"Dörd il sonra: müharibə dalana dirənib, qərar anı isə yaxınlaşır" - "The Independent"

Bizi sosial şəbəkələrdən izləyin:

"Cəbhədə status-kvo, diplomatiyada isə liderlər səviyyəsində mümkün dönüş nöqtəsi..."

Rusiyanın Ukraynaya qarşı genişmiqyaslı müharibəsi dördüncü ilini tamamlayarkən cəbhə xətti faktiki olaraq donmuş vəziyyətdədir. İlk mərhələdə sürətli irəliləyiş əldə edən Rusiya qüvvələri indi şərqdə mövqe döyüşlərinə ilişib qalıb.

Moderator.az xəbər verir ki, bu barədə "theindependent.com" nəşri yazıb.

Beynəlxalq təhlükəsizlik üzrə ekspertlər Stefan Volf və Tatyana Malyarenko, eləcə də Avropa təhlükəsizliyi üzrə mütəxəssis Jan Monne bildirirlər ki, müharibə metodları xüsusilə dron texnologiyalarının tətbiqi baxımından ciddi şəkildə dəyişib.Onların fikrincə, Moskva dronları yalnız hərbi hədəflərə deyil, Ukraynanın kritik infrastrukturuna qarşı da istifadə edir.

Bununla belə, sovet dövründən qalma "kütləvi ordu və kütləvi məhvetmə" doktrinası dəyişməyib. Hər iki tərəf kifayət qədər resurs və xarici dəstəyə malikdir ki, yaxın dövrdə mövcud status-kvonu qorusun. Tükəndirmə strategiyası davam edəcək, lakin yaxın aylarda həlledici qırılma gözlənilmir. Bu isə həm Rusiyada, həm də Ukraynada siyasi və sosial gərginliyin uzanması deməkdir.

Kreml, Tramp amili və dalandan çıxış ehtimalları

Dublin Universitet Kollecinin professoru Skott Lukas hesab edir ki, Ukrayna 2022-ci ilin yayına nisbətən daha çox əraziyə nəzarət edir. Onun qənaətincə, Vladimir Putin üçün bu müharibə strateji layihədir və Kreml minimal hədəf kimi Donetsk vilayətinin tam nəzarətini və Kiyevin zəifləməsini görür. Lukas düşünür ki, Donald Trampın ətrafından səslənən "tezliklə sülh" mesajları daha çox siyasi ritorikadır və Moskva Vaşinqtona iqtisadi layihələr təklif etməklə geosiyasi manevr etməyə çalışır.

Birminqem Universitetinin professoru Mark Vebber isə vəziyyəti "pat" adlandırır. Onun fikrincə, iki amil dönüş yarada bilər: Çinin Rusiyaya texnoloji dəstəyini azaltması və ya Avropa ölkələrinin Ukraynaya silah tədarükünü kəskin artırması. Lakin hər iki ssenari hazırda real görünmür.

800 milyardlıq bərpa planı və "imperiya" məsələsi

"Reuters"in məlumatına görə, Cenevrədə Ukrayna və ABŞ rəsmiləri müharibədən sonrakı bərpa planını müzakirə ediblər. Söhbət yaxın on ildə təxminən 800 milyard dollar həcmində vəsaitin cəlbindən gedir. Məqsəd liderlər səviyyəsində mümkün görüş üçün zəmin hazırlamaq və təhlükəsizlik zəmanətlərini dəqiqləşdirməkdir.

Prezident Ofisinin rəhbəri Kirill Budanov isə bildirib ki, Rusiya yalnız imperiya ambisiyalarından imtina edəcəyi halda region və dünya üçün təhlükə olmayacaq. Onun fikrincə, Moskvanın daxili dəyişimini gözləmək əvəzinə elə şərtlər yaradılmalıdır ki, Rusiya imperiya kimi mövcudluğunu itirsin. Əks halda, cəzasızlıq gələcəkdə yeni münaqişələr üçün zəmin yarada bilər.

Beləliklə, dörd ildən sonra müharibə hərbi baxımdan dalana dirənsə də, diplomatik və iqtisadi müstəvidə yeni mərhələnin konturları görünür. Qarşıdakı aylar həm sülh perspektivini, həm də Avropanın təhlükəsizlik arxitekturasının gələcəyini müəyyən edə bilər.