"Ukrayna üzrə danışıqlar həlledici mərhələyə keçir" - "The Washington Post"

Bizi sosial şəbəkələrdən izləyin:

"Kiyev, Vaşinqton və Avropa paytaxtları arasında diplomatik proses fəallaşır..."

ABŞ prezidenti Donald Trampın komandası Ukrayna-Rusiya müharibəsini dayandırmaq üçün Koreya yarımadasına bənzər model hazırlayıb.

Moderator.az xəbər verir ki, bu barədə "The Washington Post" nəşri yazıb.

Koreya modeli və əsas şərtlər

Nəşr yazır ki, sənəd atəşkəs xətti boyunca demilitarizasiya olunmuş zona, ağır silahların qadağan edilməsi və sərt nəzarət mexanizmlərini nəzərdə tutur.

Planın siyasi hissəsinə Ukraynanın 2027-ci ildə Aİ-yə qəbul perspektivi, NATO-nun 5-ci maddəsinə bənzər təhlükəsizlik zəmanətləri və Zaporojye AES-in Kiyevə qaytarılması daxildir.

Ən böyük mübahisə doğuran məqam isə Donetskin bir hissəsinə dair mümkün güzəştlərdir. Zelenski administrasiyası bunu təhlükəli sayır və konstitusion dəyişikliklərə getməkdən imtina edir.

Kiyevin cavab sənədi və yeni tələblər

"Axios"-un məlumatına görə, Kiyev Trampın 20 maddəlik planına artıq öz cavab paketini göndərib. Sənəddə Ukraynanın ərazi bütövlüyü, təhlükəsizlik zəmanətləri və Zaporojye AES üzərində tam nəzarətlə bağlı düzəlişlər yer alır.

Zelenski bildirib ki, Ukrayna müharibənin başa çatdırılması üçün 20 baza maddə üzrə öz baxışını formalaşdırıb və ABŞ-la birgə iqtisadi bərpa planı üzərində işləyən qrup fəaliyyətini davam etdirir.

Bundan əlavə, Ukrayna dekabrda Rusiya nefti daşıyan tanker donanmasına qarşı yeni sanksiyalar paketi təqdim edəcək və Avropa ölkələrinin də əlavə məhdudiyyətləri gözlənilir.

İtaliyanın təzyiqi və Avropanın mövqeyi

"Corriere della Sera" yazır ki, İtaliyanın baş naziri Corca Meloni Romadakı görüşdə Zelenskini müəyyən kompromisləri nəzərdən keçirməyə çağırıb. İtaliya Vaşinqtonun sürətli sülh təşəbbüsünü dəstəkləyir və danışıqlarda elastikliyin vacibliyini vurğulayır.

Kiyev isə Romadan dondurulmuş Rusiya aktivlərinin Ukraynanın bərpasına yönəldilməsini və ABŞ silahlarının maliyyələşdirilməsi proqramına daha aktiv qoşulma gözləyir. Lakin İtaliya hazırda NATO-nun ABŞ silahlarının tədarük mexanizminə qoşulmaqdan imtina edən ilk Avropa ölkəsidir.

ABŞ-ın Koreya modelinə əsaslanan planı, Kiyevin düzəlişləri və Avropanın, xüsusilə də İtaliyanın artan təzyiqi danışıqları kritik mərhələyə gətirib. Nəticə Tramp administrasiyasının nə qədər çevik davranacağından asılı olacaq.