"Ukrayna və Rusiya üzərində gecə hücumları" - Ukrayna KİV-ləri

Bizi sosial şəbəkələrdən izləyin:

"Qarşılıqlı dron zərbələri və strateji obyektlərə yönələn risklər..."

Martın 2-nə keçən gecə Rusiya qüvvələri Ukrayna ərazisinə qarşı kütləvi pilotsuz uçuş aparatı hücumu həyata keçirib. Eyni gecə Rusiya ərazisində - Qara dəniz sahilində yerləşən Novorossiysk şəhərində də güclü partlayışlar və yanğınlar qeydə alınıb.

Moderator.az xəbər verir ki, bu barədə "24tv.ua" nəşri məlumat yayıb.

Ukraynaya 94 dronla hücum - HHM 84-nü zərərsizləşdirib

Ukrayna Hərbi Hava Qüvvələrinin məlumatına görə, Rusiya gecə saatlarında 94 ədəd zərbə tipli pilotsuz aparat tətbiq edib. Onların təxminən 70-i "Shahed" tipli dronlar olub. Hücumlar müxtəlif istiqamətlərdən - Oryol, Millerovo, Şatalovo, Primorsko-Axtarsk və işğal altındakı Krım istiqamətindən həyata keçirilib.

Hava hücumunun dəf edilməsində aviasiya qüvvələri, zenit-raket bölmələri, radioelektron mübarizə (REM) sistemləri, mobil atəş qrupları iştirak edib. Saat 08:00-a olan ilkin məlumata görə, HHM qüvvələri 84 düşmən dronunu məhv edib və ya sıradan çıxarıb. Buna baxmayaraq, 10 zərbə dronunun dörd müxtəlif məkana düşdüyü təsdiqlənib. Həmçinin vurulan bəzi aparatların qalıqları iki ərazidə yerə düşüb.

Məlumata əsasən, hücum səhər saatlarınadək davam edib və hava məkanında bir neçə düşmən PUA-sı qalıb. Gecə saatlarında xüsusilə Krivoy Roq şəhəri intensiv zərbəyə məruz qalıb. Zərbələr nəticəsində bir müəssisədə yanğınlar baş verib. Bundan əlavə, Ukrayna Hərbi Dəniz Qüvvələrinin bir istiqamətdə bir "Shahed" tipli dronu məhv etdiyi bildirilib.

Novorossiyskdə partlayışlar - "Şesxaris" terminalı yenidən hədəfdə

Eyni gecə Rusiya ərazisində də partlayış səsləri eşidilib. Novorossiysk şəhərində çoxsaylı partlayışlar və yanğın görüntüləri yayılıb. OSINT-analiz platforması ASTRA-nın məlumatına görə, yanğının ehtimal olunan mərkəzi "Şesxaris" neft terminalı olub.

Novorossiysk meri Andrey Kravçenko və Krasnodar diyarının qubernatoru Veniamin Kondratyev şəhərin pilotsuz aparat hücumuna məruz qaldığını təsdiqləyiblər. Onların açıqlamasına görə, şəhərdə fövqəladə vəziyyət rejimi tətbiq edilib və gecə boyu "kütləvi hücum" dəf olunub. Lakin rəsmi şəxslər terminal barədə açıq məlumat verməyiblər.

ASTRA-nın təhlil etdiyi görüntülərə əsasən, yanğının baş verdiyi ərazi böyük ehtimalla "Şesxaris" neft terminalının yerləşdiyi zonaya düşür. Yerli sakinlər də sosial şəbəkə və çatlarda yanğının məhz həmin istiqamətdə olduğunu bildiriblər.

"Şesxaris" terminalı Rusiyanın ən böyük və strateji əhəmiyyətli dəniz neft komplekslərindən biridir. O, neft və neft məhsullarının qəbulu, saxlanması və tanker gəmilərə yüklənməsi üçün istifadə olunur. Terminal Qara dəniz vasitəsilə ixrac infrastrukturunun əsas qovşaqlarından sayılır və Novorossiysk limanının fəaliyyətində mühüm rol oynayır.

Bu, sözügedən obyektə ilk hücum deyil. 2025-ci ilin noyabrında da terminal dron hücumuna məruz qalmış və genişmiqyaslı yanğın baş vermişdi. Həmin vaxt sahil qurğuları və neft bazasının zərər gördüyü açıqlanıb.

Müharibənin yeni mərhələsi: qarşılıqlı infrastruktur zərbələri

Son hadisələr göstərir ki, müharibə artıq yalnız cəbhə xətti ilə məhdudlaşmır. Tərəflər bir-birinin enerji və logistik infrastrukturunu hədəf alaraq strateji təzyiq yaratmağa çalışır.

Ukrayna tərəfi hava hücumlarını HHM vasitəsilə böyük ölçüdə zərərsizləşdirsə də, bəzi "gəlişlər" qaçılmaz olur.

Rusiya ərazisində isə xüsusilə enerji obyektlərinin hədəfə alınması iqtisadi və psixoloji təsir baxımından diqqət çəkir. Beləliklə, martın 2-nə keçən gecə həm Ukrayna, həm də Rusiya üçün qarşılıqlı dron müharibəsinin daha bir intensiv epizodu kimi tarixə düşdü. Bu tendensiya göstərir ki, pilotsuz aparatların rolu münaqişənin gələcək dinamikasında həlledici olaraq qalacaq.