Moskvada yüksək rütbəli rus generalına silahlı hücum: Alekseyev ağır yaralanıb - Ukrayna KİV-ləri

Bizi sosial şəbəkələrdən izləyin:

Rusiya hərbi kəşfiyyat elitasına zərbə, hadisənin detalları və generalın qaranlıq dosyesi...

Moskvada Rusiya Silahlı Qüvvələri Baş Qərargahı Baş Kəşfiyyat İdarəsinin (keçmiş BKİ) rəis müavini, general-leytenant Vladimir Alekseyevə silahlı hücum edilib.

Moderator.az xəbər verir ki, bu barədə "nv.ua" nəşri məlumat yayıb.

Məlumatda deyilir ki, naməlum şəxs generalı bir neçə dəfə güllələyərək hadisə yerindən qaçıb. Rusiya KİV-lərinin və istintaq orqanlarının məlumatına görə, hücum səhər saatlarında Alekseyevin yaşadığı binada baş verib. Müxtəlif mənbələr hadisənin Volqoqrad və ya Volokolamsk şosesində yerləşən yaşayış binasında, lift meydançasında və ya pilləkən qəfəsində baş verdiyini bildirir. Şahidlərin sözlərinə görə, bir neçə atəş səsi və kömək çağırışları eşidilib. Hadisə yerinə çıxan sakinlər generalı qan içində görüblər.

Alekseyev ağır yaralı vəziyyətdə xəstəxanaya çatdırılıb. "Baza" və "Mash" kanallarının məlumatına görə, o, reanimasiyaya yerləşdirilib və vəziyyəti ağır olaraq qiymətləndirilir. Bildirilir ki, həkimlər gələnədək general xeyli qan itirib. Rusiya İstintaq Komitəsi hadisə ilə bağlı "qəsdən adam öldürməyə cəhd" və "qanunsuz silah dövriyyəsi" maddələri üzrə cinayət işi açıldığını təsdiqləyib. Hücumu törədən şəxs axtarışdadır, təhlükəsizlik qüvvələri müşahidə kameralarının qeydlərini araşdırır.

Alekseyev kimdir və niyə hədəfə alınıb?

Vladimir Alekseyev 2011-ci ildən etibarən Rusiya Baş Qərargahının Baş Kəşfiyyat İdarəsində rəis müavini vəzifəsini tutur və rus hərbi kəşfiyyatının əsas fiqurlarından biri hesab olunur. O, Ukraynanın Vinnitsa vilayətinin Qolodki kəndində anadan olub.

2017-ci ildə Alekseyev Suriyadakı hərbi əməliyyatlarda iştirakına görə Vladimir Putin tərəfindən "Rusiya Qəhrəmanı" adına layiq görülüb. Eyni zamanda, o, Qərbdə sanksiyalarla tanınan fiqurlardandır: 2016-cı ildən ABŞ-ın, 2019-cu ildən isə Avropa İttifaqının sanksiya siyahısındadır. Sanksiyalara səbəb kimi kiberəməliyyatlar, təsir kampaniyaları və "Noviçok" maddəsi ilə bağlı işlər göstərilir.

Alekseyevin adı həmçinin "Vaqner" özəl hərbi şirkəti ilə əlaqələndirilir. Bir sıra mənbələr və jurnalistlər iddia edir ki, o, bu və digər Rusiya özəl hərbi şirkətlərinin yaradılmasında əsas rol oynayıb. 2023-cü ilin yayında Yevgeni Priqojinin qiyamı zamanı Alekseyev "Vaqner" döyüşçülərinə müraciət edərək baş verənləri "dövlət çevrilişi" və "ölkəyə arxadan zərbə" adlandırmışdı.

Ukraynalı jurnalist Denis Kazanskinin xatırlatdığına görə, İqor Girkin-Strelkov da əvvəllər Alekseyevin bir sıra gizli əməliyyatların arxasında dayandığını iddia edib. Qərb araşdırmalarında isə generalın adı Solsberidə "Noviçok"dan istifadə olunan hücum və ABŞ-da 2016-cı il prezident seçkilərinə müdaxilə iddialarında hallanıb.

Moskvada ardıcıl hücumlar fonunda

Bu hadisə Moskvada yüksək rütbəli hərbçilərə qarşı ilk hücum deyil. 2025-ci il dekabrın 22-də paytaxtda partladılan avtomobildə general-mayor Fanil Sarvarov həlak olmuşdu. Ertəsi gün "Bild" nəşri partlayışın planlı sui-qəsd əlamətləri daşıdığını, avtomobilin altına mina yerləşdirildiyini yazmışdı.

Alekseyevə qarşı hücum da Rusiya daxilində təhlükəsizlik sisteminin zəifləməsi və elita daxilində mümkün qarşıdurmalarla bağlı sualları yenidən gündəmə gətirib.