"Trampın "sülh planı" ətrafında artan gərginlik: ABŞ, Ukrayna və Avropa 13 dekabr görüşünə ümid bağlayır" - "Axios"

Bizi sosial şəbəkələrdən izləyin:

"Tramp həm Ukraynadan, həm də Rusiyadan son dərəcə məyusdur..."

ABŞ prezidenti Donald Tramp Ukrayna müharibəsinin dayandırılması üçün irəli sürdüyü "sülh planı"nın yalnız Vladimir Zelenski tərəfindən qəbul edilmədiyini bildirib.

Moderator.az xəbər verir ki, bu barədə "Axios" nəşri yazıb.

Trampın narazılığı və Zelenskiyə yönəlik tənqidlər

Tramp iddia edir ki, "Zelenskidən başqa hamı razıdır", onun komandasının isə plana "sevinclə yanaşdığını" deyir. ABŞ lideri həmçinin Vaşinqtonun həm Moskva, həm Kiyev ilə razılaşmaya "çox yaxın" olduğunu söyləyərək, prosesi özünün biznes təcrübəsi ilə müqayisə edib: "Ukrayna müharibəsini bitirmək daşınmaz əmlak sövdələşməsindən min dəfə çətindir".

Trampın sözlərinə görə, plan 4-5 maddədən ibarət olub ərazi bölgüsünü nəzərdə tutur və bu səbəbdən danışıqlar daha da çətinləşir. O, noyabr ayında təxminən 25 min insanın həlak olduğunu bildirərək "qətllərin dayanmasını" istəyir və belə müharibələrin qlobal eskalasiyaya çevrilə biləcəyini vurğulayır.

Tramp "boş görüşlərdən" yorulub

Ağ Evin sözçüsü Kerolayn Levitt bəyan edib ki, Tramp həm Ukraynadan, həm də Rusiyadan "son dərəcə məyusdur". Onun sözlərinə görə, prezident artıq "görüş xatirinə görüş" istəmir və real addımlar görməyincə danışıqları davam etdirməyə meylli deyil.

Dekabrın 13-də keçirilməsi planlaşdırılan növbəti ABŞ-Ukrayna görüşü də yalnız bir şərtlə - amerikalılar real sülh sazişi imkanı gördüyü halda baş tutacaq. Ukrayna isə bildirir ki, Vaşinqtonun Donbas üzrə təklif etdiyi "kompromis" hələ də qeyri-müəyyəndir. Kiyev təkidlə qeyd edir: hər hansı geri çəkilmə yalnız qarşılıqlı, ədalətli və monitorinq altında baş verə bilər.

ABŞ, Avropa İttifaqı və Ukrayna bir masada

Dekabrın 13-də Parisdə ABŞ rəsmiləri ilə Ukrayna, Fransa, Almaniya və Böyük Britaniyanın təhlükəsizlik müşavirləri "Tramp planı"nı müzakirə edəcəklər. ABŞ-ı kimin təmsil edəcəyi hələ bəlli deyil. Danışıqlara Trampın xüsusi elçisi Stiv Uitkoff və onun məşhur müşaviri Cared Kuşner rəhbərlik edir. Zelenski və Avropa liderləri isə Tramp ilə birgə telefon danışığına nail olmağa çalışır.

Ukraynanın Vaşinqtona təqdim etdiyi son cavab variantında mübahisəli mövzular, xüsusən ərazi məsələləri və Zaporojye AES-in statusu üzrə yeni ideyalar yer alır. Bütün tərəflər danışıqların intensivləşdiyini qəbul etsə də, hələlik yekun razılaşma yoxdur. ABŞ və Avropa kompromis axtarır, Kiyev ədalətli şərtlər tələb edir, Tramp isə səbrli deyil.