“Heydər Əliyev İli” Ulu öndərin ideyalarının təbliğinə mühüm töhfə verəcək”

Cəlil Xəlilov: “Gənclərin bu ideyalara yiyələnməsi dövlətçiliyimizin gələcəyi baxımından mühüm əhəmiyyətə malikdir”

“Heydər Əliyev İli” Ulu öndərin ideyalarının təbliğinə mühüm töhfə verəcək”.

Bunu Moderator.az-a açıqlamasında Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib. Polkovnik qeyd edib ki, gənc nəslin Heydər Əliyev ideyalarını mənimsəməsi, bu ideyaları dərk etməsi dövlətimizin və dövlətçiliyimizin inkişafı, işıqlı gələcəyi baxımından olduqca önəmlidir:

“Cənab Prezident İlham Əliyev Ulu öndərin anadan olmasının 100 illiyi ilə əlaqədar olaraq 2023-cü ili “Heydər Əliyev İli” elan edib. Bu, bütün xalqın qəlbindən, ürəyindən xəbər verən bir addımdır. Xalqın Heydər Əliyevə olan sevgisi, ona olan ehtiramı hər kəsə məlumdur və bu sevgi Azərbaycan xalqı, Azərbaycan dövləti kimi əbədidir.  

2023-cü ilin “Heydər Əliyev İli” elan edilməsi Ulu öndərin ideyalarının təbliği, bu ideyaların gənc nəslə daha dərindən aşılanması baxımından olduqca əhəmiyyətlidir. “Heydər Əliyev İli” ilə bağlı həyata keçiriləcək layihələr, tədbir və görüşlər, Ulu öndərlə bağlı yazılacaq məqalə və kitablar, ərsəyə gətiriləcək sənədli filmlər gənclərə imkan verəcək ki, onlar Ulu öndərin ideyalarını daha dolğun şəkildə mənimsəsinlər. Onun vətən, xalq, dövlət sevgisindən özləri üçün nəticə çıxarsınlar. Öz fəaliyyətlərində Heydər Əliyev ideyalarını rəhbər tutsunlar.

Bildiyiniz kimi, Azərbaycanda nizami ordunun formalaşdırılması, müstəqilliyimizin möhkəmlənməsi, neftimizin dünya bazarına çıxarılması, dövlətimizin siyasi nüfuzunun yüksəlməsi və s. kimi amillər bilavasitə Heydər Əliyevin adı ilə bağlıdır. Heydər Əliyev hələ sovet dönəmində azərbaycanlı hərbi kadrların yetişdirilməsinə, milli-mənəvi dəyərlərimizin təbliğinə xüsusi diqqət yetirib. Sovet dönəmində Azərbaycanın bir çox görkəmli ziyalıları məhz Heydər Əliyevin dəstəyi nəticəsində ciddi təzyiq və təhdidlərdən yaxa qurtara biliblər.

Gənclərimiz Heydər Əliyevlə bağlı bütün bu faktları bilməli, onların hər biri öz fəaliyyətlərində Ulu öndərin həyat və mübarizəsindən faydalanmalı, vətənə, xalqa sədaqətli və faydalı olmağa çalışmalıdırlar. Biz Heydər Əliyev ideyalarına, onun siyasi kursuna, qoyub getdiyi ənənələrə sadiqliyimizi vətənimizə xidmətimizlə sübuta yetirməliyik”.