"ABŞ və İsrailin İrana qarşı müharibəsi: Ukrayna üçün beş əsas nəticə" - BBC

Bizi sosial şəbəkələrdən izləyin:

"Yaxın Şərqdəki eskalasiya Kiyevin mövqeyini zəiflədir, Moskva isə yeni fürsətlər qazanır..."

ABŞ və İsrailin İrana qarşı apardığı müharibə artıq üçüncü həftəsinə yaxınlaşır və bunun təsiri regiondan kənara çıxaraq Ukraynadakı müharibəyə də birbaşa təsir edir.

Moderator.az xəbər verir ki, bu barədə "bbc.com" nəşri yazıb.

Nəşr yazır ki, bəzi analitiklər bu kampaniyanı Donald Tramp tərəfindən Vladimir Putin üçün "hədiyyə" kimi qiymətləndirir, baxmayaraq ki, nəticələr tam birmənalı deyil.

Sülh prosesi dalana dirənir

Müharibənin ilk nəticəsi Ukrayna-ABŞ-Rusiya danışıqlarının təxirə salınması oldu. Vladimir Zelenski bildirir ki, əsas səbəb ABŞ-ın diqqətinin Yaxın Şərqə yönəlməsidir. Eyni zamanda ABŞ kəşfiyyatı hesab edir ki, Rusiya üstünlüyünü qoruduğu üçün müharibəni dayandırmağa tələsmir. Bu fonda Trampın danışıqlardan ümumiyyətlə geri çəkilməsi ehtimalı artır.

Raket çatışmazlığı və dron üstünlüyü

Yaxın Şərqdə HHM sistemlərinin intensiv istifadəsi raket ehtiyatlarını sürətlə azaldır ki, bu da Ukrayna üçün ciddi problemdir. Bununla yanaşı, Kiyev dron texnologiyalarında üstünlük əldə edib: ucuz və effektiv pilotsuz aparatlarla "Shahed"lərin böyük hissəsi məhv edilir. Ukrayna mütəxəssislərinin artıq Yaxın Şərqə göndərilməsi də bu sahədə yeni imkanlardan xəbər verir.

Enerji böhranı və Rusiyanın qazancı

Enerji qiymətlərinin artması Rusiyaya əlavə gəlir gətirir. Xüsusilə Hörmüz boğazı ətrafındakı gərginlik bazara təsir edir. Qətərdə qaz obyektlərinə zərbələrdən sonra Avropada qiymətlər yüksəlib ki, bu da Moskvanın enerji ixracını artırmaq imkanlarını genişləndirir. Eyni zamanda Avropa üçün Ukraynaya dəstək vermək daha çətinləşir. Viktor Orban kimi liderlər artıq maliyyə paketlərini bloklayır.

Geosiyasi balans dəyişir

Müharibə NATO daxilində birliyi də sınağa çəkir. Tramp müttəfiqlərdən narazıdır və bu, alyansda gərginliyi artırır. Digər tərəfdən, İranın zəifləməsi Rusiyanın əsas tərəfdaşlarından birinin gücünü azaldır.

Ümumilikdə, bu müharibə Ukrayna üçün riskləri artırır: diplomatik proses zəifləyir, resurslar azalır və diqqət yayındırılır. Rusiya isə qısa müddətdə həm iqtisadi, həm də geosiyasi üstünlüklər əldə edən tərəf kimi görünür.