"Gürcüstanda prezident sarayına hücum müxalifətdə parçalanma yaradıb" - "Deutsche Welle"

Bizi sosial şəbəkələrdən izləyin:

"Müxalifətin parçalanması və zorakı etirazlar ölkəni yeni repressiyalarla üz-üzə qoyur..."

Oktyabrın 4-də Gürcüstanda keçirilən bələdiyyə seçkilərində hakim "Gürcü arzusu" partiyası bütün bələdiyyələrdə qalib gəldiyini elan edib.

Moderator.az xəbər verir ki, bu barədə "dw.com" nəşri məlumat yayıb.

"Gürcü arzusu" seçkilərdə qalib gəldiyini elan edib.

Rəsmi məlumata görə, səslərin 75 faizinin hesablanması nəticəsində partiya 81 faiz səs toplayıb. Tbilisinin meri vəzifəsini isə yenidən Kaxa Kaladze qoruyub saxlayıb. Baş nazir İrakli Kobaxidze partiyanın qurucusu Bidzina İvanişviliyə xüsusi təşəkkürünü bildirib.

Seçici fəallığı rekord dərəcədə aşağı olub: cəmi 40 faiz seçici səsvermədə iştirak edib. Xüsusilə Tbilisidə fəallıq 31 faizi keçməyib. Bu göstəricilər müxalifətin legitimlik iddialarını gücləndirsə də, onların seçkiləri boykot etməsi nəticəsində hakim partiyanın rəqibsiz qalması mümkün olub.

Müxalifətin parçalanmış strategiyası

Əsas müxalifət qüvvələrinin bir hissəsi seçkilərdə iştirakdan imtina edərək hakimiyyəti qeyri-legitim sayıb. Yalnız bəzi partiyalar - "Lelo - güclü Gürcüstan" və "Qaxariya Gürcüstan naminə" seçkilərə qatılmağı zəruri hesab edib. Lakin ümumi mənzərə müxalifətin parçalanmasını və gücsüzlüyünü üzə çıxarıb. Seçkiləri izləmək üçün nə ATƏT, nə də yerli QHT-lər iştirak etməyib. Xarici jurnalistlərin ölkəyə buraxılmaması da prosesin şəffaflığına dair sualları artırıb.

Etirazların kəskin dönüşü

Boykot çağırışlarını müşayiət edən müxalifət mitinqləri axşam saatlarında gərginləşib. Tbilisinin Azadlıq meydanına toplaşan on minlərlə insan arasında prezident sarayının ələ keçirilməsi çağırışları səslənib. Müxalif liderlərdən Murtaz Zodelava və başqaları xalqı dövlət institutlarını ələ keçirməyə dəvət edib.

Bir qrup etirazçı Orbeliani sarayına yürüş edib, digərləri isə mitinqi tərk etməyə başlayıb. Polis gözyaşardıcı qaz və su şırnaqları tətbiq edərək hücum cəhdini dağıdıb. Toqquşmalar nəticəsində barrikadalar qurulub, küçələrdə yanğınlar törədilib. Səhiyyə Nazirliyi 6 nümayişçinin və 21 polisin xəsarət aldığını bildirib.

Hakimiyyətin reaksiyası və yeni həbslər

Baş nazir Kobaxidze baş verənləri "dövlət çevrilişi cəhdi" adlandırıb və sərt həbslərin anonsunu verib. Daxili İşlər Nazirliyi etiraz təşkilatçılarına qarşı cinayət işləri açıb. Gecə saatlarında onların hamısı saxlanılıb, onlara 9 ilə qədər həbs cəzası verilə bilər. Hökumət bəyan edib ki, şiddət çağırışlarının arxasında xarici xüsusi xidmət orqanlarının əli var. Rəsmi şəxslər hətta Avropa İttifaqının Tbilisidəki nümayəndəsini də qarşıdurmaya dəstək verməkdə günahlandırıb.

Müxalifət daxilində böhran və parçalanma

Hadisələr müxalifətin daxilində də fikir ayrılığı yaradıb. Eks-prezident Salome Zurabişvili zorakı üsullardan imtina etməyə çağırıb. Bir sıra partiya liderləri hücumu məsuliyyətsiz addım kimi qiymətləndirib, çünki bu, 300 gündən artıq davam edən sülh mitinqlərinin legitimliyinə zərbə vurub. Sosial şəbəkələrdə də geniş müzakirə edilən hadisələrdən sonra müxalifətin nüfuzunun daha da zəifləyəcəyi və etiraz hərəkatının marginallaşacağı gözlənilir. Hökumətin isə sərt repressiyalar yolunu seçəcəyi ehtimal olunur.