"Vaşinqton Kiyevə qarşı özünün sevimli təzyiq alətini işə salıb" - "NBC News"

Bizi sosial şəbəkələrdən izləyin:

"Trampın vaxt təzyiqi, Kiyevin tələskənliyi və Moskvanın şərtləri..."

ABŞ prezidenti Donald Tramp Ukrayna müharibəsində əsas təzyiq aləti kimi vaxt məhdudiyyətlərindən istifadə edir.

Moderator.az xəbər verir ki, bu barədə "nbcnews.com" nəşri yazıb.

"Son tarixlərlə" təzyiq

Vaşinqton həm Kiyevə, həm də Moskvaya müharibəni yay aylarınadək başa çatdırmaq üçün təzyiq göstərir. Lakin nəşrin vurğuladığı kimi, bu cür son tarixlər Tramp administrasiyası üçün yeni deyil və əvvəlki cəhdlər real nəticə verməyib.

Tramp bundan əvvəl də beynəlxalq münaqişələrdə sərt “dedlayn"lar tətbiq edib. Qəzza ilə bağlı HƏMAS-a, İranla nüvə sazişi üzrə Tehrana, Rusiya-Ukrayna müharibəsi üzrə isə bir neçə dəfə konkret tarixlər təqdim olunub. Buna baxmayaraq, tərəflər bu müddətləri ardıcıl şəkildə nəzərə almayıb.

Təzyiq əsasən Ukraynaya yönəlir

Atlantik Şuranın Avrasiya Mərkəzinin eksperti Maykl Botsyurkov bildirir ki, "vaxt Ukraynanın xeyrinə işləmir" və Tramp elan etdiyi tarixlərə çatmaq üçün əsas təzyiqi məhz Kiyevə göstərəcək. Onun sözlərinə görə, Ukraynanın hərbi mövqeləri güclənən kimi Tramp və Putin arasında əlaqə yaranır və balans dəyişir.

"Chatham House"-un eksperti Kir Caylz da hesab edir ki, Tramp administrasiyası Rusiyaya təzyiq göstərməkdə istəksizdir, lakin Ukraynanı məcbur etmək üçün kifayət qədər alətlərə malikdir və bundan dəfələrlə istifadə edib.

Danışıqları sürətləndirmək cəhdi

"Reuters"-in məlumatına görə, Ukrayna xarici işlər naziri Andrey Sıbiqa danışıqların sürətləndirilməsinin vacibliyini vurğulayıb. Onun sözlərinə görə, 20 maddəlik sülh planında artıq yalnız bir neçə - ən həssas və mürəkkəb məsələ açıq qalır və bunlar liderlər səviyyəsində həll olunmalıdır.

Sıbiqa qeyd edib ki, ABŞ yaxın aylarda diqqətini daxili siyasətə, xüsusən Konqres seçkilərinə yönəldə bilər və buna görə Kiyev mövcud mərhələdə prosesi irəlilətməyə çalışır. Nazir açıq şəkildə bildirib ki, "yalnız Tramp bu müharibəni dayandıra bilər".

Moskvanın ritorikası və şərtləri

Bu fonda Rusiya xarici işlər naziri Sergey Lavrov "TV BRICS"-ə müsahibəsində Ukrayna ilə bağlı sərt mövqeni bir daha səsləndirib. O, Ukraynada guya "nasist əsaslarının" aradan qaldırılmasının Rusiya üçün təhlükəsizlik şərti olduğunu iddia edib.

Lavrov Ukraynada Rusiyaya təhlükə yaradan silahların yerləşdirilməsinə yol verilməyəcəyini bildirib və əlavə edib ki, Kreml ABŞ-ın Ukrayna ilə bağlı təkliflərini qəbul edib, lakin bu təkliflərin detalları açıqlanmayıb. O, həmçinin bildirib ki, Vaşinqton indi Alyaskada səsləndirdiyi mövqelərə belə hazır deyil.