"Rusiya Ukraynaya kütləvi hava hücumu etdi, Kiyev və bölgələrdə itkilər var" - Ukrayna KİV-ləri

Bizi sosial şəbəkələrdən izləyin:

"Gecə hücumları və cavab zərbələri fonunda müharibədə yeni eskalasiya..."

Ukrayna Silahlı Qüvvələri Hərbi Hava Qüvvələrinin məlumatına görə, yanvarın 5-nə keçən gecə Rusiya Ukraynaya qarşı genişmiqyaslı hava hücumu həyata keçirib.

Moderator.az xəbər verir ki, bu barədə "oboz.ua" nəşri məlumat yayıb.

Gecə hücumu və HHM-in fəaliyyəti

Məlumatda deyilir ki, hücum zamanı 9 ballistik raket və 165 zərbə dronu daxil olmaqla ümumilikdə 174 hava hücum vasitəsi tətbiq olunub. HHM qüvvələri ölkənin şimal, mərkəz və şərq bölgələrində 137 hədəfi zərərsizləşdirib.

Bununla belə, raket və dronların bir hissəsi hədəflərə çatıb, bir neçə bölgədə dağıntılar və yanğınlar qeydə alınıb. Hücumda əsasən "Shahed" tipli kamikadze dronlardan istifadə edildiyi bildirilib.

Mülki obyektlər hədəfdə

Kiyevin Obolon rayonunda yerləşən dördmərtəbəli özəl xəstəxanaya birbaşa zərbə endirilib. Rəsmi məlumatlara görə, stasionar müalicədə olan 1995-ci il təvəllüdlü bir kişi həlak olub, bir neçə nəfər yaralanıb, onlardan ikisinin vəziyyəti ağırdır. Hadisə zamanı xəstəxanada olan pasiyentlərin bir qismi paytaxtın digər tibb müəssisələrinə köçürülüb.

Kiyev vilayətinin Fastov rayonunda da yaşayış evinə düşən zərbə nəticəsində 1951-ci il təvəllüdlü mülki şəxs həyatını itirib. Slavutıç şəhəri isə infrastruktur obyektlərinə zərbələr səbəbindən müvəqqəti olaraq işıqsız qalıb və kritik sistemlər ehtiyat enerji ilə təmin olunub.

Ukraynanın Rusiyaya cavab zərbəsi

Eyni gecə Ukrayna Silahlı Qüvvələri Rusiyanın arxa cəbhəsində yerləşən hərbi sənaye obyektinə pilotsuz uçuş aparatları ilə cavab zərbəsi endirib. Sosial şəbəkələrdə yayılan məlumatlara görə, Lipetsk vilayətinin Yelets şəhərində dronlar üçün komponentlər istehsal edən müəssisənin ərazisində güclü yanğın baş verib.

Mənbələr bildirir ki, sözügedən obyekt Rusiya ordusunun pilotsuz sistemlərinin təminat zəncirində mühüm rol oynayır və müharibə dövründə artıq bir neçə dəfə hücumlara məruz qalıb. Beləliklə, sülh axtarışlarına rəğmən, qarşılıqlı hücumlar Ukrayna savaşında yeni eskalasiya mərhələsindən xəbər verir.