"Ukrayna üzrə yeni kompromis: Donbas üçün demilitarizasiya və ağır seçimlər" - "The Telegraph"

Bizi sosial şəbəkələrdən izləyin:

"Ukrayna xalqı ədalətli olmayan kompromisi qəbul etməyəcək..."

Kiyev Donbas boyunca qarşılıqlı demilitarizasiya zonasının yaradılması ideyasını müzakirə edir.

Moderator.az xəbər verir ki, bu barədə "The Telegraph" nəşri yazıb.

Demilitarizasiya ideyası və Qərbin təzyiqləri

Nəşr yazır ki, söhbət Ukrayna və Rusiyanın eyni anda qoşunları geri çəkməsindən gedir. ABŞ administrasiyası isə bu ərazini artıq "demilitarizasiya zonası" və ya "azad iqtisadi zona" kimi adlandırır. Ukrayna prezidentinin müşavirləri bildirir ki, belə bir zona yalnız simmetrik geriçəkilmə, monitorinq missiyaları və xarici kontingentin nəzarəti ilə mümkündür.

Zelenski açıq deyir ki, indiki variantda "boşluqlar çoxdur" - ərazinin kim tərəfindən idarə ediləcəyi və Rusiyanın öhdəliklərə əməl edib-etməyəcəyi tam bilinmir. Berlin, Paris və London da bu modelə ehtiyatla yanaşır. Almaniya kansleri Mers vurğulayır ki, Ukraynanı ədalətsiz razılaşmaya məcbur etmək olmaz, çünki bunu Ukrayna xalqı qəbul etməyəcək.

Zelenskinin mövqeyi və Trampın planına etiraz

Zelenski jurnalistlərə açıqlamasında bildirib ki, Vaşinqtonun təklif etdiyi kompromis hazırkı formada "dəqiq Ukraynanın maraqlarına uyğun deyil". Tramp administrasiyasının ideyası belədir: Ukrayna qoşunları Donetsk vilayətindən çıxır, Rusiya isə ora daxil olmur. Lakin prezident sual edir: niyə yalnız Ukraynadan geri çəkilmə tələb olunur?

Ukrayna tərəfi öz kontrplanını təqdim edib: qoşunların tam simmetrik geri çəkilməsi, ərazinin Ukraynaya məxsus olaraq qalması, ABŞ-dan uzunmüddətli təhlükəsizlik zəmanətlərinin müzakirəsi. Eyni zamanda "sızan" yeni Tramp planında Krım və Donbas üzərində faktiki rus nəzarəti, HHM məhdudiyyətləri və NATO qüvvələrinin yerləşdirilməməsi kimi bəndlər qalmaqdadır.

Ordunun sayı, ağır seçimlər və regional risklər

Ukrayna-Rusiya danışıqlarının layihəsində ordunun sayı ilə bağlı maddə də razılaşdırılıb. Zelenskinin sözlərinə görə, sənəd hazırkı 800 minlik Ukrayna ordusunun qorunmasını nəzərdə tutur. Bu, əvvəllər səsləndirilmiş 40-50 minlik məhdudiyyətlərdən tamamilə uzaqdır və Kiyev üçün prinsipial məsələdir.

Türkiyənin xarici işlər naziri Hakan Fidan isə Avropanı Kiyevə "çox ağır, amma qaçılmaz qərarlarda" dəstək verməyə çağırır. O bildirir ki, müharibə artıq Qara dənizə yayılıb və genişlənmə riski mövcuddur. Bu arada Tramp iddia edir ki, təklif olunan planı yalnız Zelenski bəyənmir, "onun komandasındakı bir çoxları isə müsbət yanaşır". Avropa liderləri isə ABŞ-ı xəbərdar edir: Ukraynanı xalqın qəbul etməyəcəyi sülhə məcbur etmək olmaz.