Tanışına söyüş üstündə dəmir parçası ilə xəsarət yetirən “moyşik”in cəzası azaldıldı

Gəncə Apellyasiya Məhkəməsində qəsdən sağlamlığa ağır zərər vurmada təqsirləndirilən Uğur Pənahovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

Hakim Müşfiq Məmmədovun sədrliyi ilə keçirilən prosesdə qərar elan olunub.

Qərara əsasən, apellyasiya şikayəti qismən təmin edilib, Gəncə Ağır Cinayətlər Məhkəməsinin hökmü dəyişdirilib, 3 il 6 ay müddətə azadlıqdan məhrumetmə cəzasının həddi azaldılaraq 3 ilə endirilib.

İttihama görə, hadisə 16 noyabr 2023-cü il tarixdə saat 10 radələrində Gədəbəy şəhəri, 20 Yanvar küçəsində yerləşən “Avtovağzal Kompleksi”nin ərazisində fəaliyyət göstərən avtoyuma məntəqəsində baş verib.

Belə ki, Uğur Pənahov həmin avtoyuma məntəqəsində işlədiyi vaxt avtomobilini yuduzdurmaq üçün ora gəlmiş tanışı, zərərçəkmiş İbrahim İbrahimovla (adı, soyadı şərtidir) aralarında şəxsi münasibətlərin pozulması zəminində mübahisə yaranıb. Mübahisəyə səbəb kimi zərərçəkmiş şəxsin avtomobilin yuyulması ilə bağlı işlətdiyi nalayiq ifadə göstərilib.

Bu zaman təqsirləndirilən şəxs yerdən götürdüyü dəmir parçası ilə İbrahimə qəsdən zərbələr endirib. Hadisə nəticəsində zərərçəkmiş şəxsə müxtəlif dərəcəli bədən xəsarətləri yetirilib.

Gəncə Ağır Cinayətlər Məhkəməsinin hökmü ilə təqsirləndirilən şəxs törətdiyi əmələ görə təqsirli bilinərək 3 il 6 ay müddətinə azadlıqdan məhrum etmə cəzasına məhkum edilmişdi.

(Pravda.az)