"İran ətrafında gərginlik artır: İlk zərbəni İsrail endirə bilər" - "Politico"

Bizi sosial şəbəkələrdən izləyin:

"Vaşinqton Cenevrə danışıqları öncəsi təzyiqi gücləndirir, İsrailə "F-22"-lər göndərilir..."

Yaxın Şərqdə İran ətrafında vəziyyət daha da mürəkkəbləşir.

Moderator.az xəbər verir ki, bu barədə "politico.com" nəşri yazıb

Nəşr yazır ki, Donald Trampın komandasındakı bəzi müşavirlər mümkün hərbi eskalasiya halında ilk zərbəni İsrailin endirməsini Vaşinqton üçün daha "məqbul" ssenari hesab edir. Məntiq ondan ibarətdir ki, İranın cavab reaksiyası ABŞ ictimaiyyətini sonradan mümkün müdaxiləyə daha asan inandıra bilər.

Hərbi hazırlıq və strateji hesablamalar

Vaşinqtonda uzunmüddətli müharibənin riskləri də ciddi şəkildə müzakirə olunur. Xüsusilə qeyd edilir ki, ABŞ-ın sursat və hava hücumundan müdafiə ehtiyatlarının azalması Çinə Tayvan istiqamətində fürsət pəncərəsi yarada bilər. Buna görə də ən real ssenari kimi ABŞ və İsrailin məhdud, hədəfli və qısa müddətli birgə əməliyyatı göstərilir.

Bu fonda ABŞ bölgədə hərbi mövcudluğunu artırıb. İsrailin Neqev səhrasındakı "Uvda" bazasına "F-22 Raptor" stels qırıcıları yerləşdirilib. Bundan əlavə, bölgəyə yanacaqdaşıyan və yük təyyarələri göndərildiyi bildirilir. Bu addımlar Vaşinqtonun mümkün ssenarilərə hazırlaşdığı mesajı kimi qiymətləndirilir.

Cenevrə danışıqları və sanksiya təzyiqi

Fevralın 26-da Cenevrədə ABŞ və İran arasında dolayı danışıqların növbəti raundu gözlənilir. Vaşinqton paralel şəkildə sanksiya siyahılarını genişləndirib - İranın neft satışı və ballistik raket proqramı ilə əlaqəli olduğu iddia edilən şəxslər və şirkətlər "qara siyahı"ya salınıb.

Tramp Konqresdə çıxışı zamanı mümkün sazişi təkcə nüvə proqramı ilə deyil, həm də İranın ballistik raket proqramı ilə əlaqələndirib və hərbi variantı istisna etmədiyini vurğulayıb. ABŞ Dövlət katibi Marko Rubio isə İranın raket proqramını müzakirə etməkdən imtinasını :çox böyük problem" adlandırıb.

Tehranın yumşaq tonu və riskli xətt

İranın xarici işlər naziri Abbas Araqçı Cenevrə öncəsi daha yumşaq ritorika sərgiləyərək ədalətli və bərabərhüquqlu sazişə hazır olduqlarını bildirib və İranın nüvə silahı hazırlamaq niyyətində olmadığını deyib. Halbuki bir neçə gün əvvəl Tehran hücum halında sərt cavab veriləcəyini bəyan edirdi.

Livandakı "Hizbullah" mənbələri isə ABŞ-ın İrana qarşı məhdud zərbələri halında münaqişəyə qoşulmaya biləcəklərini, lakin İranın ali liderinə qarşı mümkün hücumu "bütün qırmızı xətlərin keçilməsi" kimi qiymətləndirəcəklərini bildiriblər.

Ekspertlər genişmiqyaslı əməliyyatın nəticələrinin qeyri-müəyyən olduğunu, İranın nüvə infrastrukturu və raket potensialının tam sıradan çıxarılmasının çətinliyini vurğulayırlar. ABŞ cəmiyyətində isə yeni böyük müharibəyə dəstəyin zəif olduğu qeyd edilir. Bütün diqqətlər indi Cenevrə danışıqlarının nəticələrinə yönəlib.