"Ukraynada növbəti gecə hücumları: Odessa limanları və Balakleya yaşayış məhəllələri hədəfə alınıb" - Ukrayna mətbuatı

Bizi sosial şəbəkələrdən izləyin:

"Enerji sisteminə və dinc əhaliyə zərbələr nəticəsində yaralılar arasında uşaqlar da var..."

Odessa yenidən dronlarla vurulub

Ukrayna mediasının məlumatına görə, 17 noyabr gecəsi Rusiya ordusu Odessa vilayətini kütləvi şəkildə kamikadze dronlarla vurub. Odessa regional administrasiyasının rəhbəri Oleq Kiper bildirib ki, zərbələr liman və enerji infrastrukturuna endirilib və bir neçə partlayış qeydə alınıb.

Onun sözlərinə görə, HHM-in fəal işi dağıntıların miqyasını azaltsa da, nəticədə liman avadanlıqları, mülki gəmilər və enerji şəbəkələri zədələnib. Hadisə zamanı 18 yaşlı bir gənc yaralanıb. İzmail bölgəsində elektrik təchizatı təxribatdan sonra qismən dayanıb, həyati infrastrukturlar generatorlarla işləyir. Xəstəxanalar, sosial müəssisələr və su təchizatı sistemi ehtiyat enerji ilə fəaliyyətini davam etdirir.

Ukraynanın Baş Prokurorluğu bu hücumu "hərbi cinayət" kimi araşdırmağa başlayıb. Hadisə yerində polis və prokurorluq əməkdaşları işləyir. Dövlət Xidmətinin məlumatına görə, liman və enerji obyektlərində çaxan yanğınların söndürülməsi üçün 40-a yaxın xilasedici və yanğınsöndürmə texnikası cəlb olunub.

Xarkov vilayətində raket zərbəsi: ölənlər var, uşaqlar yaralanıb

Eyni gecə Rusiya raketləri Xarkov vilayətindəki Balakleya şəhərinə düşüb. Şəhər hərbi administrasiyasının rəhbəri Vitali Karabanovun sözlərinə görə, hücum nəticəsində ən azı üç nəfər həlak olub.

İlkin məlumata görə, ən azı 10 nəfər yaralanıb, onların arasında 12, 14 və 15 yaşlı uşaqlar da var. Yaralıların çoxu xəstəxanaya yerləşdirilib, bəzilərinə yerində tibbi yardım göstərilib.

Zərbələr nəticəsində çoxmərtəbəli yaşayış binaları və avtomobillər ciddi ziyan görüb. Qəza xidmətləri dağıntılar altında qalanların olub-olmadığını müəyyənləşdirmək üçün axtarışları davam etdirir.

Eyni strategiya - enerji zərbələri və mülki hədəflər

Son günlər Rusiya ordusu hücumlarının coğrafiyasını dəyişmədən taktikanı sərtləşdirib. Xüsusilə enerji sistemləri və liman infrastrukturları ardıcıl məqsədli atəşə tutulur.

Noyabrın 16-da Odessa yaxınlığında günəş elektrik stansiyası zədələnib. Noyabrın 15-də Nijnin şəhərində enerji qovşağına zərbə endirilib. Noyabrın 14-dəRusiya Ukrayna ərazisinə 430-dan çox dron və 18 raket buraxıb, əsas hədəf isə Kyiv olub. O hücumda ən azı 6 nəfər ölüb, 30-dan çox insan yaralanıb.

Ukrayna hakimiyyəti bildirir ki, qış yaxınlaşdıqca hücumlar daha çox enerji sistemlərini iflic etməyə yönəlib və bu, humanitar böhran riskini artırır.

Moderator.az