“Bu nakişi, alçaq hərəkətdir, niyə kin qusursuz, öləndən sonra da qədir-qiymətini bilmirsiz?” - ÖZƏL+FOTO

 

Bunu Moderator.az-a açıqlamasında görkəmli sənətkar Səməndər Rzayevin qızı Rübabə Səməndər deyib.

 

“Mən bilirdim ki, Rasim Balayev xəstədir, özünü yaxşı hiss etmir, amma ümid edirdim ki, hər şey çox yaxşı olacaq, o sağ-salamat qayıdıb gələcək. Çünki o zaman-zaman xəstələnib, müalicə alıb və normala həyata qayıtmışdı. Bu dəfə təəssüf ki, alınmadı. Atamın dostlarına özəl münasibəti var idi. Ümumiyyətlə sənəti, peşəsini, insanları çox sevirdi. Dostlarını isə həddindən artıq çox sevirdi. Onların acısına ürəkdən acıyıb, sevincinə ürəkdən sevinirdi. Onlara tam başqa bir münasibəti var idi. Rasim əmiyə münasibəti isə tam fərqli idi. Onu o qədər çox istəyirdi ki.. Mən bunun şahidi olmuşam. Cəmi 3 yaş aralarında fərq olsa da, Rasim əmiyə münasibəti  ata-övlad münasibəti idi. Atam ona doğma balası kimi baxırdı. Bizdə məktublar var idi. Mən uşaqlıqdan zaman-zaman o məktubları götürüb oxuyurdum. Atamın Rasim əmiyə yazdığı, Rasim əminin atama yazdığı məktublar.. Bizim üçün o məktublar nə qədər əziz idisə, Rasim əmi üçün də o qədər əziz idi. O məktublar həmişə Rasim əmimin əlində idi. Verilişlərə gedəndə, atamla bağlı xatirə günlərində mütləq o məktubları götürüb gətirərdi və oxuyardı. Həqiqətən də Rasim əmi atamın doğma insanlarından biri idi. Biz ailəvi dost olmuşuq. Atamın ölümündən sonra da anam ərklə hansısa məsələlərdə Rasim əmiyə müraciət edirdi. Hətta bizim evdə bir kaset var. O vaxt maqnitofon hər adamın evində olmurdu. Atam bizim üçün almışdı. Rasim əmi də, babam da bizdə idi. Onların hamısının səsi bizim evdəki kasetdə var. Babam çox gözəl avazla muğam oxuyurdu, Rasim əminin qardaşımı əzizlədiyi səslər orada yazılıb. Ümumiyyətlə atamla Rasim əmi bir araya gələndə çox şirin və maraqlı ləhcədə danışırdılar. Onlar “ü” hərfini elə gözəl uzadırdılar ki.. O qədər xoşuma gəlirdi ki.. Gözəl səslənirdi.. Rasim əmigil bizimlə yaxın olurdular.. Piyada gedib-gələ bilirdik. Uşağlığımdan gözümü açıb Rasim əmini evimizdə görmüşəm. Necə ki, Rasim əmi dünyasını dəyişənə qədər atamın xatirəsini, ruhunu əziz tutdu, ona sadiq qaldı, mən də nə qədər ki, sağam onun adını hörmətlə anacam, onun ruhuna, xatirəsinə ehtiramla yanaşacam”, - deyə Səməndər Rzayevin qızı deyib.

 

Rübabə Səməndər sosial şəbəkədə Rasim Balayevlə bağlı xoşagəlməz status paylaşan bəzi şəxslərdən danışaraq, onları sərt tənqid edib:“Hələ insan bir neçə gündür dünyasını dəyişib, bununla belə gərəksiz status paylaşan mənasız adamları mən anlamıram. Onlar nəyə nail olmaq istəyirlər bu cür alçaq hərəkətləri ilə?! Reytinq qazanmaq istəyirlər?! Yoxsa qalmaqal yaradıb gündəmə gəlmək istəyirlər?! Bu nakişi hərəkətdir. Özünə hörmət edən adam bu cür hərəkət etməz. Bunu edənlər də “kişilərdir”. Mən görmədim hansısa qadın belə status paylaşsın. Hətta sevmədiyim insan, mənə nə qədər pislik edən insan olsa belə dünyasını dəyişibsə mən ona uzağı rəhmət oxumaram. Rəhməti layiq bilmirəmsə əgər.. Hərhalda lənət də oxumaram. Ona qarşı hansısa hörmətsiz bir status paylaşmaqla nə olacaq ki?! Onlar nəyə nail olmaq istəyirlər?! Niyə bu qədər kin qusurlar?! Mən bildiyim qədərilə Rasim Balayev heç kimə bu həyatda pislik etməyib. Bu adam mərdimazar insan da olmayıb. Əgər sənin hansısa mövzuda ona şəxsi antipatiyan varsa, aranızda hansısa anlaşılmazlıq olubsa, bunu gətirib sosial şəbəkəyə çıxarmaq, haqqında hörmətsiz status paylaşmaq nə deməkdir axı?! İnsan birinci növbədə özünə hörmət edər. Bundan da əlavə bu insan xalqın sənətkarıdır. Bu cür sənətkarların yeri dolmayacaq. Təki onlardan sonra gələn nəsil daha istedadlı olsun, daha maraqlı obrazlar yaratsın. Buna ancaq sevinərik. Amma heç kəs heç kəsin yerini vermir. Heç kəs heç kəsin yerini doldurmur. Rasim Balayevin elə Nəsimisi, Babəki, Beyrəyi bəs edir ki, milli kinomuzun tarixində yaşasın! Bunları unutmaq olmaz. Həqiqətən o çoxşaxəli aktyor idi. O təkcə qəhrəman obrazlar yaratmayıb ki.. Onun filmoqrafiyasına baxsaq görərik ki, bir-birindən fərqli obrazlar yaradıb. Bu cür sənətkarın qədir-qiymətini heç olmasa öləndən sonra da bilmirik?! Ölümdən o tərəfə heç nə yoxdur axı! Dünyasını dəyişəndən də sonra qısqanırlar bilmirəm, neynirlər, nə məsələdir bu?! Biz hansı ara bu vəziyyətə gəlib çatdıq?! Mən bilmirəm onun yoxluğuna üzülüm yoxsa o cür statusları oxuyub havalanım?! Onlara çox əsəbiyəm. Birinə cavab verirsən o biri çıxır. Onlara cavab vermək mənasızdır. Əgər nə qədər rəzil bir hərəkət etdiklərini dərk etsələr bir daha etməzlər. Belə adamlara cavab vermək onların səviyyəsinə enməkdir. Ancaq susa da bilmirsən. İçin qan ağlayır, əsəblərin korlanır. Allah Rasim əmiyə rəhmət etsin. Deyir “İt hürər, karvan keçir”. “Arxadan atılan daş topuğa dəyər”. Qoy atsınlar ürəkləri nə qədər istəyir. O daşlar bir gün onların təpələrinə töküləcək. Allah hər şeyi görür. Bu cür hərəkətlər həqiqətən də rəzalətdir. Biri deyir reklama çəkilmişdi, biri deyir üsyan etmirdi, xalqın sözünü demirdi.. Hərəsi bir söz deyir.. Onu kimləsə müqayisə edirlər, əlbəttə ki, müqayisə etdiklərinə üstünlük verirlər, haqq qazandırırlar. Allah Rasim əminin o dünyasını versin, məkanını cənnət etsin. Yeri hər zaman görünəcək”, - deyə sənətkarın qızı bildirib.