"2026 - dəyişikliklər, qeyri-sabitlik və yeni imkanlar ili" - Astroloqlardan xəbərdarlıq

"Qarşıdan gələn il həm sarsıdıcı, həm də taleyüklü olacaq..."

2026-cı il artıq astanadadır və astroloqların proqnozlarına görə, bəşəriyyət miqyaslı dəyişikliklər dövrünə qədəm qoyur.

Moderator.az xəbər verir ki, bu barədə "cursorinfo.co" nəşri yazıb.

Ulduz xəritələri göstərir ki, bir neçə əsas planetin Od və Hava ünsürlərinə keçidi bu ili yeniliklər, şəffaflıq və texnoloji sıçrayışlar ili kimi formalaşdıracaq. Siyasi, mədəni və informasiya böhranları ilə yadda qalan 2025-dən sonra, 2026 bir növ dönüş nöqtəsi kimi qiymətləndirilir.

Planet keçidləri və qlobal transformasiya

Astroloji mənzərəyə görə, Saturn Balıqlar bürcündəki mərhələsini başa vuraraq Qoç bürcünə keçir və bununla da növbəti üç il üçün struktur dəyişikliklərinin əsasını qoyur. Bu keçid emosional qeyri-müəyyənlik dövrünün bitməsi və məsuliyyətlə birləşən təşəbbüs mərhələsinin başlanğıcı kimi şərh olunur. 

Astroloqlar bu prosesi düşünülmüş və məqsədli addımlar atan təcrübəli döyüşçünün hərəkətlərinə bənzədir. Eyni zamanda, Neptun 165 ildən sonra ilk dəfə Qoç bürcünə daxil olur. Bu, misilsiz yaradıcılıq imkanları açmaqla yanaşı, ideoloji toqquşmalar, yanlış illüziyalar və dünyagörüşü ətrafında mübahisələr riskini də artırır. İnformasiya texnologiyaları və ünsiyyət sahəsində tamamilə yeni yanaşmalar formalaşacaq.

Uranın yeddi illik dövr üçün Əkizlər bürcünə keçidi isə kommunikasiya, məlumat mübadiləsi və birgə layihələrdə inqilabi dəyişikliklər vəd edir. Süni intellektin sürətli inkişafı və alternativ məlumat kanallarının yaranması gündəlik həyatın ayrılmaz hissəsinə çevrilə bilər.

Plutonun artıq Dolça bürcündə olması və orada təxminən 20 il qalması kollektiv dəyərlərin fərdi maraqlardan üstün tutulduğu uzunmüddətli sistem dəyişiklikləri dövrünü göstərir. Gizli proseslər və ört-basdır edilmiş məlumatlar üzə çıxacaq, bu da cəmiyyətdə daha çox şəffaflıq və bərabərlik tələbi yaradacaq.

"Sabit qeyri-sabitlik" və şəxsi seçimlərin rolu

Ezoterika mütəxəssisləri və astroloqlar 2026-cı ili "sabit qeyri-sabitlik" ili adlandırır. Məşhur astroloq və taroloq Lesya Şumanskayanın sözlərinə görə, bu il hadisələr sürətlə inkişaf edəcək, fürsətlər qəfil ortaya çıxıb eyni sürətlə də yox ola bilər. Lakin bu xaos fəlakət deyil,  əksinə, düzgün mövqe tutanlar üçün böyük imkanlar məhz bu şəraitdə yaranır.

Astroloqların fikrincə, 2026-cı il hərəkətdə olan, risk almağa və dəyişikliklərə uyğunlaşmağa hazır insanlar üçün taleyüklü olacaq. Gözləmə mövqeyi, passivlik və məsuliyyətdən qaçış isə əldən çıxan şanslar və ümumi uğursuzluq hissi ilə nəticələnə bilər.

Müsbət tərəflər arasında gözlənilməz fürsətlər, karyera və yaşayış yerinin dəyişməsi, beynəlxalq imkanlar, dünyagörüşünün genişlənməsi və peşəkar nüfuzun artması göstərilir. Mənfi tərəflər isə hadisələrə nəzarətin itməsi, tələsik qərarlar, psixoloji gərginlik və özünü "şərtlərin qurbanı" kimi hiss etmə riskidir.

Bürclər üçün ümumi istiqamət və tövsiyələr

Astroloji baxımdan 2026-cı il şərti olaraq iki mərhələyə bölünür. İlin ilk yarısında bəzi bürclər üçün köhnə proseslərin tamamlanması, borcların bağlanması və daxili təmizlənmə ön plana çıxır. Yayın sonuna doğru isə Ay düyünlərinin mövqeyi dəyişir və bu, yeni bürclər üçün transformasiya dövrünün başlanğıcı deməkdir.

Mütəxəssislər bildirir ki, bu il hər kəs üçün əsas dayaq nöqtəsi bilik, bacarıq və peşəkarlığın artırılması olacaq. Şans yalnız hazır olanlara gülümsəyəcək. İntuisiya güclənəcək, lakin əsas şərt çevik qalmaq, hadisələrə müqavimət göstərmək əvəzinə onlarla birlikdə hərəkət etməkdir.

Astroloqların yekdil mövqeyi belədir: 2026 sakit il olmayacaq, lakin cəsarət, açıq düşüncə və daxili balansı qoruyanlar üçün həm şəxsi inkişaf, həm də texnoloji və sosial sıçrayış baxımından unikal imkanlar yaradacaq.