"Rusiya Ukraynaya yeni hava zərbəsi endirib: 95 drondan 80-ni zərərsizləşdirilib" - Ukrayna KİV-ləri

Bizi sosial şəbəkələrdən izləyin:

"Gərginlik artır, hava hücumları fonunda mülki və enerji infrastrukturu hədəfə çevrilir..."

Yanvarın 3-nə keçən gecə Rusiya Ukraynaya qarşı növbəti kütləvi hava hücumu həyata keçirib.

Moderator.az xəbər verir ki, bu barədə "oboz.ua" nəşri məlumat yayıb.

Ukrayna Silahlı Qüvvələri Hərbi Hava Qüvvələrinin məlumatına görə, hücum zamanı ümumilikdə 95 hava hücum vasitəsi - əsasən "Shahed" tipli kamikadze dronlar istifadə olunub. Ukrayna HHM qüvvələri onların 80-ni məhv edib və ya radioelektron vasitələrlə sıradan çıxarıb.

Hücumun coğrafiyası və nəticələri

Dronlar Rusiya ərazisindən - Millerovo, Kursk, Oryol, Bryansk, Primorsko-Axtarsk istiqamətlərindən, eləcə də müvəqqəti işğal altında olan Krımdakı Kaça, Çauda və Qvardeyskdən buraxılıb. Hücumların qarşısının alınmasında aviasiya, zenit-raket bölmələri, REM vasitələri və mobil atəş qrupları iştirak edib.

Bununla belə, 15 zərbə dronunun 8 müxtəlif ərazidə hədəfə çatdığı, daha iki nöqtədə isə vurulmuş dronların qalıqlarının düşdüyü bildirilir. Zərbələrin konkret nəticələri ilə bağlı məlumatlar dəqiqləşdirilir.

Enerji infrastrukturu və mülki obyektlər də hədəfdədir

Son hücumlar fonunda Rusiya Ukraynanın enerji infrastrukturuna təzyiqləri də davam etdirir. Yanvarın 2-də Nikolayev və Zaporojye istiqamətlərində endirilən zərbələr nəticəsində bir sıra regionlarda minlərlə abonent işıqsız qalıb. Eyni zamanda Odessa və Kiyev vilayətlərində əvvəlki hücumlar zamanı zədələnmiş avadanlıqların bərpası davam edir.

Bununla paralel olaraq, Xarkovda yaşayış binasına endirilən raket zərbəsi nəticəsində uşaq ölümü də daxil olmaqla onlarla mülki şəxs xəsarət alıb. Dağıntılar altında insanların qaldığı bildirilir, xilasetmə əməliyyatı davam edir.

Kəşfiyyat qurumlarından xəbərdarlıq

Ukraynanın xarici kəşfiyyat qurumları isə Rusiyanın yaxın günlərdə, xüsusilə yanvarın 7-si ərəfəsində böyük insan tələfatı ilə nəticələnə biləcək təxribat hazırladığını istisna etmir. Mümkün hədəflər arasında "simvolik" və ya dini obyektlərin olduğu bildirilir.