"Ukrayna və Rusiya arasında Əbu-Dabidə iki günlük danışıqlar nəticəsiz yekunlaşıb" - "Reuters"

Bizi sosial şəbəkələrdən izləyin:

"Qapalı formatda keçirilən görüşlərdə Donbas tələbi əsas maneə olaraq qalır..."

Əbu-Dabidə Ukrayna ilə Rusiya arasında müharibənin dayandırılması ilə bağlı iki günlük birbaşa danışıqlar keçirilib. Görüşlərin yeri və müzakirələrin detalları qapalı saxlanılıb.

Moderator.az xəbər verir ki, bu barədə "reuters.com" agentliyi məlumat yayıb.

Qapalı format və iştirakçıların tərkibi

Danışıqların BƏƏ-də təşkili siyasi və media təzyiqindən uzaq mühit yaratmaq məqsədi daşıyır. Rusiya tərəfini danışıqlarda yalnız Müdafiə Nazirliyinin nümayəndələri təmsil edib. Nümayəndə heyətinə Baş Qərargahın Baş İdarəsinin rəisi, admiral İqor Kostyukov rəhbərlik edib.

Ukrayna nümayəndə heyəti isə daha geniş tərkibdə olub: Milli Təhlükəsizlik və Müdafiə Şurasının katibi Rüstəm Ömərov, Prezident Ofisinin rəhbəri Kirill Budanov, onun birinci müavini Sergey Kislitsa, Ali Radada "Xalqın Xidmətçisi" fraksiyasının rəhbəri David Araxamiya və Baş Qərargah rəisi general-leytenant Andrey Qnatov. Danışıqlara ABŞ tərəfindən prezidentin xüsusi nümayəndəsi Stiv Uitkoff və Donald Trampın kürəkəni Cared Kuşner nəzarət edib.

Ərazi tələbləri və "Ankoric formulu"

Ukrayna prezidenti Vladimir Zelenskinin sözlərinə görə, danışıqların əsas mövzusu "sonuncu həll olunmamış məsələ" - ərazi problemidir. Tərəflər bir-birinə öz təkliflərini təqdim edib. Qərb mediasının məlumatına görə, ABŞ və Ukrayna Rusiya tərəfinə "enerji atəşkəsi" ideyasını - Rusiya neft obyektlərinə zərbələrin dayandırılması qarşılığında Ukraynanın enerji infrastrukturuna raket hücumlarının dayandırılması ideyasını irəli sürüb.

Kreml isə öz mövqeyində israrlıdır. Prezidentin mətbuat katibi Dmitri Peskov bildirib ki, əsas şərt Ukrayna Silahlı Qüvvələrinin Donbasdan çıxmasıdır. Moskva eyni zamanda məzmunu açıqlanmayan "Ankoric formulu"na istinad edir. Qərb mediası yazır ki, bu formul cəbhə xəttinin dondurulmasını və Ukrayna qoşunlarının Donetsk və Luqansk vilayətlərindən tam çıxarılmasını nəzərdə tutur.

İkinci günün yekunu və perspektivlər

Danışıqların ikinci günü də gərgin atmosferdə keçib. "Reuters" və "Sky News"-un məlumatına görə, tərəflər arasında kompromisə dair real irəliləyiş qeydə alınmayıb. Əsas ziddiyyət nöqtəsi - Donetsk vilayəti dəyişməz qalıb. Rusiya Donbasın tam şəkildə Ukrayna tərəfindən güzəştə gedilməsini müharibənin dayandırılması üçün əsas şərt kimi irəli sürür. Ukrayna isə bu tələbi qəti şəkildə rədd edir və bildirir ki, Rusiya bu əraziləri uzunmüddətli müharibəyə baxmayaraq hərbi yolla ələ keçirə bilməyib.

"Axios" nəşrinin jurnalisti Barak Ravid ukraynalı rəsmilərə istinadən danışıqları "konstruktiv" adlandırsa da, "Sky News"-un Moskva müxbiri Ayvor Bennet yaxın vaxtlarda ciddi irəliləyiş gözləməyin real olmadığını vurğulayıb. Ekspertlərin fikrincə, ərazi məsələsi həll olunmadıqca Abu-Dabi formatı real sülhə deyil, tərəflərin mövqelərini bir daha sərtləşdirdiyi platformaya çevrilə bilər.