ortaya çıxdı. Məlum oldu ki, sözügedən video görüntünün kim tərəfindən yayıldığı heç kəsə məlum deyil. Baş verənlərlə bağlı açıqlama verən Mətbuat Şurasının sədri Əflatun Amaşov APA-ya açıqlamasında həmin görüntünün jurnalistlərə məxsus olmadığını bildirdi: “Helikopterin vurulma anını hansısa jurnalist lentə ala bilməzdi. Belə olan halda həmin görüntünün medianın əlinə necə düşməsi də sual doğurur. Düşünürəm ki, bu, ciddi şəkildə araşdırılmalıdır. Hansısa naşılıq və sui-istifadə varsa, aradan qaldırılmalıdır. Məsələyə kompleks yanaşılmalıdır”

Beləliklə də, bu gün  məlum videogörüntünün yayılması ilə bağlı bütün məsuliyyətin birmənalı şəkildə Azərbaycan Silahlı Qüvvələrinin üzərində qalıb ki, bu da bütün  qabaqlayıcı tədbir və təlimatlara rəğmən hələ də bu sahədə müəyyən problemlərin mövcud olduğunu göstərir.

Cəmiyyətin müəyyən dairələrində narahatlıq doğruran başqa bir məqam isə düşmən helikopterini məhv edən hərbçimizin isminin açıqlanması ilə bağlıdır. Belə ki, bəzi vətəndaşlar hesab edir ki, düşmən helikopterini sıradan çıxardan hərbçinin  isminin elan edilməsi həmin hərbçi və onun ailə üzvləri üçün müəyyən risk təşkil edir. Bu baxımdan da bəzi insanlar bu məlumatın gizli saxlanılmasının daha məqsədəuyğun ola biləcəyi qənaətindədirlər.

Bütün bunlarla bağlı Moderator.az saytı və “Hürriyyət” qəzetinə açıqlama verən “Hərbi Jurnalistlər” İctimai Birliyinin rəhbəri, hərbi ekspert Üzeyir Cəfərov məsələ ilə bağlı maraqlı fikirlər səsləndirdi:

“Dünənki qeydlərimdə vurğulamışdım ki, vurulan erməni helekopteri ilə bağlı söz-söhbətlər hələ uzun müddət müzakirələrə səbəb olacaqdır.Bu da təbiidir. 1994-cü ilin məlum atəşkəs sazişindən sonra ilk dəfə idi ki, Ermənistan Silahlı Qüvvələrinin bu miqyasda itkiləri oldu. Həm döyüş texnikası, həm də 3 nəfər peşəkar hərbi pilotun itirilməsi sözsüz ki, qarşı tərəfi sonsuz şəkildə qıcıqlandırıb. İndi həm ermənilər, həm də onların havadarları az qala aləmi qatıblar bir-birinə ki, qoymayın Azərbaycan ordusu bizi qırıb-çatır. Əslində isə, real vəziyyət ondan ibarətdir ki, "oğru elə qışqırır ki, doğrunun bağrının yarmaq istəyir".
Dünən gecədən başlayaraq isə düşmən vertolyotunun vurulması ilə bağlı yayılan həvəskar videonun kim tərəfindən, hansı şəraitdə yayılması ilə bağlı çox ciddi müzakirələr başlayıb. Hətta bu "vacib işin" təşəbbüskarları Mətbuat Şurasının sədri Əflatun Amaşovu da bu məsələnin araşdırılmasına cəlb etməyə cəhd ediblər. Və MŞ-nın sədri də bu məsələdə məsuliyyəti ordunun üzərinə atib. Necə deyərlər, olsun. Əslində bu yayılan videonun ortalıqda olması bizə heç bir zərər gətirmir və gətirə də bilməz. Əksinə isə, hesab edirəm ki, bu videonun ortalığa çıxması yaxşı oldu və bütün dünya gördü ki, erməni qəsbkarları açıq-aydın şəkildə qoşunların təmas xəttində özlərini necə təxribatçı kimi aparmağa cəhd edirlər və sonlarını da hamı gördü. Bu hadisə bizə bir daha unikal imkan yaradır ki, biz bir dövlət olaraq bütün dünyaya Ermənistanın işğalçılıq siyasətini sübut edək. Heç kimdən də qorxmaq və çəkinmək lazım deyil. ATƏT, Avropa Parlamenti, BMT və digər irili-xırdalı ölkələr danışmazdan öncə yadlarına salsınlar ki, Ermənistan SQ-nin döyüş helikopterinin Azərbaycanın Ağdam rayonu ərazisində nə ölümü vardı ki, indi hamı düşüb ölkəmizin üstünə ki, bu danışıqlar prosesinə ziyan gətirəcək. Mən əsla belə düşünmürəm və hesab edirəm ki, bu hadisədən sonra həm Ermənistan, həm də onun züy tutanları yaxşı-yaxşı fikirləşməli olacaqlar.
Mən də razıyam ki, belə məsələlərdə mərkəzləşmiş qaydada informasiya siyasəti yeridilsə, daha yaxşı olar. Yəqin ki, gələcəkdə bu hallar da nəzərə alınacaqdır”.

Ü.Cəfərov düşmən helikopterini vuran şəxsin kimliyinin elan edilməsi ilə bağlı müzakirələrə də aydınlıq gətirdi:

“ Bəzi vətəndaşlarımızın helekopteri vuran şəxsin kimliyinin elan edilməsi ilə bağlı həmin şəxs və onun ailə üzvləri üçün müəyyən riskin olub-olmamasi ilə bağlı narahatçılığı ilə bağlı onu qeyd etmək istəyirəm ki, narahatçılığa heç bir əsas yoxdur. Ermənilərə haqq savaşımızda qan udduran yüzlərlə qəhrəman oğul və qızlarımız olub və hazırda da onlar həm ölkə daxilində, həm də ölkəmizdən kənarda müxtəlif sahələrdə çalışır və fəaliyyət göstərirlər. Mən erməni döyüş vertolyotunu vuran sərrast çavuşumuz İlkin Muradovu bir daha ürəkdən təbrik edirəm və ona gələcək xidmətlərində böyük nailiyyətlər arzulayıram. Mənim dərin inamıma görə, həm bu qəhrəman döyüşçümüz üçün, eləcə də digər hərbçi oğullarımıza görə heç bir risk, qorxu ola bilməz və yoxdur. Burda da, mən əksinə hesab edirəm ki, xalq öz qəhrəmanlıq göstərmiş layiqli övladını yaxından tanımalıdır”.

Seymur Əliyev